ଭୁବନେଶ୍ୱର, ୮।୫(ବ୍ୟୁରୋ): ପଶ୍ଚିମବଙ୍ଗ ପରେ ଏବେ ସୁରଟ ଫେରନ୍ତା ରାଜ୍ୟ ସରକାରଙ୍କ ଚିନ୍ତା ବଢ଼ାଇ ଦେଇଛନ୍ତି। ଏମାନଙ୍କ ପାଇଁ ୧୩ ଦିନ ଭିତରେ ରାଜ୍ୟରେ ଆକ୍ରାନ୍ତଙ୍କ ସଂଖ୍ୟା ଦ୍ୱିଗୁଣିତ ହୋଇଛି। ଏପ୍ରିଲ୍ ୨୫ରେ ଓଡ଼ିଶାରେ ଆକ୍ରାନ୍ତଙ୍କ ସଂଖ୍ୟା ୧୦୦ ଛୁଇଁଥିବାବେଳେ ମେ ୭ ଅର୍ଥାତ୍ ଗୁରୁବାର ଏହା ୨୧୯ରେ ପହଞ୍ଚତ୍ଛି।
ହସ୍ତଗତ ସୂଚନାନୁସାରେ, ମାର୍ଚ୍ଚ ଶେଷ ଆଡକୁ ପଶ୍ଚିମବଙ୍ଗରୁ ପ୍ରବାସୀମାନେ ଲୁଚିଛପି ଓଡ଼ିଶା ଫେରିବା ଆରମ୍ଭ କରିଥିଲେ। ସେମାନେ ନିୟମ ନ ମାନି ମନଇଚ୍ଛା ବୁଲିବା ଓ ମିଳାମିଶା କରିଥିଲେ। ସେମାନଙ୍କୁ ଚିହ୍ନଟ କରିବା ପୂର୍ବରୁ ସଂକ୍ରମଣ ଢ଼େର୍ ବଢ଼ି ସାରିଥିଲା। ଫଳରେ ରାଜ୍ୟରେ ଏକପ୍ରକାର ନିୟନ୍ତ୍ରଣରେ ଥିବା କରୋନା ହଠାତ୍ ୧୦୦ ଡେଇଁଥିଲା। ତା’ପରଠାରୁ ଲଗାତର ଚିହ୍ନଟ ହେଉଥିବା ଆକ୍ରାନ୍ତଙ୍କ ମଧ୍ୟରେ ଅଧିକ ପଶ୍ଚିମବଙ୍ଗ ଫେରନ୍ତା ଚିହ୍ନଟ ହୋଇ ଆସୁଥିବାବେଳେ ଏବେ ସୁରଟ ଫେରନ୍ତା ସ୍ଥିତିକୁ ଜଟିଳ କରିବାରେ ଲାଗିଛି। ମାତ୍ର କେଇଟା ଦିନରେ ଆକ୍ରାନ୍ତଙ୍କ ସଂଖ୍ୟା ୨ଶହ ଡେଇଁଛି। ଗତ ୩ ଦିନରେ ୩୯ଜଣ ସୁରଟ ଫେରନ୍ତା ପଜିଟିଭ୍ ଚିହ୍ନଟ ହୋଇଥିବାବେଳେ ୨୮ଜଣ କେବଳ ଗଞ୍ଜାମ ଜିଲାର ରହିଛନ୍ତି। ସେହିପରି ଜଗତ୍ସିଂହପୁରରୁ ଚିହ୍ନଟ ୪, କଟକରୁ ଜଣେ, ମୟୂରଭଞ୍ଜର ୪ ଓ ବାଲେଶ୍ୱର ଜିଲାର ୨ଜଣ ଆକ୍ରାନ୍ତ ସୁରଟ ଫେରନ୍ତା ବୋଲି ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ସୂଚନା ମିଳିଛି।
ଉଲ୍ଲେଖଯୋଗ୍ୟ, ପ୍ରଥମେ ବିଦେଶ ଫେରନ୍ତା, ପରେ ନିଜାମୁଦ୍ଦିନ ଓ ତା’ପରେ ପଶ୍ଚିମବଙ୍ଗ (କୋଲକାତା) ଫେରନ୍ତା ରାଜ୍ୟ ସରକାରଙ୍କ ଚିନ୍ତା ବଢ଼ାଇଥିବାବେଳେ ଏବେ ସୁରଟ ଫେରନ୍ତା ମୁଣ୍ଡ ବିନ୍ଧାର କାରଣ ପାଲଟିଛନ୍ତି। କୋଲକାତା ଫେରନ୍ତା ଓ ସେମାନଙ୍କ ସଂସ୍ପର୍ଶରେ ଆସି ଯାଜପୁରରେ ୫୫ଜଣ ଆକ୍ରାନ୍ତ ହୋଇଥିବାବେଳେ ବାଲେଶ୍ୱର ଓ ଭଦ୍ରକରେ ମଧ୍ୟ ସଂଖ୍ୟା ବଢ଼ି ଚାଲିଛି। ଗଞ୍ଜାମକୁ ବହୁ ସଂଖ୍ୟାରେ ପ୍ରବାସୀ ଓଡ଼ିଆ ସୁରଟରୁ ଫେରୁଥିବାବେଳେ ଆଗକୁ ଏହି ସଂଖ୍ୟା ବଢ଼ିବା ଆଶଙ୍କାକୁ ଏଡ଼ାଇ ଦିଆଯାଇ ନ ପାରେ ବୋଲି ଏବେ ସାଧାରଣରେ ଆଲୋଚନା ହେଉଛି। ବାହାର ରାଜ୍ୟ ଫେରନ୍ତାଙ୍କୁ ନେଇ ଲୋକଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି। ସୁରତ ଫେରନ୍ତା ବିଭିନ୍ନ କ୍ୱାରାଣ୍ଟାଇନ୍ ସେଣ୍ଟରରେ ବିଶୃଙ୍ଖଳା ସୃଷ୍ଟି କରୁଥିବା ଘଟଣା ମଧ୍ୟ ସାମ୍ନାକୁ ଆସୁଛି। ଆହୁରି ଲକ୍ଷଲକ୍ଷ ପ୍ରବାସୀ ଓଡ଼ିଶା ଫେରିବାକୁ ଥିବାବେଳେ ସେମାନେ କିପରି ସଙ୍ଗରୋଧରେ ଠିକ୍ ନିୟମ ଓ କଟକଣା ମାନି ରହିବେ ତାହା ସବୁଠୁ ବଡ଼ ଚ୍ୟାଲେଞ୍ଜ ପାଲଟିଛି।