ପୁରୀ ଅଫିସ, ୪ା୬: ଶୁକ୍ରବାର ଦେବସ୍ନାନ ପୂର୍ଣ୍ଣିମା। କରୋନା ପାଇଁ ଯଦିଓ ଏଥର ବିନା ଭକ୍ତରେ ସ୍ନାନଯାତ୍ରା ହେଉଛି ତଥାପି ପୋଲିସ ପକ୍ଷରୁ ଶାନ୍ତିଶୃଙ୍ଖଳା ରକ୍ଷା ଲାଗି ସ୍ବତନ୍ତ୍ର ବ୍ୟବସ୍ଥା ଗ୍ରହଣ କରାଯାଇଛି। ଗୁରୁବାର ଡିଆଇଜି ଆଶିଷ ସିଂ ପୁରୀ ଆସି ସୁରକ୍ଷା ବ୍ୟବସ୍ଥାର ତଦାରଖ କରିବା ସହିତ ବିଭିନ୍ନ ସ୍ଥାନ ବୁଲି ସ୍ଥିତି ଅନୁଧ୍ୟାନ କରିଛନ୍ତି। ପୋଲିସ ରିଜର୍ଭ କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ଡିଆଇଜି ସିଂ କହିଛନ୍ତି, ମନ୍ଦିର ପ୍ରଶାସନର ନିଷ୍ପତ୍ତି ଅନୁଯାୟୀ ପୋଲିସ ଆରେଞ୍ଜମେଣ୍ଟ ହୋଇଛି। ସ୍ନାଯାତ୍ରା ପାଇଁ ୩୮ପ୍ଲାଟୁନ ଫୋର୍ସ ମୁତୟନ କରାଯାଇଛି। ୧୫୦ ଅଫିସର ମଧ୍ୟ ନିୟୋଜିତ ଅଛନ୍ତି। ସମସ୍ତଙ୍କୁ ଡ୍ୟୁଟି ବେଳେ ସାମାଜିକ ଦୂରତ୍ୱ ରକ୍ଷା ଲାଗି କୁହାଯାଇଛି। ଯେହେତୁ ଏଥର ଭକ୍ତଙ୍କୁ ବାରଣ କରାଯାଇଛି ତେଣୁ ମନ୍ଦିର ଭିତରେ ବିଶେଷ ଆରେଞ୍ଜମେଣ୍ଟ କରାଯାଇ ନାହିଁ। ସାଧାରଣ ଦିନ ଭଳି ପୋଲିସ ବ୍ୟବସ୍ଥା ରହିବ। ନିରବଚ୍ଛିନ୍ନ ଭାବେ ୨୪ ଘଣ୍ଟିଆ ଡ୍ୟୁଟି ଥିବାରୁ ଫୋର୍ସମାନେ ୪ ସିଫ୍ଟରେ ମୁତୟନ ହେବେ। ଶ୍ରୀମନ୍ଦିର ପାର୍ଶ୍ୱବର୍ତ୍ତୀ ଓ ଆଖପାଖ ଅଞ୍ଚଳରେ ପ୍ରଶାସନ ପକ୍ଷରୁ ୧୪୪ ଧାରା ଜାରି ହୋଇଥିବାରୁ କେତେକ ସ୍ଥାନରେ ବ୍ୟାରିକେଡ କରାଯାଇଛି। ବ୍ୟାରିକେଡ ପାଖରେ ପୋଲିସମାନେ ମୁତୟନ ରହିବେ। ୧୪୪ ଧାରାକୁ କଡ଼ାକଡ଼ି ପାଳନ କରାଯିବ। ସେହିପରି ବ୍ୟାରିକେଡିଂ ଅଞ୍ଚଳରେ ୨୦ଟି କ୍ୟାମେରାରେ ଭିଡିିଓଗ୍ରାଫି ମଧ୍ୟ କରାଯିବ ବୋଲି ଡିଆଇଜି ସୂଚନା ଦେଇଛନ୍ତି।