ଭୁବନେଶ୍ୱର, ୧୭।୭(କ୍ରୀଡ଼ା ପ୍ରତିନିଧି)- ଇଟାଲିର ନାପୋଲିଠାରେ ଅନୁଷ୍ଠିତ ଓ୍ବାଲର୍ଡ ୟୁନିଭର୍ସିଟି ଗେମ୍ସର ମହିଳା ୧୦୦ ମିଟର ରେସ୍ରେ ସ୍ବର୍ଣ୍ଣ ପଦକ ଜିତିଥିବା ଓଡ଼ିଶାର ଦୂତୀ ଚାନ୍ଦଙ୍କୁ ମଙ୍ଗଳବାର କିଟ୍ ଓ କିସ୍ ପକ୍ଷରୁ ସମ୍ବର୍ଦ୍ଧିତ କରାଯାଇଛି। ସମ୍ପ୍ରତି କିଟ୍ରେ ଅଧ୍ୟୟନରତ ଭାରତର ଏହି ସ୍ପ୍ରିଣ୍ଟ କୁଇନ୍ଙ୍କ ନାମରେ ଖୁବ ଶୀଘ୍ର ଏକ ଆଥଲେଟିକ ଟ୍ରାକ ନାମିତ ହେବ। ଆଥଲେଟିକ ଟ୍ରାକ କାମ ସମ୍ପୂୂର୍ଣ୍ଣ ହେବା ପରେ ଏହାର ନାମ ‘ଦୂତୀ ଚାନ୍ଦ ଆଥଲେଟିକ ଟ୍ରାକ’ ହେବ ବୋଲି ମଙ୍ଗଳବାର କିଟ୍ ଓ କିସ୍ ପ୍ରତିଷ୍ଠାତା ଅଚ୍ୟୁତ ସାମନ୍ତ ପ୍ରକାଶ କରିଛନ୍ତି। ଏହା ବ୍ୟତୀତ ଭବିଷ୍ୟତରେ ଏଠାରେ ପ୍ରତିଷ୍ଠା କରାଯିବାକୁ ଥିବା ଆଥଲେଟିକ ଏକାଡେମିର ମୁଖ୍ୟ ଭାବେ ଦୂତୀଙ୍କୁ ଅବସ୍ଥାପିତ କରାଯିବ। ଏହା ହେଉଛି ଦୂତୀଙ୍କୁ କିଟ୍ ଓ କିସ୍ର ସର୍ବଶ୍ରେଷ୍ଠ ଉପହାର ବୋଲି ସେ କହିଛନ୍ତି। ପ୍ରକାଶ ଯୋଗ୍ୟ ଯେ, ଦୂତୀ ଭାରତର ପ୍ରଥମ ଧାବିକା ଭାବେ ଓ୍ବାଲର୍ଡ ୟୁନିଭର୍ସିଟି ଗେମ୍ସର ୧୦୦ ମିଟର ଦୌଡ଼ରେ ୧୧.୩୨ ସେକେଣ୍ଡ ସମୟ ନେଇ ସ୍ବର୍ଣ୍ଣ ପଦକ ହାସଲ କରଥିଲେ। ”କିଟ୍, କିସ୍ ଏବଂ ଅଚ୍ୟୁତ ସାମନ୍ତଙ୍କ ସହଯୋଗ ପାଇଁ ମୁଁ ଆଜି ଏଠାରେ ପହଞ୍ଚତ୍ବା ସମ୍ଭବ ହୋଇପାରିଛି। ଭବିଷ୍ୟତରେ ଓଡ଼ିଶା ତଥା ଦେଶ ପାଇଁ ଆହୁରି ସୁନାମ ଆଣି ପାରିବି ବୋଲି ମୋର ଦୃଢ଼ ଆମତ୍ବିଶ୍ୱାସ ସୃଷ୍ଟି ହୋଇଛି“ ବୋଲି ଦୂତୀ କହିଛନ୍ତି। କାର୍ଯ୍ୟକ୍ରମରେ କିଟ୍ର କ୍ରୀଡ଼ା ନିର୍ଦ୍ଦେଶକ ଡ. ଗଗନେନ୍ଦୁ ଦାଶ, ଦୂତୀଙ୍କ କୋଚ ଏନ. ରମେଶ, କିଟ୍ ବିଶ୍ୱବିଦ୍ୟାଳୟର କୁଳପତି ପ୍ରଫେସର ହୃଷିକେଶ ମହାନ୍ତି, କୁଳସଚିବ ଡ. ସସ୍ମିତାରାଣୀ ସାମନ୍ତ ପ୍ରମୁଖ ଉପସ୍ଥିତ ରହି ଦୂତୀଙ୍କୁ ସମ୍ବର୍ଦ୍ଧିତ କରିଥିଲେ।