ଭଦ୍ରକ ଅଫିସ, ୧୭।୧- ଗତବର୍ଷ ସେପ୍ଟେମ୍ବର ୧୦ ତାରିଖ ସକାଳେ ଭଦ୍ରକ ନୂଆ ବସ୍ଷ୍ଟାଣ୍ଡ ନିକଟରେ ଏକ ସଡ଼କ ଦୁର୍ଘଟଣାରେ ୨ ଛାତ୍ରଙ୍କ ମୃତ୍ୟୁ ଘଟିଥିଲା। ଦ୍ରୁତଗତିରେ ନାଲି ରଙ୍ଗର ଏକ ଚାରିଚକିଆ ଗାଡ଼ି ଦୁର୍ଘଟଣା ଘଟାଇ କଟକ ଆଡ଼କୁ ଚାଲିଯାଇଥିଲା। ଦୁର୍ଘଟଣାରେ ଛାତ୍ର ଶୁଭଙ୍କର ମଲ୍ଲିକ(୧୭) ଓ ତାଙ୍କ ସାଙ୍ଗ ସୁମିତ୍ କୁମାର ସାହୁ(୧୩)ଙ୍କ ମୃତ୍ୟୁ ଘଟିଥିଲା। ଦୁର୍ଘଟଣା ଘଟାଇ ଫେରାର ଥିବା ଗାଡ଼ିକୁ ୪ ମାସ ପରେ ପଶ୍ଚିମବଙ୍ଗ ଅଞ୍ଚଳରୁ ପୋଲିସ ଜବତ କରି ଆଣିଛି। ଜବତ ଗାଡ଼ି(ନଂ.ଡବ୍ଲ୍ୟୁ ବି ୪୨ ଏପି ୨୮୬୨) ଆଇ ୧୦ ସ୍ପୋର୍ଟଜ୍ ସହ ଡ୍ରାଇଭର ବର୍ଦ୍ଧମାନ ଅଞ୍ଚଳର ଦୁର୍ଗାପ୍ରସାଦ ସୋରେନ୍ଙ୍କୁ ପୋଲିସ ଗିରଫ କରି ଶୁକ୍ରବାର କୋର୍ଟ ଚାଲାଣ କରିଛି। ସୂଚନାଥାଉ କି, ମୃତ ଦୁଇ ଛାତ୍ରଙ୍କ ପରିବାର ପକ୍ଷରୁ ଦୁର୍ଘଟଣା ଘଟାଇଥିବା ଗାଡ଼ିକୁ ଭଦ୍ରକ ଟାଉନ ଥାନା ପୋଲିସ ଜବତ ନ କରିବା କାରଣରୁ ଏକାଧିବାର ଏସ୍ପିଙ୍କ ଦ୍ୱାରସ୍ଥ ହୋଇଥିଲେ। ଏସ୍ପିଙ୍କ ନିର୍ଦ୍ଦେଶକ୍ରମେ ଏକ ସ୍ବତନ୍ତ୍ର ଟିମ୍ ପଶ୍ଚିମବଙ୍ଗ ଯାଇ ଉକ୍ତ ଗାଡ଼ିକୁ ଠାବ କରିଥିଲା।