ବଡବିଲ, ୧୧।୭(ସ୍ବ.ପ୍ର.)-କେନ୍ଦୁଝର ଜିଲା ବଡବିଲ ତହସିଲ କାର୍ଯ୍ୟାଳୟ ପରିସରରେ ପ୍ରଶାସନ ପକ୍ଷରୁ ବ୍ୟବହାର ଉପଯୋଗୀ ବସ୍ତ୍ର ଓ ଆସବାବପତ୍ର ଦାତାଙ୍କ ଠାରୁ ଗ୍ରହଣ କରାଯାଇ ଗରିବ ଓ ଦୁଃଖୀ ମାନଙ୍କୁ ମାଗଣା ବସ୍ତ୍ର ଯୋଗାଇ ଦେବାକୁ ‘ହେଲପିଙ୍ଗ ହ୍ୟାଣ୍ଡ’ ନାମରେ ଏକ ବିତରଣ କେନ୍ଦ୍ର ୨୦୧୮ ମସିହା ଫେବୃୟାରୀ ପ୍ରଥମ ସପ୍ତାହରେ ଉଦ୍ଘାଟିତ ହୋଇଥିଲା। ଚମ୍ପୁଆ ଉପଜିଲାପାଳ ପାରୁଲ ପଟ୍ଟୱାରୀ ଏହାର ଉଦ୍ଘାଟନ କରିଥିଲାବେଳେ ଏହାପରଠାରୁ ଉକ୍ତ କେନ୍ଦ୍ରରେ ତାଲା ଝୁଲୁଥିବା ଦେଖିବାକୁ ମିଳିଥିଲା। ୨୦୧୮ ଫେବୃୟାରୀ ୧୨ ତାରିଖରେ ବଡବିଲ ତହସିଲଦାର ଭାବେ କ୍ଷୀରୋଦ କୁମାର ବେହେରା ଯୋଗଦେଇଥିଲେ ହେଁ ଉକ୍ତ ବିତରଣ କେନ୍ଦ୍ରକୁ ଚାଲୁ କରିବା ନେଇ ଆଦୌ ଆନ୍ତରିକତା ଦେଖାଇ ନ ଥିଲେ। ଏନେଇ ଗତ କିଛି ଦିନତଳେ ତହସିଲଦାର ବେହେରାଙ୍କୁ ପଚାରିବାରୁ ସେ କେନ୍ଦ୍ର ଚାଲୁ କରିବା ନେଇ ବ୍ୟବସ୍ଥା କରିବେ ବୋଲି କହିଥିଲେ। ତେବେ ଦେଢ ବର୍ଷ ଧରି ପ୍ରଶାସନ କାର୍ଯ୍ୟକାରୀ କରିବାରେ ଫେଲ ମାରିଲା ପରେ ବୁଧବାର ଦିନ ସ୍ଥାନୀୟ ସାମାଜିକ ସଙ୍ଗଠନ ନେଟିଭ ଭଏସର ସହାୟତାରେ ପୁଣି ଚାଲୁ କରିଥିବା ଜଣାପଡିଛି। ନେଟିଭ ଭଏସର ସଦସ୍ୟମାନଙ୍କ ମଧ୍ୟରେ ସରୋଜ କୁମାର ମହାପାତ୍ର, ରସାନନ୍ଦ ବେହେରା, ପ୍ରଶାନ୍ତ ମହାନ୍ତି କେତେକ ଆଇନଜୀବୀଙ୍କ ସହ ସଙ୍ଗଠନର ସଦସ୍ୟ ଓ ମହିଳା ସମିତିର କର୍ମକର୍ତ୍ତାମାନେ ଯୋଗଦେଇଥିଲେ। ଏହି କେନ୍ଦ୍ରର ତଦାରଖ କରିବାକୁ ସହମତି ଦେଇଥିବାବେଳେ ଦାତାଙ୍କ ନାମ ଓ ଠିକଣା ଲିପିବଦ୍ଧ କରି ରଖାଯିବ ବୋଲି ନେଟିଭ ଭଉସ ତରଫରୁ ସୂଚନା ଦିଆଯାଇଛି।