ବ୍ରହ୍ମପୁର ଅଫିସ,୩୧ା୧- ସଡକ ଦୁର୍ଘଟଣା ଜନିତ ମୃତ୍ୟୁହାର କମାଇବା ପାଇଁ ସରକାର ଅନେକ ସଚେତନତା କାର୍ଯ୍ୟକ୍ରମ କରୁଛନ୍ତି। ଏପରିକି ଦ୍ରୁତ ଗାଡି ଚାଳକଙ୍କୁ ସାବାଡ଼ କରିବା ପାଇଁ ଟ୍ରାଫିକ ନିୟମକୁ କଡାକଡି କରାଯାଇଛି। ଏହା ସତ୍ତ୍ବେ ମଧ୍ୟ ସଡକ ଦୁର୍ଘଟଣାରେ ଲୋକଙ୍କ ଧନଜୀବନ ଚାଲିଯାଉଛି। ଗତ ୨୫ ତାରିଖ ମଧ୍ୟରେ ବ୍ରହ୍ମପୁର ଦେଇ ଯାଇଥିବା ଜାତୀୟ ରାଜପଥ ନଂ.୧୬ ହଳଦିଆପଦର ଓଭରବ୍ରିଜ ଏଣ୍ଟ୍ରି ପଏଣ୍ଟଠାରୁ ଲାଞ୍ଜିପଲ୍ଲୀ ଓଭରବ୍ରିଜ ଏଣ୍ଟ୍ରି ପଏଣ୍ଟ ମଧ୍ୟରେ ୨ ମହିଳା ଓ ୪ ଜଣ ଯୁବକଙ୍କ ଜୀବନ ଦୁର୍ଘଟଣାରେ ଯାଇଛି। ସେହି ଜାତୀୟ ରାଜପଥ ଏବେ ଭଗବାନ ଭରସା ବୋଲି ଲୋକେ କହୁଛନ୍ତି। ଏହି ଆଶା ନେଇ ହଳଦିଆପଦର ଓ ଆଖପାଖ ଅଞ୍ଚଳର କେତେକ ଧର୍ମୀୟ ବିଶ୍ୱାସ ଲୋକ, ଜାତୀୟ ରାଜପଥ ଦେଇ ପ୍ରାତଃ ଭ୍ରମଣ କରୁଥିବା ଅବସରପ୍ରାପ୍ତ ଓ ବରିଷ୍ଠ ନାଗରିକ ଏଠାରେ ଘଟୁଥିବା ଦୁର୍ଘଟଣା ରୋକିବାକୁ ଏକ ନୂଆ ପ୍ରୟାସ ଆରମ୍ଭ କରିଛନ୍ତି। ସେମାନେ ବୁଧବାର ଓଭରବ୍ରିଜ ନିକଟରେ ମା’ଦୁର୍ଗାଙ୍କ ଫଟୋ ରଖି ପୂଜାର୍ଚ୍ଚନା କରିଥିଲେ। ଏପରିକି ଏଠାରେ ଆଉ ଦୁର୍ଘଟଣା ନ ଘଟିବା ପାଇଁ ମା’ଙ୍କ ନିକଟରେ ପ୍ରାର୍ଥନା କରିଥିଲେ। ଅଚ୍ୟୁତାନନ୍ଦ ପାଣିଗ୍ରାହୀ, ପ୍ରବୀଣ ରାଓ, ବାଳକୃଷ୍ଣ ସାହୁ, ରାଧାକାନ୍ତ ଶତପଥୀଙ୍କ ସମେତ କେତେକ ଯୁବକ ଏହି ପୂଜାର୍ଚ୍ଚନାରେ ଅଂଶଗ୍ରହଣ କରିଥିଲେ। ସୂଚନାଯୋଗ୍ୟ, ଗତ ୩ ତାରିଖରେ ହଳଦିଆପଦର ଓଭିରବ୍ରିଜ ପଏଣ୍ଟରେ ଟ୍ରକ୍ ଧକ୍କାରେ ରୀତା କୁମାରୀ ହୋତାଙ୍କର ମୃତ୍ୟୁ ଘଟିଥିବା ବେଳେ ତାଙ୍କ ସ୍ବାମୀ ମହେନ୍ଦ୍ର ହୋତା ଗୁରୁତର ହୋଇଥିଲେ। ସେହିପରି ୯ ତାରିଖରେ ଖଜୁରିଆ ବାଇପାସ୍ରେ ମଧ୍ୟ ଟ୍ରକ ଧକ୍କାରେ ପପୁନ ପାଢ଼ୀଙ୍କର ମୃତ୍ୟୁ ଘଟିଥିବା ବେଳେ ଗୁରୁତର ଆହତ ହୋଇଥିବା ତାଙ୍କ ସାଙ୍ଗ ପ୍ରଶାନ୍ତ ସାହୁଙ୍କର ଚିକିତ୍ସାଧୀନ ଅବସ୍ଥାରେ ଗତ ୨୦ ତାରିଖରେ କଟକ ହସ୍ପିଟାଲରେ ମୃତ୍ୟୁ ଘଟିଥିଲା। ସେହିପରି ଗତ ୧୫ ତାରିଖରେ ଖଜୁରିଆ ବାଇପାସ୍ରେ ଟ୍ରକ ଧକ୍କାରେ ଶିବ ଶଙ୍କର ସାହୁଙ୍କ ମୃତ୍ୟୁ ଘଟିଥିବା ବେଳେ ତାଙ୍କ ଶାଳକ ଶିବ ପାତ୍ର ଗୁରୁତର ଅବସ୍ଥାରେ ଚିକିତ୍ସାଧୀନ ଅଛନ୍ତି। ସେହିପରି ଗତ ୨୪ ତାରିଖରେ ଲାଞ୍ଜିପଲ୍ଲୀ ବାଇପାସ ନିକଟରେ ଟ୍ରକ୍ ଧକ୍କାରେ ଚିନ୍ମୟ ଦାସଙ୍କ ମୃତ୍ୟୁ ଘଟିଥିବା ବେଳେ ତାଙ୍କ ସାଙ୍ଗ ପ୍ରୀତି ସୋମୟ ଦାସ ଗୁରୁତର ହୋଇ ଏବେ ଚିକିତ୍ସାଧୀନ ଅଛନ୍ତି। ଗତ ୨୮ ତାରିଖରେ ହଳଦିଆପଦର ଓ ଲାଞ୍ଜିପଲ୍ଲୀ ଓଭରବ୍ରିଜ ନିକଟରେ ଏକ ଟ୍ରକ୍ ଧକ୍କାରେ ନନ୍ଦିନୀ ଗୌଡ଼ଙ୍କର ମୃତ୍ୟୁ ଘଟିଥିବା ବେଳେ ତାଙ୍କ ବାପା କୈଳାସ ଗୌଡ଼ ଗୁରୁତର ଆହତ ହୋଇଥିଲେ।