ଇସ୍ଲାମାବାଦ,୧୧ା୬: ପାକିସ୍ତାନର ପୂର୍ବତନ ରାଷ୍ଟ୍ରପତି ତଥା ପାକିସ୍ତାନ ପିପୁଲ୍ସ ପାର୍ଟି (ପିପିପି)ର ସହ-ଅଧ୍ୟକ୍ଷ ଅସିଫ ଅଲି ଜର୍ଦ୍ଦାରୀଙ୍କୁ ଜାଲ୍ ବ୍ୟାଙ୍କ ଆକାଉଣ୍ଟ ଦୁର୍ନୀତି ମାମଲାରେ ଗିରଫ କରାଯାଇଛି। ଜାମିନ ମିଆଦ ବଢ଼ାଇବା ଲାଗି ଇସ୍ଲାମାବାଦ ହାଇକୋର୍ଟରେ ସେ କରିଥିବା ଆବେଦନ ଖାରଜ ହୋଇଯିବା ପରେ ଜାତୀୟ ଉତ୍ତରଦାୟିତ୍ୱ ବ୍ୟୁରୋ (ଏନ୍ଏବି)ର ଏକ ଟିମ୍ ଜର୍ଦ୍ଦାରୀଙ୍କୁ ସୋମବାର ଗିରଫ କରିଛି। ହାଇକୋର୍ଟଙ୍କ ନିଷ୍ପତ୍ତି ବିରୋଧରେ ଜର୍ଦ୍ଦାରୀଙ୍କ ଲିଗାଲ ଟିମ୍ ସୁପ୍ରିମକୋର୍ଟରେ ଆବେଦନ କରିବ ବୋଲି କହିଛି। ଜାଲ୍ ବ୍ୟାଙ୍କ ଆକାଉଣ୍ଟ ଦୁର୍ନୀତି ମାମଲାରେ ଜର୍ଦ୍ଦାରୀଙ୍କ ଭଉଣୀ ଫାର଼୍ୟାଲ ତାଲପୁର ଓ ତାଙ୍କର ଅନ୍ୟ କେତେଜଣ ଘନିଷ୍ଠ ସହଯୋଗୀ ସମ୍ପୃକ୍ତ ଅଛନ୍ତି। ୨୦୧୫ରେ ସଂଘୀୟ ତଦନ୍ତକାରୀ ସଂସ୍ଥା (ଏଫ୍ଆଇଏ) ତଦନ୍ତରୁ ଏହି ଦୁର୍ନୀତି ପଦାକୁ ଆସିଥିଲା। ଦୁର୍ନୀତିପୂର୍ଣ୍ଣ ଉପାୟରେ ଅର୍ଜିତ ସମ୍ପତ୍ତିକୁ ଦେଶ ବାହାରକୁ ପଠାଇବା ପାଇଁ ଏହି ଜାଲ୍ ବ୍ୟାଙ୍କ ଆକାଉଣ୍ଟକୁ ବ୍ୟବହାର କରାଯାଉଥିଲା ବୋଲି ଏଫଆଇଏ କହିଛି। ତେବେ ଏହା ପଛରେ କୌଣସି ପ୍ରମାଣ ନାହିଁ, ଏହା ରାଜନୈତିକ ଅଭିସନ୍ଧିମୂଳକ ବୋଲି ପିପିପି ପକ୍ଷରୁ କୁହାଯାଇଛି। ବିଭିନ୍ନ ଅପରାଧ ମାମଲାରେ ଜର୍ଦ୍ଦାରୀ ୧୧ ବର୍ଷ ଜେଲ୍ରେ କଟାଇଛନ୍ତି। ତେବେ ସେ କୌଣସି ମାମଲାରେ ଦୋଷୀସାବ୍ୟସ୍ତ ହୋଇନାହାନ୍ତି।