ରୋଆନେ (ଫ୍ରାନ୍ସ), ୧୩ା୬ (ଏଏଫ୍ପି)- ବିଶିଷ୍ଟ ସାଇକ୍ଲିଷ୍ଟ ଖ୍ରିସ୍ ଫ୍ରୁମ୍ ବୁଧବାର ବୁଧବାର ଅଭ୍ୟାସ ବେଳେ ଗୁରୁତର ଭାବେ ଆହତ ହୋଇଛନ୍ତି। ତାଙ୍କ ଗୋଡ଼, ହାତ, ପିଚା ଓ ପଞ୍ଜରାରେ ଆଘାତ ଲାଗିଛି। ଫଳରେ ସେ ଟୁର୍ ଡି ଫ୍ରାନ୍ସ ସାଇକ୍ଲିଂ ପ୍ରତିଯୋଗିତାରୁ ବାହାରିଯାଇଛନ୍ତ ଯେଉଁଥିରେ ସେ ୪ଥର ବିଜେତା ହୋଇସାରିଛନ୍ତି। ୩୪ ବର୍ଷୀୟ ଫ୍ରୁମ୍ ଚଳିତବର୍ଷ ୫ମ ଥର ଏଥିରେ ଟାଇଟଲ ଜିତିବା ଲାଗି ଲକ୍ଷ୍ୟ ରଖିଥିଲେ। ସେ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ଫ୍ରୁମ୍ଙ୍କ ଇନୋସ୍ ଟିମ୍ ପ୍ରିନ୍ସପାଲ ଡେଭ୍ ବ୍ରେସ୍ଫୋଲ୍ଡଙ୍କ ସୂଚନା ଅନୁସାରେ ସେଣ୍ଟ୍ରାଲ ଫ୍ରାନ୍ସ ଅନ୍ତର୍ଗତ କ୍ରିଟେରିଅମ୍ ଡୁ ଡଫିନ୍ଠାରେ ହେବାକୁଥିବା ଚତୁର୍ଥ ଷ୍ଟେଜ୍ ପୂର୍ବରୁ ବୁଧବାର ଅଭ୍ୟାସ ବେଳେ ଏହି ଦୁର୍ଘଟଣା ଘଟିଛି। ଫ୍ରୁମ୍ ତାଙ୍କ ଡଚ୍ ଟିମ୍ମେଟ୍ ଓଟ୍ ପୋଏଲ୍ସ ସହିତ ଏକ ପାହାଡ଼ିଆ ଗଡ଼ାଣିଆ ରାସ୍ତାରେ ଖସୁଥିବା ବେଳେ ଦୁର୍ଘଟଣାଗ୍ରସ୍ତ ହୋଇଥିଲେ। ତାଙ୍କ ସାଇକେଲଟି ସଡ଼କ ପାର୍ଶ୍ୱର ଏକ କାନ୍ଥରେ ଯାଇ ପିଟି ହୋଇଯାଇଥିଲା। ସେତେବେଳେ ସାଇକେଲଟିର ଘଣ୍ଟା ପ୍ରତି ସ୍ପିଡ୍ ୬୦ କିଲୋମିଟର ଥିବା ଅନୁମାନ କରାଯାଉଛି। ତାଙ୍କୁ ହେଲିକପ୍ଟର ଯୋଗେ ଏକ ଡାକ୍ତରଖାନା ନିଆଯାଇଥିଲା। ସେଠାରେ ତାଙ୍କର ସଫଳ ଅସ୍ତ୍ରୋପଚାର ହୋଇଛି। ଫ୍ରୁମ୍ ୬ ମାସ ପରେ କୌଣସି ପ୍ରତିଯୋଗିତାରେ ଅଂଶଗ୍ରହଣ ପାଇଁ ଫିଟ୍ ହୋଇ ଯାଇଥିବେ ବୋଲି ତାଙ୍କୁ ଚିକିତ୍ସା କରୁଥିବା ଡକ୍ତରମାନେ କହିଛନ୍ତି।