ନୂଆଦିଲ୍ଲୀ,୩୧ା୮: ଦୁର୍ନୀତି ବିରୋଧରେ ସରକାର ଲଢ଼େଇ ଘୋଷଣା କରିଛନ୍ତି। ଦେଶର ବିଭିନ୍ନ ସରକାରୀ ବିଭାଗରେ ସିବିଆଇ ପକ୍ଷରୁ ଅଚାନକ ଚଢ଼ାଉ କରାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରତ୍ୟକ୍ଷ ନିର୍ଦ୍ଦେଶରେ ଶୁକ୍ରବାର ଦେଶର ୧୫୦ ସ୍ଥାନରେ ଏହି ଚଢ଼ାଉ କରାଯାଇଥିବା କୁହାଯାଉଛି। ଚଢ଼ାଉରେ ଭିଜିଲାନ୍ସ ବିଭାଗ ମଧ୍ୟ ସାମିଲ ଥିଲା। ଚଢ଼ାଉ ହୋଇଥିବା ସ୍ଥାନଗୁଡ଼ିକ ମଧ୍ୟରେ ରହିଛି ଦିଲ୍ଲୀ, ଜୟପୁର, ଯୋଧପୁର, ଗୁଆହାଟୀ, ଶ୍ରୀନଗର, ସିଲଂ, ଚଣ୍ଡିଗଡ, ଶିମଲା, ଚେନ୍ନାଇ, ମଦୁରାଇ, କୋଲକାତା, ହାଇଦ୍ରାବାଦ, ବେଙ୍ଗାଲୁରୁ, ମୁମ୍ବାଇ, ପୁଣେ, ଗାନ୍ଧୀନଗର, ଗୋଆ, ଭୋପାଳ, ଜବଲପୁର, ନାଗପୁର, ପାଟନା, ରାଞ୍ଚତ୍, ଗାଜିଆବାଦ, ଭଦୋଦରା, ଅହମଦାବାଦ, କୋଚିନ, ଲକ୍ଷ୍ନୌ ଓ ଡେରାଡୁନ୍। ଶୁକ୍ରବାର ସକାଳଠାରୁ ଏହିସବୁ ସହରରେ ଥିବା ରେଲଓ୍ବେ, ବିଏସ୍ଏନ୍ଏଲ, ଜାହାଜ ଚଳାଚଳ କାର୍ଯ୍ୟାଳୟ, ବିମାନ ବନ୍ଦର କର୍ତ୍ତୃପକ୍ଷଙ୍କ କାର୍ଯ୍ୟାଳୟ, କୋଇଲା ଖଣି, ଭାରତର ଖାଦ୍ୟ ନିଗମ କାର୍ଯ୍ୟାଳୟ, ସୀମାଶୁଳ୍କ, ବିଦ୍ୟୁତ, ପରିବହନ, ପୂର୍ତ୍ତ ବିଭାଗ କାର୍ଯ୍ୟାଳୟ ଆଦିରେ ଚଢ଼ାଉ କରାଯାଇଥିଲା। ଯେଉଁସବୁ ସରକାରୀ କାର୍ଯ୍ୟାଳୟରେ ଜନସାଧାରଣ ଅଧିକ ଦୁର୍ନୀତିର ଶୋଷଣ ହେଉଥିବା ଅଭିଯୋଗ ହେଉଛି, ସେଠାରେ ଏହି ସ୍ବତନ୍ତ୍ର ଚଢ଼ାଉ ଅଭିଯାନ କରାଯାଇଥିଲା ବୋଲି ଜଣେ ଅଧିକାରୀ କହିଛନ୍ତି।