ଭୁବନେଶ୍ୱର, ୧୧।୫(କ୍ରୀଡ଼ା ପ୍ରତିନିଧି)-ଆଥଲେଟିକ୍ସ ଟ୍ରାକ୍ରେ ନିଜର ଚମକ ଦେଖାଇ ରାଜ୍ୟ ଏବଂ ଦେଶକୁ ଗର୍ବିତ କରିଥିବା ସ୍ପ୍ରିଣ୍ଟ କୁଇନ୍ ଦୂତୀ ଚାନ୍ଦ ସମାଜସେବା କ୍ଷେତ୍ରରେ ମଧ୍ୟ ଆଗକୁ ବଢ଼ି ଅନ୍ୟମାନଙ୍କ ପାଇଁ ଉଦାହରଣ ସୃଷ୍ଟି କରିଛନ୍ତି। କରୋନା ଭାଇରସ୍ ସଂକ୍ରମଣ ପ୍ରଭାବରୁ ସମ୍ପୂର୍ଣ୍ଣ ଭାରତ ଏବେ ଲକ୍ଡାଉନ୍। କିଛି ପ୍ରତିଯୋଗିତା ନ ଥିବାରୁ ଦୂତୀ ଆବଶ୍ୟକ ଟ୍ରେନିଂ କରି ନିଜକୁ ଫିଟ୍ ରଖିବା ସହ ଗରିବ ଲୋକଙ୍କୁ ସାହାଯ୍ୟ କରିବାକୁ ଆଗେଇ ଆସିଛନ୍ତି । ସମ୍ପ୍ରତି ଭୁବନେଶ୍ୱରରେ ରହୁଥିବା ଦୂତୀ ନିଜ ଗାଁ ଯାଜପୁର ଜିଲା ଚକାଗୋପାଳପୁରକୁ ଯାଇ ୧୦୦୦ ଲୋକଙ୍କୁ ଶୁଖିଲା ଖାଦ୍ୟ ପୁଡ଼ିଆ ବାଣ୍ଟିଛନ୍ତି । ”ଆମ ଗାଁରେ ଅଧିକାଂଶ ତନ୍ତୁବାୟ ପରିବାର ରହୁଥିବାରୁ କାମକଲେ ସେମାନଙ୍କ ଖାଇବା ସମ୍ଭବ ହୋଇଥାଏ। ଲକ୍ଡାଉନ୍ ସ୍ଥିତିରେ ସେମାନେ ଏବେ ବହୁତ ଅସୁବିଧାରେ ଥିବା ମୁଁ ଶୁଣିବାକୁ ପାଇଥିଲି। ତେଣୁ ମୁଁ ୫୦,୦୦୦ଟଙ୍କା ଖର୍ଚ୍ଚ କରିଥିବାବେଳେ କିଟ୍ ଓ କିସ୍ର ପ୍ରତିଷ୍ଠାତା ତଥା ଏମ୍ପି ଅଚ୍ୟୁତ ସାମନ୍ତଙ୍କ ସାହାଯ୍ୟକ୍ରମେ ଲୋକଙ୍କ ପାଇଁ ଶୁଖିଲା ଖାଦ୍ୟ, ଗ୍ରସେରି ଏବଂ ସାନିଟାଇଜର ଆଦି ମିଶାଇ ପୁଡ଼ିଆ ପ୍ରସ୍ତୁତ କରିଥିଲି। ପ୍ରଥମ ପର୍ଯ୍ୟାୟରେ ୧୦୦୦ ଲୋକଙ୍କୁ ଶନିବାର ଏହି ପୁଡ଼ିଆ ବଣ୍ଟା ଯାଇଛି। ଆଉ ୨୦୦୦ ପୁଡ଼ିଆ ରବିବାର ପ୍ରସ୍ତୁତ କରାଯାଇଛି। ଏହାକୁ ସୋମବାର ଲୋକମାନଙ୍କୁ ପ୍ରଦାନ କରାଯିବ“ ବୋଲି ଦୂତୀ ପ୍ରକାଶ କରିଛନ୍ତି। ଗଁାକୁ ଯିବାପାଇଁ ମୁଁ ଭୁବନେଶ୍ୱରରୁ ସ୍ବତନ୍ତ୍ର ପାସ୍ ନେଇଥିଲି। ମୋ ପରିବାର ପକ୍ଷରୁ ଗଁା ଲୋକମାନଙ୍କୁ ଏ ସମ୍ପର୍କରେ ସୂଚନା ଦିଆ ଯାଇଥିଲା। ତେଣୁ ଲୋକମାନେ ଆସି ଆମ ଘରୁ ଖାଦ୍ୟପୁଡ଼ିଆ ସଂଗ୍ରହ କରିଥିଲେ। ମୋ ପ୍ରିୟ ମହିନ୍ଦ୍ରା ଏକ୍ସୟୁଭି ଏବେ କୋଭିଡ୍-୧୯ ରିଲିଫ କାର୍ଯ୍ୟରେ ଲାଗିଛି ବୋଲି ସେ କହିଛନ୍ତି ।
ଲୋକମାନେ କରୋନା ଭାଇରସ୍ ଜନିତ ରୋଗକୁ ନେଇ ଭୟଭୀତ ଅଛନ୍ତି। ସେମାନେ ଏବେ ବହୁତ ଅସୁବିଧାରେ ଥିବା ମୁଁ ଅନୁଭବ କଲି। ତେଣୁ ମୋ ପକ୍ଷରେ ଯେତେ ସମ୍ଭବ ହୋଇ ପାରିବ ନିଶ୍ଚିତ ସାହାଯ୍ୟ କରିବି ବୋଲି ଦୂତୀ କହିଛନ୍ତି। ଟୋକିଓ ଅଲିମ୍ପିକ୍ସ ଯୋଗ୍ୟତା ଅର୍ଜନ ଲକ୍ଷ୍ୟରେଥିବା ଦୂତୀ ଏବେ କଳିଙ୍ଗ ଷ୍ଟାଡିୟମରେ ଟ୍ରେନିଂ କରୁଛନ୍ତି। ପୂର୍ବରୁ ସେ କେବଳ ଫିଟ୍ନେସ୍ ଟ୍ରେନିଂ କରୁଥିଲେ। ମାତ୍ର ଲକ୍ଡାଉନ୍ ନିୟମ ସାମାନ୍ୟ କୋହଳ ହେବାପରେ ତାଙ୍କୁ କଳିଙ୍ଗ ଷ୍ଟାଡିୟମ ଟ୍ରାକ୍ରେ ଟ୍ରେନିଂ ପାଇଁ ସୁଯୋଗ ମିଳିଛି। ତେବେ ସେ କେବଳ ରନିଂ ବ୍ୟତୀତ ଅନ୍ୟ ସମସ୍ତ ଟ୍ରେନିଂ କିଟ୍ର କ୍ରିକେଟ ଷ୍ଟାଡିୟମରେ କରୁଛନ୍ତି ଏବଂ ସେଠାକାର ଜିମ୍ ବ୍ୟବହାର କରୁଛନ୍ତି ବୋଲି ପ୍ରକାଶ କରିଛନ୍ତି। ଆଥଲେଟିକ୍ ଫେଡେରେଶନ ଅଫ ଇଣ୍ଡିଆ(ଏଏଫଆଇ) ସେପ୍ଟେମ୍ବରରେ ସିଜନ ଆରମ୍ଭ କରିବାକୁ ଚିନ୍ତା କରୁଛି। ପ୍ରତିଯୋଗିତା ହେଲେ ସେ ନିଶ୍ଚିତ ଭାଗ ନେବେ ବୋଲି ଦୂତୀ କହିଛନ୍ତି ।
