ଦ୍ୱିତୀୟ ଜଗନ୍ନାଥ ମନ୍ଦିର ନିର୍ମାଣ ବିବାଦ : ଜିଲାପାଳଙ୍କ କୋର୍ଟରେ ହେଲା ଶୁଣାଣି

ପୁରୀ ଅଫିସ,୧୯ା୬: ସମୁଦ୍ରକୂଳ ସିପସରୁବାଲି ମୌଜାରେ ଏକ ମନ୍ଦିର କମ୍ପ୍ଲେକ୍ସ ତିଆରି କରିବା ଲାଗି ଇସ୍କନ ୨୦୧୫ରେ ପିକେଡିଏଠାରୁ ଅନୁମୋଦନ ପାଇଥିଲା। କିନ୍ତୁ ସେଠାରେ ଇସ୍କନ ଦ୍ୱିତୀୟ ଜଗନ୍ନାଥ ମନ୍ଦିର ନିର୍ମାଣ କରିବ ବୋଲି ଅଭିଯୋଗ ଉଠିବା ପରେ ବିବାଦ ଉପୁଜିଥିଲା। ଜନ ଆନ୍ଦୋଳନ ଓ ରାଜନୈତିକ ବିବାଦ ଯୋଗୁ ପ୍ରଶାସନ ଏହାକୁ ବନ୍ଦ କରି ଦେଇଥିଲା। ଅନୁମୋଦିତ ନକ୍ସାରେ ଜଗନ୍ନାଥ ମନ୍ଦିର ନ ଥିବାବେଳେ ଏହା ଇସ୍କନ କିପରି କରିବ ବୋଲି ପ୍ରଶ୍ନ କରିଥିଲା ପିକେଡିଏ। ଏମିତି କି ଇସ୍କନକୁ ନୋଟିସ୍‌ ମଧ୍ୟ ଜାରି କରିଥିଲା। ଏହାକୁ ବିରୋଧ କରି ଇସ୍କନ ପକ୍ଷରୁ ହାଇକୋର୍ଟରେ ଆବେଦନ କରାଯାଇଥିଲା। ହାଇକୋର୍ଟ ଏହାର ଶୁଣାଣି କରି ୨ମାସ ମଧ୍ୟରେ ବିଚାର ଶେଷ କରିବାକୁ ପିକେଡିଏକୁ ନିର୍ଦ୍ଦେଶ ଦେଇଥିଲେ। ଗତ ଏପ୍ରିଲ ୧୭ତାରିଖରେ ଏହାର ଶୁଣାଣି ପାଇଁ ଦିନ ଧାର୍ଯ୍ୟ ହୋଇଥିଲା। କିନ୍ତୁ ନିର୍ବାଚନ ଯୋଗୁ ଶୁଣାଣି ଘୁଞ୍ଚାଇ ଦିଆଯାଇଥିଲା। ମଙ୍ଗଳବାର ପୁରୀ ଜିଲାପାଳଙ୍କ କୋର୍ଟରେ ଏହାର ଶୁଣାଣି ହୋଇଛି। ଏଥିରେ ପିକେଡିଏ ପକ୍ଷରୁ ଯୋଜନା ସଦସ୍ୟ ଶୁଭେନ୍ଦ୍ର କୁମାର ମିଶ୍ର, ଇସ୍କନ ପକ୍ଷରୁ ହାଇକୋର୍ଟ ଆଇନଜୀବୀ ବଂଶୀଧର ବାଗ, ଶୁଭେନ୍ଦୁ କୁମାର ଦାଶ ଏବଂ ଆପତ୍ତିକାରୀଙ୍କ ପକ୍ଷରୁ ଆଇନଜୀବୀ ଅଶୋକ କୁମାର ଦାଶ ପକ୍ଷ ରଖିଥିଲେ।
ଇସ୍କନ ପକ୍ଷରୁ ଯୁକ୍ତି ଉପସ୍ଥାପନ କରାଯାଇଥିଲା, ସେମାନେ ପ୍ରସ୍ତାବିତ ଜମିରେ କେବଳ ରାଧାକୃଷ୍ଣ ମନ୍ଦିର କରିବେ। ଜଗନ୍ନାଥ ମନ୍ଦିରର ପ୍ରସ୍ତାବ ନାହିଁ। ତେଣୁ ପିକେଡିଏ ପୂର୍ବରୁ ଯେଉଁ ଅନୁମିତ ଦେଇଥିଲା ତାହାକୁ ଭିତ୍ତିକରି ନିର୍ମାଣ କାର୍ଯ୍ୟ ପାଇଁ ଅନୁମତି ଦିଆଯାଉ। ନିର୍ମାଣ ବନ୍ଦ ଆଦେଶ ପ୍ରତ୍ୟାହାର କରାଯାଉ। ସେହିପରି ଆପତ୍ତିକାରୀଙ୍କ ପକ୍ଷରୁ କୁହାଯାଇଥିଲା ଯେ, ଗୃହ ନିର୍ମାଣ ଅନୁମତି ନେବା ପାଇଁ ଇସ୍କନ ଭୁଲ୍‌ ସତ୍ୟପାଠ ଦାଖଲ କରିଛି। ଯେଉଁ ଜାଗାରେ ମନ୍ଦିର ହେବ ତାହା ସିଆର୍‌ଜେଡ୍‌ ନକ୍ସାରେ ରହିଛି। ପିକେଡିଏ ଅନୁମତି ଦେବାର ଅଧିକାର ନାହିଁ। ଇସ୍କନର ଗୃହ ନିର୍ମାଣ ଅନୁମତିକୁ ବାତିଲ କରାଯାଉ। ସେହିପରି ପିକେଡିଏ ପକ୍ଷରୁ ମଧ୍ୟ ପକ୍ଷ ରଖାଯାଇଥିଲା। ଜିଲାପାଳ ବଲଓ୍ବନ୍ତ ସିଂ ଇସ୍କନ ଏବଂ ଆପତ୍ତିକାରୀଙ୍କୁ ସେମାନେ ଯାହା କହୁଛନ୍ତି ତାହାର କାଗଜପତ୍ର ଦାଖଲ କରିବାକୁ କହିଥିଲେ। ଏହି କାଗଜପତ୍ର ଦାଖଲ କରିବା ପରେ ପରବର୍ତ୍ତୀ ଶୁଣାଣି ଲାଗି ଦିନ ଧାର୍ଯ୍ୟ ହେବ ବୋଲି ଜଣାପଡ଼ିିଛି ।