ମୁମ୍ବାଇ,୩।୬: ଦେଶରେ ଦିନକୁ ଦିନ ସଡ଼କ ଦୁର୍ଘଟଣା ବଢିବାରେ ଲାଗିଛି। ବିଳମ୍ବିତ ରାତିରେ ଟ୍ରାଫିକ୍ ଚାଲିଯିବା ପରେ ବଢୁଛି ଦୁର୍ଘଟଣା। ଏମିତିକି ପୋଲିସ ପାଟ୍ରୋଲିଂ ନ ଥିବାରୁ ମଧ୍ୟ ଅଧିକାଂଶ ସ୍ଥାନରେ ନିଶାଗ୍ରସ୍ତ ଯୁବକ ଦୁର୍ଘଟଣା ଘଟାଉଥିବା ଦେଖାଯାଉଛି। ଏହାକୁ ଦୃଷ୍ଟିରେ ରଖି ମୁମ୍ବାଇର କେତେଜଣ ମହିଳା ଏବେ ଅଣ୍ଟା ଭିଡିଛନ୍ତି। ଏମାନଙ୍କ ମଧ୍ୟରେ ରହିଛନ୍ତି ଗୃହିଣୀ, ଆଇନଜୀବି ଓ ରାଜନୈତିକ କର୍ମକର୍ତ୍ତା। ଭିଲେ ପାର୍ଲେ ଅଞ୍ଚଳରେ ବିଳମ୍ବିତ ରାତିରେ ଏମାନେ ନୀଳ ଟିସାର୍ଟ ଓ ଧଳା ଟୋପି ପିନ୍ଧି ରାସ୍ତା ଉପରକୁ ଆସି ଟ୍ରାଫିକ୍ ନିୟନ୍ତ୍ରଣ କରିବା ସହ ପୋଲିସକୁ ସାହାଯ୍ୟ କରୁଛନ୍ତି। ଏମିତିକି ବିନା ହେଲ୍ମେଟ୍ରେ ଯାଉଥିବା ବ୍ୟକ୍ତିଙ୍କୁ ମଧ୍ୟ ଧରି ନେଉଛନ୍ତି। ସୂଚନାଯୋଗ୍ୟ, ୨୦୦୭ରେ ଭିଲେପାର୍ଲେ ପୋଲିସ ‘ପାର୍ଲେ ପୋଲିସ ମିତ୍ର’ର ଶୁଭାରମ୍ଭ କରିଥିଲା। ଯେଉଁଥିରେ ସହରକୁ ସୁରକ୍ଷିତ ରଖିବାକୁ ସାଧାରଣ ନାଗରିକଙ୍କୁ ସାମିଲ କରାଯାଇଥିଲା।
