ଢେଙ୍କାନାଳ ଅଫିସ, ୨୮।୮ – ଢେଙ୍କାନାଳ ପୌରାଞ୍ଚଳ ୧୩ନଂ. ଓ୍ବାର୍ଡ ଅଧୀନ ଦଣ୍ଡାରୋଡ୍ରେ ଡ୍ରେନେଜ୍ ବ୍ୟବସ୍ଥା ଭୁଶୁଡ଼ି ପଡ଼ିଛି। ଅଣ ଓସାରିଆ ପୁରାତନ ପଥର ଡ୍ରେନ୍ରେ ନର୍ଦ୍ଦମା ଜଳ ନିଷ୍କାସନ ହୋଇପାରୁନାହିଁ। ଫଳରେ ପୂତିଗନ୍ଧମୟ ପରିବେଶରେ ନାକଫାଟୁଛି। ଏହାର ସମାଧାନ ଦିଗରେ ପଦକ୍ଷେପ ନେବାକୁ ଅଞ୍ଚଳବାସୀଙ୍କ ବାରମ୍ବାର ଦୃଷ୍ଟି ଆକର୍ଷଣ କରିବା ସତ୍ତ୍ୱେ ପୌର କର୍ତ୍ତୃପକ୍ଷ ପଦକ୍ଷେପ ଗ୍ରହଣ କରୁନାହାନ୍ତି। ଏହାର ସ୍ଥାୟୀ ସମାଧାନ କରିବାକୁ ଓ୍ବାର୍ଡବାସୀ ଜିଲାପାଳଙ୍କୁ ଲିଖିତ ଭାବେ ଜଣାଇଛନ୍ତି ।
ଲଗାଣ ବର୍ଷାରେ ୩ନଂ, ୪ନଂ, ୧୧ନଂ ଏବଂ ୧୨ନଂ. ଓ୍ବାର୍ଡରୁ ପାଣି ସ୍ରୋତ ପ୍ରବାହିତ ହୋଇ ଦଣ୍ଡାରୋଡ୍ ଡ୍ରେନ୍ରେ ମିଶି କୃତ୍ରିମ ବନ୍ୟା ପରିସ୍ଥିତି ସୃଷ୍ଟି କରୁଛି। ଡ୍ରେନ୍ ପାଣି ସହିତ ବିଷଧର ସାପ, କୀଟ ଘରେ ପଶୁଛନ୍ତି। ଜଳ ନିଷ୍କାସନ ହୋଇପାରୁ ନ ଥିବାରୁ ରୋଗୀ, ଛାତ୍ରୀଛାତ୍ର ଯାତାୟାତରେ କଷ୍ଟ ଭୋଗୁଛନ୍ତି। ବ୍ୟବସାୟୀ, କର୍ମଜୀବୀ କାର୍ଯ୍ୟକ୍ଷେତ୍ରକୁ ଯିବାରେ ନାହିଁ ନ ଥିବା ଦୁର୍ଦ୍ଦଶା ହେଉଛନ୍ତି। ସେହିପରି ଦଣ୍ଡା ସାହି ରାସ୍ତାର ଉତ୍ତର ଦିଗରେ ଥିବା ବସ୍ତିର ଡ୍ରେନ୍ ଅଧାପନ୍ତରିଆ ଅବସ୍ଥାରେ ରହିଛି। ସେଠାରେ ମଧ୍ୟ ବର୍ଷାଜଳ ନିଷ୍କାସନ ହୋଇ ନ ପାରି କୃତ୍ରିମ ଜଳାଶୟ ସୃଷ୍ଟି ହୋଇଛି। ଏହି ଦୂଷିତ ଜଳ ଖୋଲା କୂଅରେ ପଶି ପାନୀୟ ଜଳକୁ ପ୍ରଦୂଷିତ କରୁଛି। ପାଇଖାନା ଟାଙ୍କିରେ ପାଣି ପଶୁଥିବାରୁ ସମସ୍ୟା ଅଧିକ ଜଟିଳ ହୋଇପଡୁଛି। ପୁରୁଣା ଘରଗୁଡ଼ିକ ଦବିଯାଉଛି। ହଜାର ହଜାର ଅଞ୍ଚଳବାସୀଙ୍କ ବୃହତ୍ତର ସ୍ବାର୍ଥ ଦୃଷ୍ଟିରୁ ଡ୍ରେନେଜ ସମସ୍ୟାର ସ୍ଥାୟୀ ସମାଧାନ କରିବାକୁ ଗିରୀଶ ଚନ୍ଦ୍ର ନାଥ, ମୁରଲୀଧର ପଟ୍ଟନାୟକ, ଭରତ ହାତୀ, ପଙ୍କଜ ନାୟକ, ରୁଦ୍ରାନ୍ତ କୁମାର ଦଳେଇ, ଉପେନ୍ଦ୍ରନାଥ ସ୍ବାଇଁ, ସୁନାକର ଲେଙ୍କା, ଜିତେନ୍ଦ୍ର ବରାଳ, ଦୀପୁନା ଜେନା, ବ୍ରହ୍ମାନନ୍ଦ ମହାନ୍ତି ପ୍ରମୁଖ ଜିଲାପାଳଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି। ଏହାର ନକଲ ଏମ୍ପି, ବିଧାୟକ, ପୌରସଂସ୍ଥା ନିର୍ବାହୀ ଅଧିକାରୀଙ୍କୁ ଦିଆଯାଇଛି। ଯୁଦ୍ଧକାଳୀନଭିତ୍ତିରେ ଡ୍ରେନ୍ ସମ୍ପ୍ରସାରଣ କରା ନ ଗଲେ ଅଞ୍ଚଳବାସୀ ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।