ଭୁବନେଶ୍ୱର, ୧।୯(ବ୍ୟୁରୋ):ରାଜ୍ୟରେ କରୋନା ପୁଣି ଜଣେ ଶିଶୁର ଜୀବନ ନେଇଛି। ଏଥିସହ ୬୮ ଆକ୍ରାନ୍ତଙ୍କ ମୃତ୍ୟୁ ଘଟିଥିବା ମଙ୍ଗଳବାର ସ୍ବାସ୍ଥ୍ୟ ବିଭାଗ ସୂଚନା ଦେଇଛି। ଏମାନଙ୍କ ମଧ୍ୟରେ କଟକରୁ ସର୍ବାଧିକ ୨୨ଜଣ ଥିବାବେଳେ ଅନୁଗୋଳରୁ ୧୧, ଜଗତସିଂହପୁର ୮, କେନ୍ଦ୍ରାପଡ଼ା ୬, ବାଲେଶ୍ୱର ୫, ଢେଙ୍କାନାଳ ୪, ଭଦ୍ରକ ଓ ପୁରୀରୁ ୩ ଜଣ ଲେଖାଏ, ଯାଜପୁର, ଖୋର୍ଦ୍ଧା ଓ ମୟୂରଭଞ୍ଜରୁ ୨ଜଣ ଲେଖାଏ ଆକ୍ରାନ୍ତ ରହିଛନ୍ତି। ଏହି ୬୮ଜଣଙ୍କ ମଧ୍ୟରେ ଖୋର୍ଦ୍ଧା ଜିଲାର ଜଣେ ଦୁଇମାସ ଶିଶୁକନ୍ୟାର ମୃତ୍ୟୁ ଘଟିଛି। ଗୁରୁତ୍ୱପୂର୍ଣ୍ଣ କଥା ହେଉଛି, ସେ ଅନ୍ୟ କୌଣସି ରୋଗରେ ପୀଡ଼ିତ ନ ଥିଲେ। କେବଳ କରୋନାରେ ଶିଶୁଟିର ମୃତ୍ୟୁ ହୋଇଥିବା ସ୍ବାସ୍ଥ୍ୟ ବିଭାଗ କହିଛି। ଏହାକୁ ମିଶାଇ ରାଜ୍ୟରେ ଦ୍ୱିତୀୟ ଲହରରେ ମୋଟ ୩୭ ଶିଶୁଙ୍କ ମୃତ୍ୟୁ ଘଟିଛି। ଅଗଷ୍ଟ ୧୦ରୁ ୩୧ ତାରିଖ ମଧ୍ୟରେ ୧୮ବର୍ଷରୁ କମ୍ ବୟସର ୧୩ ପିଲାଙ୍କର ଏହି ମହାମାରୀରେ ଜୀବନ ଯାଇଛି।
ସେହିପରି ରାଜ୍ୟରେ ୬୮ଜଣଙ୍କ ଜୀବନ ଯିବାପରେ ମୋଟ କରୋନାଜନିତ ମୃତ୍ୟୁ ସଂଖ୍ୟା ୭,୯୬୯କୁ ବୃଦ୍ଧି ପାଇଛି। କେବଳ ଅଗଷ୍ଟ ମାସରେ ୨,୦୬୭ଜଣଙ୍କ ମୃତ୍ୟୁ ତଥ୍ୟ ଦେଇଛି ସ୍ବାସ୍ଥ୍ୟ ବିଭାଗ। ତେବେ ଏହା ନିର୍ଦ୍ଦିଷ୍ଟ କେଉଁ ସମୟର ତାହା ଏ ପର୍ଯ୍ୟନ୍ତ ସ୍ପଷ୍ଟ କରାଯାଇନାହିଁ। କରୋନା ପିକ୍ରେ ଥିବାବେଳେ ମୃତ୍ୟୁ ହୋଇଥିବା କୁହାଯାଉଛି। ଏବେ ଅଡିଟ୍ କରି ତଥ୍ୟ ଦିଆଯାଉଥିବା ବିଭାଗ ସ୍ପଷ୍ଟ କରିଛି। ସୂଚନାଯୋଗ୍ୟ, ମେ’ ମାସରେ ୬୬୦ ଜଣଙ୍କର କରୋନାରେ ମୃତ୍ୟୁ ହୋଇଥିଲା। ଏହାପରେ ଜୁନ୍ରେ ତାହା ବଢ଼ିଯାଇ ୧,୨୭୨ରେ ପହଞ୍ଚତ୍ଥିଲା ଏବଂ ଜୁଲାଇରେ ପୁଣି ବଢ଼ି ୧,୮୮୪ଜଣଙ୍କର ମୃତ୍ୟୁ ଘଟିଥିବା ଜଣାପଡ଼ିଛି।
ଅନ୍ୟପଟେ ରାଜ୍ୟରେ ପୁଣି ଶିଶୁ ଆକ୍ରାନ୍ତଙ୍କ ସଂଖ୍ୟା ବଢ଼ିଛି। ଗତ କିଛିଦିନ ହେବ ପ୍ରାୟ ୧୫ ପ୍ରତିଶତ ଭିତରେ ଦୈନିକ ପିଲା ଚିହ୍ନଟ ହେଉଥିବା ବେଳେ ଏବେ ୧୭% ଉପରକୁ ବଢ଼ିଯାଇଛି। ଗତ ୨୪ଘଣ୍ଟାରେ ୫୭,୨୮୦ ନମୁନା ପରୀକ୍ଷା କରାଯାଇଥିବା ବେଳେ ୬୩୮ ପଜିଟିଭ୍ ବାହାରିଛନ୍ତି। ସେମାନଙ୍କ ମଧ୍ୟରେ କେବଳ ୧୮ବର୍ଷରୁ କମ୍ ବୟସର ୧୧୦ଜଣ ରହିଥିବା ସୂଚନା ଓ ଲୋକ ସମ୍ପର୍କ ବିଭାଗ କହିଛି, ଯାହା ମୋଟ ସଂକ୍ରମଣର ୧୭.୨୪%। ଗୋଟିଏ ପଟେ ପିଲାଙ୍କ ସଂକ୍ରମଣ ସଂଖ୍ୟା ବୃଦ୍ଧି ଓ ଅନ୍ୟପଟେ ଶିଶୁ ମୃତ୍ୟୁ ଏବେ ରାଜ୍ୟବାସୀଙ୍କୁ ଚିନ୍ତାରେ ପକାଇଦେଇଛି। ତେବେ ତୃତୀୟ ଲହର ମୁକାବିଲା ଓ ବିଶେଷ କରି ଶିଶୁଙ୍କ ପାଇଁ ସମସ୍ତ ପ୍ରକାର ବ୍ୟବସ୍ଥା କରାଯାଇଥିବା ରାଜ୍ୟ ସରକାର କହିଛନ୍ତି। ସକ୍ରିୟ ରୋଗୀ ସଂଖ୍ୟାରେ ରେଡ୍ ଜୋନ୍ରେ ଥିବା ଖୋର୍ଦ୍ଧା ଜିଲା ଏବେ ୟେଲୋ ଜୋନ୍କୁ ଆସିଯାଇଛି।