ବେଙ୍ଗାଲୁରୁ,୧୭-୬: ଭାରତରେ ନିଯୁକ୍ତିର ସମସ୍ୟା ନାହିଁ, ବରଂ ଦରମା ସମସ୍ୟା ରହିଛି ବୋଲି ଇନ୍ଫୋସିସ୍ର ପୂର୍ବତନ ସିଏଫଓ ତଥା ଶୀର୍ଷ ନିବେଶକ ଟି.ଭି.ମୋହନଦାସ ପାଇ କହିଛନ୍ତି। ତାଙ୍କ ମତରେ ଦେଶରେ କମ୍ ଆୟ ହେଉଥିବା ନିଯୁକ୍ତି ସୃଷ୍ଟି ହେଉଛି, ଯାହାକୁ ଡିଗ୍ରୀଧାରୀ ଚାହୁଁନାହାନ୍ତି। ଦେଶରେ ପ୍ରକାଶ ପାଇଥିବା ବେକାରି ତଥ୍ୟକୁ ନେଇ ମଧ୍ୟ ସେ ପ୍ରଶ୍ନ ଉଠାଇଛନ୍ତି। ମିଡିଆ ସହ ଆଲୋଚନା କାଳରେ ସେ କହିଛନ୍ତି ଯେ, ଦେଶରେ ଭଲ ଚାକିରି ସୁଯୋଗ ସୃଷ୍ଟି ହେଉନାହିଁ। ୧୦-୧୫ ହଜାର ଟଙ୍କାର ଚାକିରି ସଂଖ୍ୟା ଅଧିକ। ଏହା ଡିଗ୍ରୀଧାରୀଙ୍କୁ ଆକର୍ଷିତ କରୁନାହିଁ। ସେ କହିଛନ୍ତି ଯେ, ଭାରତରେ ମଜୁରି ସମସ୍ୟା ରହିଛି, କାମ ସମସ୍ୟା ନାହିଁ। ଏହାଛଡ଼ା ଆଞ୍ଚଳିକ ତଥା ଭୌଗୋଳିକ ସମସ୍ୟା ମଧ୍ୟ ରହିଛି ବୋଲି ପାଇ ମତପ୍ରକାଶ କରିଛନ୍ତି। ଚାଇନା ଭଳି ଭାରତରେ ଶ୍ରମ ପ୍ରଧାନ ଉଦ୍ୟୋଗ ଆରମ୍ଭ ହେବା ଆବଶ୍ୟକ ଏବଂ ବନ୍ଦର ନିକଟରେ ଭିତ୍ତିଭୂମି ନିର୍ମାଣ ହେବା ଉଚିତ୍ ବୋଲି ସେ ପରାମର୍ଶ ଦେଇ କହିଛନ୍ତି। ନିଯୁକ୍ତି ପାଇବା ଲାଗି ଆଗ୍ରହୀ ଯୁବବର୍ଗଙ୍କ ଆକାଂକ୍ଷା ପୂରଣ କରିବାକୁ ହେଲେ ହାଇଟେକ ଗବେଷଣା ଏବଂ ଉନ୍ନୟନ ଦିଗରେ ଅଧିକ ନିବେଶ କରିବାକୁ ହେବ ବୋଲି ସେ ସ୍ପଷ୍ଟ କରିଛନ୍ତି। ଚାଇନାର ଉଦାହରଣ ଦେଇ ସେ କହିଛନ୍ତି ଯେ, ପଡ଼ୋଶୀ ଦେଶ ଶ୍ରମ ପ୍ରଧାନ ଉଦ୍ୟୋଗ ସ୍ଥାପନ କରି ବିଦେଶୀଙ୍କୁ ସେମାନଙ୍କ ଶ୍ରମର ବ୍ୟବହାର କରିବାକୁ ନିମନ୍ତ୍ରଣ କଲା। ଅନ୍ୟପକ୍ଷରେ ଭାରତ ଏଥିପ୍ରତି ଗୁରୁତ୍ୱ ଦେଲା ନାହିଁ। ଏ ଦିଗରେ ଆମର ଠିକ୍ ନୀତି ନାହିଁ ବୋଲି ପାଇ କହିଛନ୍ତି।