ବାଲିପାଟଣା, ୭ା୩(ଡି.ଏନ୍.ଏ.): ପାରମ୍ପରିକ ଦୋପଟି ମେଳଣ ବାଲିପାଟଣାସ୍ଥିତ ମେଲଣ ପଡିଆରେ ଶୁକ୍ରବାର ଅନୁଷ୍ଠିତ ହୋଇଯାଇଛି। ବିଧି ଅନୁଯାୟୀ ଥାନପତି ବୁଦ୍ଧନାଥ ଦେବଙ୍କ ପକ୍ଷରୁ ସ୍ଥାନୀୟ ଅଞ୍ଚଳର ଠାକୁରଙ୍କୁ ମେଳଣ ଯାତ୍ରାକୁ ଆସିବାକୁ ନିମନ୍ତ୍ରଣ ଦିଆଯାଇଥିଲା। ଥାନାପତିଙ୍କ ନିମନ୍ତ୍ରଣ ରକ୍ଷାକରି ଏକାଦଶୀ ତିଥିରେ ଦୋଳ ବିମାନରେ ବିଭିନ୍ନ ଅଞ୍ଚଳର ଠାକୁରମାନେ ସଜ୍ଜିତ ହୋଇ ପଟୁଆରରେ ଆସିଥିଲେ। ପୂର୍ବରୁ ମେଳଣ ପଡ଼ିଆରେ ଉପସ୍ଥିତ ବୁଦ୍ଧନାଥଙ୍କ ଆସ୍ଥାନ ନିକଟରୁ ଦୁଇପାର୍ଶ୍ୱକୁ ଠାକୁରମାନେ ଶୁକ୍ରବାର ପ୍ରତ୍ୟୁଷରୁ ଆସି ନିଜ ସ୍ଥାନ ଅଳଙ୍କୃତ କରିଥିଲେ। ପୂଜାର୍ଚ୍ଚନା ପରେ ଶ୍ରଦ୍ଧାଳୁଙ୍କ ଭିଡ଼ ଜମିଥିଲା। ପ୍ରାୟ ରାତ୍ର ୮ଟାରେ ହରିହର ଭେଟ ହୋଇଥିଲା। ଶ୍ରଦ୍ଧାଳୁଙ୍କ ଭିଡ଼କୁ ଦୃଷ୍ଟିରେ ରଖି ପୋଲିସ ପ୍ରଶାସନ ପକ୍ଷରୁ ଟ୍ରାଫିକ୍ ନୟନ୍ତ୍ରଣ ବ୍ୟବସ୍ଥା କରାଯାଇଥିଲା। ହୁଳହୁଳି, ହରିବୋଲ ଓ ଘଣ୍ଟରେ ମେଳଣ ପଡିଆ ପ୍ରକମ୍ପିତ ହେବା ଏକ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଥିଲା। ବୁଦ୍ଧନାଥ ଦେବଙ୍କ ବଡପଣ୍ଡା ଚନ୍ଦ୍ରଶେଖର ପଣ୍ଡା କୁହନ୍ତି, ଏ ମେଳଣ ଥାନପତି ବୁଦ୍ଧନାଥ ଦେବଙ୍କ ନିର୍ଦ୍ଦେଶରେ ଆମ ଅଞ୍ଚଳରେ ପ୍ରଥମ କରି କରାଯାଏ। ଆଖପାଖ ଅଞ୍ଚଳର ହଜାର ହଜାର ଶ୍ରଦ୍ଧାଳୁଙ୍କ ଭିଡ଼ ହୋଇଥାଏ। ଭିଡ କମିଲେ ଠାକୁରମାନେ ତାଙ୍କ ଆବାସସ୍ଥଳକୁ ଭେଟଭାଟ ହୋଇ ଫେରିଯାଇଥିଲେ। ଏହି ମେଳଣ ବହୁ ପୁରାତନ।
