ଦିଗପହଣ୍ଡି,୩୦।୫(ଡି.ଏନ୍.ଏ.): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ସହଦେବ ଟିକରପଡ଼ା ପଞ୍ଚାୟତ ବିଛାପାଟ ଗ୍ରାମ ନିକଟ ଦୁର୍ଗମ ଅଞ୍ଚଳରେ ଚାଲିଥିବା ବେଆଇନ ଦେଶୀ ମଦଭାଟି ଉପରେ ଗୁରୁବାର ଅବକାରୀ ବିଭାଗ ପକ୍ଷରୁ ଚଢ଼ାଉ କରାଯାଇଥିଲା। ଏହି ଘଟଣାରେ ଭାଟିରେ ମଦ ପ୍ରସ୍ତୁତ କରୁଥିବା ବିଛାପାଟ ଗ୍ରାମର ନିଳାଞ୍ଚଳ ବେହେରା ଓ ଫାସିବନ୍ଧ ଗ୍ରାମର ରଞ୍ଜନ ନାଇକଙ୍କୁ ଗିରଫ କରାଯାଇଛି। ସେମାନଙ୍କ ନିକଟରୁ ୨୨ଲିଟର ରନ୍ଧା ଦେଶୀ ମଦ ସହ ମଦରନ୍ଧା ସରଞ୍ଜାମ ଜବତ କରାଯାଇଛି।
ସୂଚନାନୁଯାୟୀ, କୌଣସି ସୁତ୍ରରୁ ଖବର ପାଇ ସକାଳ ସାଢ଼େ ୭ଟାରେ ଅବକାରୀ କର୍ମଚାରୀମାନେ ଅତର୍କିତ ଚଢ଼ାଉ କରିଥିଲେ। କର୍ମଚାରୀଙ୍କୁ ଦେଖି ଅଭିଯୁକ୍ତଦ୍ୱୟ ଫେରାର ହେବାକୁ ଚେଷ୍ଟା କରୁଥିବା ବେଳେ ସେମାନଙ୍କ ସହ ଧସ୍ତାଧସ୍ତି ହୋଇଥିଲା। ଅଭିଯୁକ୍ତ ନିଳାଞ୍ଚଳଙ୍କୁ ଚିକିଟି ଅବକାରୀ ରେଞ୍ଜ କାର୍ଯ୍ୟାଳୟ ମାମଲା(ନଂ ୫/୧୯-୨୦) ଏବଂ ରଞ୍ଜନଙ୍କୁ ବ୍ରହ୍ମପୁର ଅବକାରୀ ଷ୍ଟ୍ରାଇକିଂ ଫୋର୍ସ କାର୍ଯ୍ୟାଳୟ ମାମଲା ନଂ(୧୩/୧୯-୨୦) ଅନୁଯାୟୀ ସାନଖେମୁଣ୍ଡି କୋର୍ଟକୁ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ଅଭିଯୁକ୍ତଦ୍ୱୟଙ୍କୁ ଦିଗପହଣ୍ଡି ସବ୍ଜେଲ୍ ହାଜତକୁ ପଠାଇ ଦିଆଯାଇଛି।