ଖୁଣ୍ଟୁଣୀ,୨୮।୧୦(ଡି.ଏନ.ଏ.)- କାର୍ତ୍ତିକ ମାସର ତୃତୀୟ ପାଳିର ସୋମବାରରେ ଧବଳେଶ୍ୱରଙ୍କ ପୀଠରେ ପୂର୍ବ ଅପେକ୍ଷା ଅଧିକ ଶ୍ରଦ୍ଧାଳୁଙ୍କ ସମାଗମ ହୋଇଥିବା ପରିଲକ୍ଷିତ ହୋଇଛି। ପ୍ରାୟ ୧୮ହଜାରରୁ ଊର୍ଦ୍ଧ୍ୱ ଶ୍ରଦ୍ଧାଳୁ ଆସିଥିବା ଦେବୋତ୍ତର ସୁପରଭାଇଜର କରୁଣାକର ବେହେରା କହିଛନ୍ତି। କିନ୍ତୁ ଏହି ଭିଡ଼ ମଧ୍ୟରେ କେତେକ ମହିଳା ଲୁଟ୍ କରିବାକୁ ପଛାଇ ନାହାନ୍ତି। ଭିଡ ସ୍ଥାନରେ ସିସିଟିଭି କ୍ୟାମେରା ଲାଗିଥିଲେ ମଧ୍ୟ ୪ଜଣ ମହିଳାଙ୍କ ଠାରୁ ସୁନାଚେନ ଲୁଟ ହୋଇଯାଇଛି। ପୋଲିସ ସିସିଟିଭି ଯାଞ୍ଚ କରିବା ପରେ ଜଣେ ମହିଳାଙ୍କୁ ଅଟକ ରଖି ପଚରାଉଚୁରା ଚଳାଇଛି। ସୂଚନା ମୁତାବକ, ଠାକୁରଙ୍କ ଦର୍ଶନ ପାଇଁ ଦୂରଦୂରାନ୍ତରରୁ ଭକ୍ତ ଆସି ରାତି ୪ଟାରୁ ଅପେକ୍ଷା କରିଥାନ୍ତି। କିନ୍ତୁ ସାଢ଼େ ୮ଟାରୁ ୧୦ଟା ମଧ୍ୟରେ ଭିଡ ଏତେମାତ୍ରାରେ ବଢ଼ିଯାଇଥିଲା ଯେ ଗୁରୁଡିଝାଟିଆ ଥାନା ଅଧିକାରୀ ବିଜୟ କେତନ ବିସି, ଚୌଦ୍ୱାର ଏସ୍ଡିପିଓ ପ୍ରଶାନ୍ତ କୁମାର ମଲ୍ଲ ଓ ୧ ପ୍ଲାଟୁନ ର୍ଫୋସ ଏହାକୁ ନିୟନ୍ତ୍ରଣ କରିବାକୁ ନାକେଦମ ହୋଇଥିଲେ। ଏହି ଭିଡ଼ବେଳେ ଭୋଗ ମଣ୍ଡପ ପାଖରୁ କେନ୍ଦ୍ରାପଡ଼ା ଜିଲା ନିକିରେଇ ଗ୍ରାମର ମଧୁସ୍ମିତା ସାହୁ, ବଡମୁଣ୍ଡୁଳି ଗ୍ରାମର ନଳିନୀ ପ୍ରଭ ଦାସ, ବଡ଼ଚଣାର ଚପଳା ବିଶ୍ୱାଳ ଓ ଛତିଆର ସୁଜାତା ମଲ୍ଲିକଙ୍କଠାରୁ ୪ଟି ସୁନାହାର ଓ ଚେନ ଲୁଟି ନେଇଯାଇଥିଲେ। ପରେ ସେମାନେ ସ୍ଥାନୀୟ ଥାନାରେ ଅଭିଯୋଗ କରିବା ପରେ ପୋଲିସ କେଶ ନଂ. ୧୦୫/୧୯ରେ ରୁଜୁ କରି ସିସିଟିଭି ଯାଞ୍ଚ କରିଥିଲେ। ଏଥିରେ ଜଣେ ମହିଳାଙ୍କ ଲୁଟ କରୁଥିବା ଜାଣି ଅଟକ ରଖିଥବା ବେଳେ ତାଙ୍କଠାରୁ ନଗଦ ଟଙ୍କା ଜବତ କରିଛି। ତାଙ୍କ ସହ ଆଉ ୪ଜଣ ମହିଳା ଥିବା ଥାନାଧିକାରୀ କହିଛନ୍ତି।
