ବାଲେଶ୍ୱର ଅଫିସ, ୩୧।୮-ବାଲେଶ୍ୱର ପୌରାଞ୍ଚଳ କାର୍ଯ୍ୟାଳୟରେ ପିଅନ ଭାବେ କାର୍ଯ୍ୟ କରୁଥିବା ରାକେଶ କୁମାର ପଣ୍ଡା(୪୫) ନାମକ ଜଣେ ଦିବ୍ୟାଙ୍ଗ ଦୈନିକ ୧୧୬ ଟଙ୍କାରେ ଦୀର୍ଘ ୮ବର୍ଷ ଧରି କାର୍ଯ୍ୟ କରିଆସୁଛନ୍ତି। ତାଙ୍କର ଚୁକ୍ତିଭିତ୍ତିକ ଚାକିରି ନିଯୁକ୍ତିରୁ ସରକାରୀ ହେବାକୁ ନେଇ ଦିବ୍ୟାଙ୍ଗ ଜଣକ ବାରମ୍ବାର ଏ ଅଫିସ୍ରୁ ସେ ଅଫିସ୍ ଦୌଡି ଦୌଡି ନୟାନ୍ତ ହୋଇପଡ଼ିଛନ୍ତି। ମାତ୍ର ଏତିକି ଟଙ୍କାରେ ନିଜର ପରିବାର ଚଳାଇବା କଷ୍ଟକର ହୋଇପଡୁଥିବାରୁ ସେ ଚାକିରି ଛାଡ଼ି ଦାଦନ ଖଟିବା ପାଇଁ ବାହାରକୁ ଯିବାର ମନସ୍ଥ କରିଛନ୍ତି।
ବାଲେଶ୍ୱର ଜିଲା ଖନ୍ତାପଡ଼ା ଥାନା ବାସୁବ୍ରହ୍ମପୁର ଗ୍ରାମର ରାକେଶ ଶତପ୍ରତିଶତ ଶାରୀରିକ ଅକ୍ଷମ। ଗତ ୨୦୧୨ ଅକ୍ଟୋବର ୩୦ ତାରିଖ ଶାରୀରିକ ଭିନ୍ନକ୍ଷମ କୋଟାରେ ବାଲେଶ୍ୱର ପୌରାଞ୍ଚଳ କାର୍ଯ୍ୟାଳୟରେ ଚୁକ୍ତିଭିତ୍ତିକ ନିଯୁକ୍ତି ପାଇଥିଲେ। ଅଦ୍ୟାବଧି ମାସିକ ୪ହଜାର ୪୪୦ ଟଙ୍କା ଦରମା ପାଉଥିବା ବେଳେ ଇପିଏଫ୍ ଓ ଇଏସ୍ଆଇରେ ୯୪୦ ଟଙ୍କା କଟୁଥିବା କର୍ତ୍ତୃପକ୍ଷ କହୁଥିବା ବେଳେ କୌଣସି ରସିଦ୍ ମିଳୁ ନାହଁି। ଏପରି ଅବସ୍ଥାରେ ଦୀର୍ଘ ୮ବର୍ଷ ଧରି ସରକାରୀ ଅଧିକାରୀଙ୍କ ନିର୍ଦ୍ଦେଶରେ କାର୍ଯ୍ୟ କରିଆସୁଥିଲେ ମଧ୍ୟ ତାଙ୍କୁ ବିଧିବଦ୍ଧ ଭାବେ ସରକାରୀ କର୍ମଚାରୀ ଭାବେ ନିଯୁକ୍ତି ଦେବା ପାଇଁ କେହି ସହଯୋଗ କରୁ ନାହାନ୍ତି। ସମାଜ ମଙ୍ଗଳ ବିଭାଗର ଅତିରିକ୍ତ ସଚିବ ଅଶୋକ କୁମାର ଭୂୟାଁ ଗତ ୨୦୧୬ ମେ’ ୭ ତାରିଖରେ ଜିଲାରେ କାର୍ଯ୍ୟରତ ଥିବା ଚୁକ୍ତିଭିତ୍ତିକ ଭାବରେ କାର୍ଯ୍ୟ କରୁଥିବା ଭିନ୍ନକ୍ଷମଙ୍କ ତାଲିକା ଜିଲା ସମାଜ ମଙ୍ଗଳ ଅଧିକାରୀଙ୍କୁ ମାଗିଥିଲେ ମଧ୍ୟ ଏପର୍ଯ୍ୟନ୍ତ ପଠା ଯାଇ ନ ଥିବାର ଜଣାପଡ଼ିଛି। ଫଳରେ ଜିଲାରେ କାର୍ଯ୍ୟରତ ୫ଜଣ ଦିବ୍ୟାଙ୍ଗ କର୍ମଚାରୀ ଆଜି ଯାଏଁ ଏଭଳି ଅସୁବିଧାର ସମ୍ମୁଖୀନ ହେଉଥିବା ରାକେଶ ଅଭିଯୋଗ କରିଛନ୍ତି।
ଏ ସମ୍ପର୍କରେ ଜିଲା ସମାଜମଙ୍ଗଳ ଅଧିକାରୀ ସନ୍ତୋଷ କୁମାର ସାବତ କହିଛନ୍ତି, ଉପରୋକ୍ତ ନିଯୁକ୍ତି ପାଇଥିବା ସମ୍ପର୍କରେ ଅବଗତ ଥିବା ସହ ସେମାନଙ୍କର ସମସ୍ତ ଅଫିସ୍ କାଗଜପତ୍ରକୁ କାର୍ଯ୍ୟ କରୁଥିବା ବିଭାଗକୁ ପଠାଇ ଦିଆଯାଇଛି। ଏହାପରେ ମଧ୍ୟ ସେମାନଙ୍କର ଆର୍ଥିକ ଅଭାବକୁ ଲକ୍ଷ୍ୟ ରଖି ପୁନର୍ବାର ବିଭାଗୀୟ ଅଧିକାରୀଙ୍କ ସହ ଆଲୋଚନା କରି ସମସ୍ୟା ସମାଧାନ ନିମନ୍ତେ ଚେଷ୍ଟା କରିବେ।