ନୂଆଦିଲ୍ଲୀ,୫।୩: ଭାରତରେ କରୋନା ଭାଇରସ୍ ଆକ୍ରାନ୍ତଙ୍କ ସଂଖ୍ୟା ବଢ଼ି ୨୯ରେ ପହଞ୍ଚିଛି। ଏମାନଙ୍କ ମଧ୍ୟରେ ୧୬ ଇଟାଲୀ ପର୍ଯ୍ୟଟକ ଅଛନ୍ତି ବୋଲି ସ୍ବାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ ବୁଧବାର ପ୍ରକାଶ କରିଛନ୍ତି। ବାହାର ଦେଶରୁ ଭାରତକୁ ଆସୁଥିବା ପ୍ରତ୍ୟେକ ଯାତ୍ରୀଙ୍କୁ ବିମାନବନ୍ଦରଗୁଡ଼ିକରେ କଡ଼ା ଯାଞ୍ଚ କରାଯାଉଥିବା ସେ କହିଛନ୍ତି। ଦିଲ୍ଲୀର ମୟୂରବିହାରରେ ଜଣେ ଯୁବକ(୪୫), ଆଗ୍ରାରେ ଥିବା ତାଙ୍କର ୬ ସମ୍ପର୍କୀୟ କରୋନା ଭାଇରସ୍ରେ ଆକ୍ରାନ୍ତ ହେବା ପରେ ସେମାନଙ୍କୁ ସଫଦର୍ଗଞ୍ଜ ହସ୍ପିଟାଲରେ ଚିକିତ୍ସା କରାଯାଉଛି। ହାଇଦ୍ରାବାଦର ଜଣେ ଯୁବକ (୨୪)ଙ୍କଠାରେ ଏହି ଭୂତାଣୁ ଚିହ୍ନଟ କରାଯିବା ପରେ ତାଙ୍କୁ ଅଲଗା କରାଯାଇ ସ୍ବତନ୍ତ୍ର ଚିକିତ୍ସା କରାଯାଉଛି। ଇଟାଲିରୁ ଆସିଥିବା ୧୬ ଜଣିଆ ପର୍ଯ୍ୟଟକ ଦଳ ଓ ସେମାନଙ୍କ ସହ ଥିବା ଭାରତୀୟ ଡ୍ରାଇଭର କରୋନା ଆକ୍ରାନ୍ତ ଅଛନ୍ତି। ସେହିଭଳି ଜୟପୁରରେ ଇଟାଲୀୟ ଦମ୍ପତି କରୋନା ଆକ୍ରାନ୍ତ ହୋଇ ଏସ୍ଏମ୍ଏସ୍ ହସ୍ପିଟାଲରେ ଚିକିତ୍ସିତ ହେଉଛନ୍ତି। ବୁଧବାର ରାତିରେ ଗୁରୁଗ୍ରାମସ୍ଥିତ ପେଟିଏମ୍ ଅଫିସ୍ର ଜଣେ କର୍ମଚାରୀ କରୋନା ସଂକ୍ରମିତ ହୋଇଥିବା ଜଣାପଡିଛି। ପୂର୍ବରୁ କେରଳରେ ଚିହ୍ନଟ ହୋଇଥିବା ୩ କରୋନା ଭାଇରସ୍ ରୋଗୀଙ୍କୁ ଚିକିତ୍ସା ପରେ ଛାଡ଼ି ଦିଆଯାଇଛି। ସ୍ବାସ୍ଥ୍ୟ ମନ୍ତ୍ରଣାଳୟ ରିପୋର୍ଟରେ ତେଲଙ୍ଗାନାରେ ୨ ଆକ୍ରାନ୍ତ ଥିବା ସନ୍ଦେହ କରାଯାଉଛି। ଚାଇନା, ଦକ୍ଷିଣ କୋରିଆ, ଜାପାନ, ଇରାନ ଆଦି ଦେଶରେ କରୋନା ଉଗ୍ରରୂପ ଧାରଣ କରିଥିବା ବେଳେ ଭାରତରେ ସ୍ଥିତି କ୍ରମଶଃ ଜଟିଳ ଆଡ଼କୁ ଗତିକରୁଛି। ରାଜଧାନୀ ଦିଲ୍ଲୀ-ଏନ୍ସିଆର୍ରେ ସ୍କୁଲଗୁଡ଼ିକୁ ଏଥିଲାଗି ଛୁଟି ଘୋଷଣା କରାଯାଇଛି। କେତେକ ସ୍କୁଲ କରୋନା ସ୍ଥିତିକୁ ଦେଖି ଆଗୁଆ ଛୁଟି ଘୋଷଣା କରାଯାଇଛି। କେନ୍ଦ୍ର ସରକାରଙ୍କ ପକ୍ଷରୁ ଏନେଇ ବ୍ୟାପକ ପ୍ରସ୍ତୁତି କରାଯିବା ସହ ବିମାନ ବନ୍ଦରଗୁଡ଼ିକରେ ଯାଞ୍ଚ୍ କଡ଼ାକଡ଼ି କରାଯାଇଛି। ୨୧ ବିମାନ ବନ୍ଦରରେ ପ୍ରାୟ ୬ ଲକ୍ଷ ଲୋକଙ୍କୁ ଯାଞ୍ଚ କରାଯାଇଥିବା ରିପୋର୍ଟ ମିଳିଛି। ମାସ୍କ, ମେଡିସିନ ଓ ଚିକିତ୍ସା ସୁବିଧା ସହ ସ୍ଥିତି ଯାଞ୍ଚ କରାଯାଉଥିବା ସେ କହିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୈନିକ ବିଭାଗୀୟ ଅଧିକାରୀଙ୍କ ସହ ଆଲୋଚନା କରୁଛନ୍ତି। ବିଭିନ୍ନ ରାଜ୍ୟ ସରକାର ଏନେଇ ପ୍ରସ୍ତୁତ ରହିବା ଲାଗି ପରାମର୍ଶ ଦିଆଯାଇଛି। ଜନଗହଳିପୂର୍ଣ୍ଣ ଅଞ୍ଚଳରୁ ଦୂରେଇ ରହିବା ଓ ଶାରୀରିକ ଯୋଗାଯୋଗ ବିଚ୍ଛିନ୍ନ କରିବା ଲାଗି ସେ ଲୋକମାନଙ୍କୁ ପରାମର୍ଶ ଦେଇଛନ୍ତି। ସିବିଏସ୍ଇ ପରୀକ୍ଷା ଚାଲିଥିବା ବେଳେ ପରୀକ୍ଷାର୍ଥୀଙ୍କୁ ଏଥିଲାଗି ପ୍ରତିଷେଧକ ସାମଗ୍ରୀ ନେବା ଲାଗି ବୋର୍ଡ ସଚିବ ଅନୁରାଗ ତ୍ରିପାଠୀ ପରାମର୍ଶ ଦେଇଛନ୍ତି। ଫେସ୍ ମାସ୍କ, ସାନିଟାଇଜର ବ୍ୟବହାର ଲାଗି ସେ ଗୁରୁତ୍ୱାରୋପ କରିଛନ୍ତି।
