ଓ୍ବାଶିଂଟନ,୫ା୩: ଆମେରିକା ରାଷ୍ଟ୍ରପତି ନିର୍ବାଚନରେ ପ୍ରାର୍ଥୀ ହେବା ପାଇଁ ଉଦ୍ଦିଷ୍ଟ ଡେମୋକ୍ରାଟିକ୍ ପ୍ରାଇମେରି ପ୍ରସେସ୍ ‘ସୁପର ଟ୍ୟୁଜ୍ଡେ’ ଦୁର୍ବଳ ପ୍ରଦର୍ଶନ ପରେ ଦୌଡ଼ରୁ ଓହରିଯାଇଛନ୍ତି ବିଲିଅନାରି ବିଜନେସମ୍ୟାନ୍ ମାଇକ୍ ବ୍ଲୁମ୍ବର୍ଗ। ସେ ପ୍ରତିଦ୍ୱନ୍ଦ୍ୱିତାରୁ ହଟିଯିବା ସହ ବର୍ତ୍ତମାନ ଦୌଡ଼ରେ ଆଗୁଆ ଥିବା ପୂର୍ବତନ ଉପରାଷ୍ଟ୍ରପତି ଜୋ ବିଡେନଙ୍କୁ ସମର୍ଥନ କରିଥିବା ଘୋଷଣା କରିଛନ୍ତି ନ୍ୟୁୟର୍କର ପୂର୍ବତନ ମେୟର ବ୍ଲୁମ୍ବର୍ଗ।
ତିନିମାସ ପୂର୍ବେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କୁ ହରାଇବା ପାଇଁ ମୁଁ ଏହି ଦୌଡ଼ରେ ସାମିଲ ହୋଇଥିଲି। ଆଜି ମୁଁ ସେହି ଟ୍ରମ୍ପ୍ଙ୍କୁ ହରାଇବା ପାଇଁ ରାଷ୍ଟ୍ରପତି ପଦ ଦୌଡ଼ରୁ ଓହରିଯାଉଛି। କାରଣ ମୁଁ ଭଲ ଭାବେ ଜାଣିଛି ଯେ, ଦୌଡ଼ରେ ଲକ୍ଷ୍ୟ ହାସଲ ଅଧିକ କଠିନ ହୋଇପଡ଼ିବ ବୋଲି ବ୍ଲୁମ୍ବର୍ଗ ନିଜ ସମର୍ଥକମାନଙ୍କୁ ଇ-ମେଲ୍ କରି ଜଣାଇଥିଲେ। ଏହାର କିଛି ମିନିଟ ପରେ ସେ ଜୋ ବିଡେନଙ୍କ ପ୍ରାର୍ଥତ୍ତ୍ୱକୁ ସମର୍ଥନ ଘୋଷଣା କରିଥିଲେ। ବିଡେନଙ୍କୁ ଆମେରିକାର ପରବର୍ତ୍ତୀ ରାଷ୍ଟ୍ରପତି କରିବା ଲାଗି ସେ କାର୍ଯ୍ୟ କରିବେ ବୋଲି ଏକ ବିବୃତିରେ କହିଛନ୍ତି। ପ୍ରଚାର ବେଳେ ୫୦୦ ବିଲିୟନ୍ ଡଲାରୁ ଊର୍ଦ୍ଧ୍ୱ ଖର୍ଚ୍ଚ କରିଥିବା ବ୍ଲୁମବର୍ଗ ‘ସୁପର ଟ୍ୟୁଜ୍ଡେ’ର ଆମେରିକାନ୍ ସାମୋଆରେ ଆଗରେ ଥିବାବେଳେ ତାଙ୍କ ପ୍ରଦର୍ଶନକୁ ଟ୍ରମ୍ପ୍ ଟ୍ରୋଲ୍ କରିଥିଲେ। ବିଳମ୍ବରେ ଦୌଡ଼ରେ ପ୍ରବେଶ କରିଥିବା ଏହି କୋଟିପତି ବ୍ୟବସାୟୀ ଶେଷରେ ବ୍ୟୟବହୁଳ ପ୍ରତିଦ୍ୱନ୍ଦ୍ୱିତାରୁ ବିଦାୟ ନେଇଛନ୍ତି।
