ନୂଆଦିଲ୍ଲୀ,୨୨।୫- ଦୂତୀ ଚାନ୍ଦଙ୍କ ସପକ୍ଷରେ ବାହାରିଛନ୍ତି ଆଉ ଜଣେ ବିଶ୍ୱସ୍ତରୀୟ ତାରକା। ସେ ହେଉଛନ୍ତି ହଲିଉଡ ଲୋକପ୍ରିୟ କମେଡିଆନ ତଥା ଜଣାଶୁଣା ଟକ୍ ଶୋ’ ଉପସ୍ଥାପିକା ଏଲେନ ଡିଜେନେରେସ। ଦୂତୀଙ୍କୁ ନେଇ ମୁଁ ଗର୍ବିତ ବୋଲି ସେ ଟୁଇଟ୍ କରିଛନ୍ତି। ଭାରତର ପ୍ରଥମ ଆଥ୍ଲେଟ ଭାବେ ନିଜକୁ ସମଲିଙ୍ଗୀ ବୋଲି ସ୍ବୀକାର କରିବା ସହ ସେ ଘାଷଣା କରି ସାହସିକତାର ପରିଚୟ ଦେଇଛନ୍ତି। ଏହି ଟ୍ରାକ୍ ଚାମ୍ପିୟନଙ୍କ ପ୍ରତି ମୋର ସମ୍ମାନ ବଢ଼ିଛି ବୋଲି ଡିଜେନେରେସ କହିଛନ୍ତି।
ଉଲ୍ଲେଖଥାଉ କି, ଦୁଇ ଦଶନ୍ଧି ତଳେ ଜେନେରେସ୍ ନିଜକୁ ଜଣେ ସମଲିଙ୍ଗୀ ବୋଲି ଘୋଷଣା କରି ସମସ୍ତଙ୍କ ନଜରକୁ ଆସିଥିଲେ। ଭାରତୀୟ ପରମ୍ପରା ଓ ସମାଜ ରକ୍ଷଣଶୀଳ ହୋଇଥିବା ବେଳେ ସମଲିଙ୍ଗୀ ପୁରୁଷ ଓ ମହିଳାଙ୍କୁ ସହଜରେ ଗ୍ରହଣ କରାଯାଇ ନ ଥାଏ ଓ ଏମାନଙ୍କୁ ଭିନ୍ନ ନଜରରେ ଦେଖାଯାଇଥାଏ। ଏହା ସତ୍ତ୍ୱେ ସେ ସାହସିକତାର ପରିଚୟ ଦେଇଛନ୍ତି। ସେ ପ୍ରଶଂସାର ପାତ୍ର। କେବଳ ଟ୍ରାକ୍ରେ ନୁହଁ, ଦୂତୀ ବ୍ୟକ୍ତିଗତ ଜୀବନରେ ମଧ୍ୟ ଜଣେ ଚାମ୍ପିୟନ ବୋଲି ସେ କହିଛନ୍ତି। ଡିଜେନେରେସ ଏବେ ତାଙ୍କ ସେଲିବ୍ରିଟି କମେଡି ଶୋ’ ‘ଦି ଏଲେନ ଶୋ’ର ୧୬ଶ ସଂସ୍କରଣର ଉପସ୍ଥାପନା କରୁଛନ୍ତି।