ମିଡିଆକୁ ସମ୍ବୋଧନ କରି ସ୍ବାସ୍ଥ୍ୟମନ୍ତ୍ରୀ କହିଛନ୍ତି, ସ୍ବାସ୍ଥ୍ୟ ଅଧିକାରୀଙ୍କ ସହ ବିଭିନ୍ନ ମନ୍ତ୍ରଣାଳୟ ଏନେଇ ସତର୍କ ଅଛନ୍ତି। ୪୨ ପରୀକ୍ଷାଗାରରେ ଏବେ କରୋନା ଭାଇରସ୍ ଯାଞ୍ଚ୍ କରାଯାଉଛି। ଇରାନ୍ରେ କରୋନା ଆକ୍ରାନ୍ତ ଭାରତୀୟଙ୍କ ଲାଗି ପରୀକ୍ଷାଗାର ଓ ଅନ୍ୟାନ୍ୟ ସୁବିଧା ଯୋଗାଇ ଦିଆଯିବ ବୋଲି ସେ ମତବ୍ୟକ୍ତ କରିଛନ୍ତି। ବିଶ୍ୱବ୍ୟାପୀ କରୋନା ମୃତ୍ୟୁସଂଖ୍ୟା ୩,୧୨୩ରେ ପହଞ୍ଚିଥିବା ବେଳେ ଚାଇନାରେ ୨,୯୮୧, ଇରାନରେ ୭୭ ଲୋକଙ୍କ ପ୍ରାଣହାନି ଘଟିଲାଣି। ମୋଟ ଆକ୍ରାନ୍ତଙ୍କ ସଂଖ୍ୟା ବୃଦ୍ଧିପାଇ ୯୧,୭୮୩ ଛୁଇଁଲାଣି। ପ୍ରକାଶଥାଉ କି, ବିଶ୍ୱରେ ୬୬ ଦେଶକୁ କରୋନା ପ୍ରଭାବିତ ହୋଇସାରିଲାଣି।
ବିଶ୍ୱ ସ୍ବାସ୍ଥ୍ୟ ସଂଗଠନ(ଡବ୍ଲ୍ୟୁଏଚ୍ଓ) ପକ୍ଷରୁ ଏନେଇ ଗଭୀର ଚିନ୍ତା ବ୍ୟକ୍ତ କରାଯାଇଛି। ବିଶେଷକରି ଦକ୍ଷିଣ-ପୂର୍ବ ଏସିଆରେ ସ୍ଥିତି ଜଟିଳ ହେଉଥିବାରୁ କଡ଼ା ପଦକ୍ଷେପ ଗ୍ରହଣ କରାଯିବାର ଆବଶ୍ୟକତା ରହିଛି ବୋଲି ସଂଗଠନର ଆଞ୍ଚଳିକ ନିର୍ଦ୍ଦେଶକ ଡ. ପୁନମ୍ କ୍ଷେତ୍ରପାଲ ସିଂ ଦର୍ଶାଇଛନ୍ତି। ଭାରତ, ମାଲେସିଆ, ଇଣ୍ଡୋନେସିଆ ଭଳି ଦେଶରେ ଏହା କାୟାବିସ୍ତାର କରିବାର ଆଶଙ୍କା ଥିବା ସେ ପ୍ରକାଶ କରିଛନ୍ତି। ଫ୍ଲୁ ଠାରୁ ଧୀରେ ଧୀରେ ଏହା ବ୍ୟାପୁଥିଲେ ହେଁ କରୋନା ସବୁଠାରୁ ମାରାତ୍ମକ ବୋଲି ସେ ଚେତାଇଛନ୍ତି। ଜ୍ୱର, କାଶ, କଫ, ନିଃଶ୍ୱାସ ପ୍ରଶ୍ୱାସ ନେବାରେ କଷ୍ଟ ଅନୁଭବ କରିବା ଏହାର ପ୍ରାରମ୍ଭିକ ସୂଚନା ଦେଇଥାଏ। ସଚେତନତା, ଆତ୍ମସୁରକ୍ଷା ଓ ଡାକ୍ତରୀ ଚିକିତ୍ସା ସହ ବ୍ୟାପକ ପ୍ରସ୍ତୁତି ଏଥିଲାଗି ଆବଶ୍ୟକ ବୋଲି ଡବ୍ଲ୍ୟୁଏଚ୍ଓ ପକ୍ଷରୁ ପରାମର୍ଶ ଦିଆଯାଇଛି।