ରସୁଲପୁର,୨୩।୯(ଡି.ଏନ.ଏ.): ଯାଜପୁର ଜିଲା କୁଆଖିଆ ଥାନା ଅଧୀନ ଚକଗୋପାଳପୁର ଗାଁର ଚାନ୍ଦ ସାହିରେ ଖୁଦୁରୁକୁଣି ମେଢ଼ ଭସାଣିକୁ ନେଇ ବିବାଦ ସୃଷ୍ଟି ହୋଇଛି। କୋଭିଡ୍ ନିୟମ ଉଲ୍ଲଂଘନ କରି ସାହିର ଯୁବତୀଯୁବକ ଡିଜେ ବଜାଇ ନାଚଗୀତ କରୁଥିବାରୁ ପୋଲିସ ପହଞ୍ଚତ୍ ଏହାକୁ ବନ୍ଦ କରିଥିଲା। ଏହି ସମୟରେ ସେଠାରେ ଉପସ୍ଥିତ ଥିବା ଧାବିକା ଦୂତୀ ଚାନ୍ଦ ଓ ପୋଲିସ ଅଧିକାରୀଙ୍କ ମଧ୍ୟରେ କଥା କଟାକଟି ହୋଇଥିଲା।
ସୂଚନା ମୁତାବକ, ଭସାଣି କାର୍ଯ୍ୟକ୍ରମର ନେତୃତ୍ୱ ଦୂତୀ ନେଉଥିଲେ ବୋଲି ଥାନା ଅଧିକାରୀଙ୍କୁ ଫୋନ୍ ଯୋଗେ ଅଭିଯୋଗ ହୋଇଥିଲା। ଥାନା ଅଧିକାରୀ ମନୋଜ କୁମାର ସ୍ବାଇଁ ପାଟ୍ରୋଲିଂ ଭ୍ୟାନ ପଠାଇଥିଲେ। ଏଏସ୍ଆଇ ପ୍ରଦୀପ କୁମାର ମଲ୍ଲିକଙ୍କ ନେତୃତ୍ୱରେ ଏକ ଟିମ୍ ପହଞ୍ଚତ୍ ଶୋଭାଯାତ୍ରା ବନ୍ଦ କରିବାକୁ ପ୍ରୟାସ କରିଥିଲା। କରୋନା କଟକଣା ଉଲ୍ଲଂଘନ କରାଯାଇ ଶୋଭାଯାତ୍ରା କରାଯାଇ ପାରିବ ନାହିଁ ବୋଲି ପୋଲିସ କର୍ମଚାରୀମାନେ କହିଥିଲେ। ଏଥିସହିତ ଡିଜେ ଓ ମାଇକକୁ ବନ୍ଦ କରି ଦେଇଥିଲେ। ଏହାକୁ ନେଇ ପୋଲିସ ଓ ଦୂତୀଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ତେବେ କରୋନା ଲାଗି ପାର୍ବଣ ଋତୁରେ ସତର୍କ ରହିବାକୁ ପ୍ରଶାସନ ପକ୍ଷରୁ ମାର୍ଗ ଦର୍ଶିକା ଜରିଆରେ କୁହାଯାଇଛି। ଏସବୁ ସତ୍ତ୍ୱେ ଦୂତୀଙ୍କ ଭଳି ଜଣେ ଅନ୍ତଜାର୍ତୀୟ ଖ୍ୟାତି ସମ୍ପନ୍ନ ଧାବିକା କଟକଣା ଉଲ୍ଲଂଘନ କରିବା ଘଟଣାକୁ ସାଧାରଣରେ ନାପସନ୍ଦ କରାଯାଇଛି।
ଏସମ୍ପର୍କରେ ଦୂତୀ କହିଛନ୍ତି, ଭସାଣି ଉତ୍ସବ ନିମନ୍ତେ ଅନୁମତି ପାଇଁ କୁଆଖିଆ ଥାନା ଅଧିକାରୀଙ୍କୁ ଭେଟିଥିଲେ। ତେବେ କରୋନା କାଳରେ ଅନୁମତି ଦେବାକୁ ଥାନା ଅଧିକାରୀ ମନା କରିଥିଲେ। ମାତ୍ର ସାହି ଭିତରେ ଭସାଣି କରି ୧ ଘଣ୍ଟା ମଧ୍ୟରେ ସାରି ଦେବାକୁ କହିଥିଲେ। ଏହାଜାଣି ସେ ଭସାଣି ଉତ୍ସବରେ ସାମିଲ ହୋଇ ନ ଥିଲେ। ଭସାଣି ଦେଖିବାକୁ ସେ ରାସ୍ତା କଡ଼ରେ ଛିଡ଼ା ହୋଇଥିଲେ। ହଠାତ୍ ପୋଲିସ ପହଞ୍ଚତ୍ ଭସାଣି ବନ୍ଦ କରିଥିଲା। ପୋଲିସ ତାଙ୍କୁ ଏଠି କାହିଁକି ଛିଡ଼ା ହୋଇଛନ୍ତି ବୋଲି ପଚାରିବାରୁ କଥାକଟାକଟି ହୋଇଥିଲା। ଥାନା ଅଧିକାରୀ ସ୍ବାଇଁ କହିଛନ୍ତି, ଶୋଭାଯାତ୍ରା ପାଇଁ କାହାରିକୁ ଅନୁମତି ଦିଆଯାଉନାହିଁ। ସମସ୍ତଙ୍କୁ କରୋନା କଟକଣା ଅନୁପାଳନ କରିବାକୁ କୁହାଯାଉଛି। ତେବେ ଗୋପାଳପୁରରେ କଟକଣା ଉଲ୍ଲଂଘନ କରି ଭସାଣି ହେଉଥିବା ନେଇ ଅଭିଯୋଗ ଆସିଥିଲା। ସେହି ଅନୁସାରେ ପାଟ୍ରୋଲିଂ ଗାଡ଼ି ପଠାଇ ଭସାଣି ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଥିଲା।