ନୂଆଦିଲ୍ଲୀ,୧୩।୩: ଭାରତରେ କରୋନା ଭାଇରସ ସଂକ୍ରମିତଙ୍କ ସଂଖ୍ୟା ବଢିବାରେ ଲାଗିଛି। ଶୁକ୍ରବାର ସୁଦ୍ଧା ୭୫ ଜଣ କରୋନା ଭାଇରସରେ ସଂକ୍ରମିତ ହେବା ସହ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି। କର୍ନାଟକରେ ଜଣେ ୭୬ ବର୍ଷୀୟ ବ୍ୟକ୍ତିଙ୍କର କରୋନା ଭାଇରସ ସଂକ୍ରମଣରେ ମୃତ୍ୟୁ ହୋଇଥିବା କହିଛନ୍ତି କର୍ନାଟକ ସ୍ବାସ୍ଥ୍ୟମନ୍ତ୍ରୀ। କର୍ନାଟକର କାଲମୁର୍ଗିରେ ମାର୍ଚ୍ଚ ୧୦ରେ ଜଣେ ୭୬ ବର୍ଷୀୟ ବ୍ୟକ୍ତିଙ୍କର ମୃତ୍ୟୁ ହୋଇଥିବା ବେଳେ ଏବେ ତାଙ୍କ ରିପୋର୍ଟ ପଜିଟିଭ ଆସିଥିବା ଜଣାପଡିବା ପରେ ଏହା ଭାରତର ପ୍ରଥମ କରୋନା ସଂକ୍ରମିତଙ୍କ ମୃତ୍ୟୁ ବୋଲି କୁହାଯାଇଛି। ତେବେ ସଂକ୍ରମିତଙ୍କ ମଧ୍ୟରେ ୫୮ ଜଣ ଭାରତୀୟ ଥିବା ବେଳେ ୧୭ ବିଦେଶୀ ନାଗରିକ ରହିଛନ୍ତି। କେରଳରେ କେବଳ ୧୭ କରୋନା ଭାଇରସ ପଜିଟିଭ ଥିବା ଜଣାପଡିଛି। ଏମାନଙ୍କ ମଧ୍ୟରୁ ୩ ସୁସ୍ଥ ହୋଇସାରିଛନ୍ତି। ହରିୟାଣାରେ ୧୪ ଜଣ କୋଭିଡ ୧୯ ବା ନୋଭେଲ କରୋନା ଭାଇରସରେ ସଂକ୍ରମିତ ହୋଇଥିବା ବେଳେ ଦିଲ୍ଲୀରେ ୬ ମହାରାଷ୍ଟ୍ରରେ ୧୧ ଓ ଉତ୍ତର ପ୍ରଦେଶରେ ୧୦ ଜଣ ପଜିଟିଭ ଥିବା ଜଣାପଡିଛି।