ନୂଆଦିଲ୍ଲୀ,୧୯ା୧(ପି.ଟି.): ଦେଶରେ ଆତ୍ମହତ୍ୟା ପ୍ରବଣତା ବୃଦ୍ଧି ପାଉଛି। ୨୦୧୮ରେ ଦୈନିକ ହାରାହାରି ୩୫ ଜଣ ବେରୋଜଗାରୀ ଓ ୩୬ଜଣ ଆତ୍ମନିଯୁକ୍ତି ପାଇଥିବା ବ୍ୟକ୍ତି ପ୍ରାଣ ହରାଇଛନ୍ତି। ସେହିବର୍ଷ ମୋଟ ୨୬,୦୮୫ ଜଣ ବେରୋଜଗାରୀ ଓ ଆତ୍ମନିଯୁକ୍ତ ବ୍ୟକ୍ତି ଜୀବନ ହାରିଥିବା ଜାତୀୟ ଅପରାଧ ରେକର୍ଡ ବ୍ୟୁରୋ (ଏନ୍ସିଆର୍ବି) ତଥ୍ୟରୁ ଜଣାପଡିଛି। ସେହିବର୍ଷ ୧୨,୯୩୬ ଜଣ ବେରୋଜଗାରୀ ଓ ୧୩,୧୪୯ ଜଣ ଆତ୍ମନିଯୁକ୍ତ ଆତ୍ମହତ୍ୟା କରିଥିବାବେଳେ ଚାଷୀ ଆତ୍ମହତ୍ୟା ସଂଖ୍ୟା ଥିଲା ୧୦,୩୪୯।
ଏନ୍ସିଆର୍ବି ରିପୋର୍ଟ ଅନୁଯାୟୀ ୨୦୧୮ରେ ଦେଶରେ ମୋଟ ୧,୩୪,୫୧୬ ଜଣ ଆତ୍ମହତ୍ୟା କରିଥିଲେ, ଯାହାକି ପୂର୍ବବର୍ଷ ତୁଳନାରେ ୩.୬ ପ୍ରତିଶତ ଅଧିକ ଥିଲା। ସେହିପରି ପ୍ରତି ୧ ଲକ୍ଷ ଲୋକସଂଖ୍ୟାରେ ଆତ୍ମହତ୍ୟା ହାର ୨୦୧୭ ତୁଳନାରେ ୨୦୧୮ରେ ୦.୩ ପ୍ରତିଶତ ବୃଦ୍ଧି ପାଇଥିଲା। ସେହିବର୍ଷ ମୋଟ ୪୨,୩୯୧ ଜଣ ମହିଳା ଆତ୍ମହତ୍ୟା କରିଥିବାବେଳେ ସେମାନଙ୍କ ମଧ୍ୟରେ ଗୃହିଣୀ ଥିଲେ ୨୨,୯୩୭ ଜଣ ଅର୍ଥାତ୍ ୫୪.୧ ପ୍ରତିଶତ। ସରକାରୀ କର୍ମଚାରୀଙ୍କ ଆତ୍ମହତ୍ୟା ୧.୩ ପ୍ରତିଶତ (୧୭୦୭) ହୋଇଥିବାବେଳେ ଘରୋଇ ସେକ୍ଟର କର୍ମଚାରୀଙ୍କ ଆତ୍ମହତ୍ୟା ହାର ଥିଲା ୬.୧ପ୍ରତିଶତ (୮୨୪୬)। ରାଷ୍ଟ୍ରାୟତ୍ତ ଉଦ୍ୟୋଗରୁ ୨୦୨୨ ଜଣ ଆତ୍ମହତ୍ୟା କରିଥିଲେ। ଛାତ୍ରୀଛାତ୍ର ଓ ବେରୋଜଗାରୀଙ୍କ ଆତ୍ମହତ୍ୟା ହାର ଥିଲା ଯଥାକ୍ରମେ ୭.୬ ଓ ୯.୬ ପ୍ରତିଶତ। ଅର୍ଥାତ୍ ୨୦୧୮ରେ ୧୦,୧୫୯ ଜଣ ଛାତ୍ରୀଛାତ୍ର ଓ ୧୨,୯୩୬ ଜଣ ବେରୋଜଗାରୀ ଜୀବନ ହାରିଥିଲେ। ଆତ୍ମନିଯୁକ୍ତଙ୍କ ଆତ୍ମହତ୍ୟା ହାର ୯.୮ ପ୍ରତିଶତ (୧୩,୧୪୯) ଥିଲା।
୨୦୧୮ରେ କୃଷି ସେକ୍ଟରରେ ସମୁଦାୟ ୧୦,୩୪୯ ଜଣ ଆତ୍ମହତ୍ୟା କରିଥିବାବେଳେ ସେମାନଙ୍କ ମଧ୍ୟରୁ ୫୭୬୩ ଜଣ କୃଷକ ଓ ୪୫୮୬ ଜଣ କୃଷି ଶ୍ରମିକ ବୋଲି ଜଣାପଡିଛି। ମୋଟ ଆତ୍ମହତ୍ୟାରେ ସେମାନଙ୍କ ହାର ୭.୭ ପ୍ରତିଶତ ବୋଲି ଏନ୍ସିଆର୍ବି ରିପୋର୍ଟରେ କୁହାଯାଇଛି। ରାଜ୍ୟ ଅନୁଯାୟୀ ଦେଖିଲେ ମହାରାଷ୍ଟ୍ରରେ ସର୍ବାଧିକ ୧୭,୯୭୨ ଜଣ ଆତ୍ମହତ୍ୟା କରିଥିବାବେଳେ ଏହା ପଛକୁ ରହିଛି ତାମିଲନାଡୁ (୧୩,୮୯୬), ପଶ୍ଚିମବଙ୍ଗ (୧୩,୨୫୫), ମଧ୍ୟପ୍ରଦେଶ (୧୧,୭୭୫), କର୍ନାଟକ (୧୧,୫୬୧)। ମୋଟ ଆତ୍ମହତ୍ୟା କରିଥିବା ବ୍ୟକ୍ତିଙ୍କ ମଧ୍ୟରୁ ୫୦.୯ ପ୍ରତିଶତ ଏହି ୫ ରାଜ୍ୟର ବୋଲି ରିପୋର୍ଟରୁ ଜଣାପଡିଛି।