ଧର୍ମଗଡ,୨୮।୮(ଡି.ଏନ.ଏ.): କଳାହାଣ୍ଡି ଜିଲା ଧର୍ମଗଡଠାରେ ଜୀବନ ବିନ୍ଦୁ ସ୍ବେଚ୍ଛାସେବୀ ଅନୁଷ୍ଠାନ ତରଫରୁ ବୁଧବାର ସ୍ଥାନୀୟ ଅଞ୍ଚଳର ଉନ୍ନତି ସହିତ ଏକ ବିକଶିତ ଧର୍ମଗଡ କିଭଳି କରାଯାଇପାରି ସେ ଉଦ୍ଦେଶ୍ୟରେ ବୌଦ୍ଧିକ ସମାବେଶ ଅନୁଷ୍ଠିତ ହୋଇଯାଇଛି। ଏଥିରେ ମୁଖ୍ୟଅତିଥି ଭାବେ ଶକ୍ତିମନ୍ତ୍ରୀ କ୍ୟାପଟେନ ଦିବ୍ୟଶଙ୍କର ମିଶ୍ର ଯୋଗଦେଇ ଧର୍ମଗଡ ମାଟିରୁ ମୋର ରାଜନୈତିକ ଜୀବନ ଆରମ୍ଭ ହୋଇଥିଲା । ତେଣୁ ଧର୍ମଗଡର ସର୍ବାଙ୍ଗୀନ ଉନ୍ନତି ପାଇଁ ମୁଁ ସର୍ବଦା ସଂକଳ୍ପ ବଦ୍ଧ ବୋଲି କହିଥିଲେ। ଧର୍ମଗଡକୁ ରେଳ ଲାଇନ ସଂଯୋଗ, ସ୍ବାସ୍ଥ୍ୟ, ଶିକ୍ଷା, ପାନୀୟଜଳ, ଧର୍ମଗଡଠାରେ ବାଇ ପାସ ରାସ୍ତା ନିର୍ମାଣ, ଟ୍ରାଫିକ ବ୍ୟବସ୍ଥାରେ ସୁଧାର ଆଣିବା, ଟୁରିଜମ କ୍ଷେତ୍ରରେ କିଭଳି ବିକାଶ କରାଯାଇପାରି ସେ ଉପରେ ବିଶେଷ ଗୁରୁତ୍ୱ ଦେବି ବୋଲି ପ୍ରକାଶ କରିଥିଲେ। ଜିଲାରେ ଥିବା ଇନ୍ଦ୍ରାବତୀ ପ୍ରକଳ୍ପରୁ ଜିଲାବାସୀ ଖୁବଶୀଘ୍ର ବିଦ୍ୟୁତ୍ ପାଇବା ସହ ଧର୍ମଗଡଠାରେ ବହୁ ପ୍ରତିକ୍ଷିତ ଇଲେକ୍ଟ୍ରିକାଲ ଡିଭିଜନ ପୁନଃ କାର୍ଯ୍ୟକ୍ଷମ ପାଇଁ ପଦକ୍ଷେପ ନିଆଯିବ ବୋଲି ମନ୍ତ୍ରୀ ଘୋଷଣା କରିଥିଲେ । ଧର୍ମଗଡ ନିକଟସ୍ଥ ଗମ୍ବାରିଗୁଡାଠାରେ ଥିବା ଯଶୋଦା ଅନାଥ ଆଶ୍ରମରେ ଅନୁଷ୍ଠିତ ସମାବେଶରେ ଜିବନ ବିନ୍ଦୁ ବିଜୁ ସ୍ବେଚ୍ଛାସେବୀ ସଙ୍ଗଠନ ସଭାପତି ବିବେକ ରଞ୍ଜନ ମିଶ୍ର ଅଧ୍ୟକ୍ଷତା କରିଥିଲେ । ଏହି ସମାବେଶରେ ସରକାରୀ ଓକିଲ ଚିନ୍ତାମଣୀ ପାତ୍ର, ଓକିଲ ତୁଷାର ରଞ୍ଜନ ପଟଯୋଷୀ, ଯଶୋଦା ଅନାଥାଶ୍ରମ ପରିଚାଳକ ଶ୍ୟାମସୁନ୍ଦର ଜାଲ, ଭବାନୀପାଟଣାର ପୂର୍ବତନ ନଗରପାଳ ଆଦିତ୍ୟ ନନ୍ଦ, କଳାହାଣ୍ଡିର ବିଶିଷ୍ଟ ନାଟ୍ୟ ନିର୍ଦ୍ଦେଶକ ପ୍ରବୋଦ ରଥ, ବିଷ୍ଣୁ ପ୍ରସାଦ ଅଗ୍ରଓ୍ବାଲ, ଶ୍ୟାମ ପରିବାର ସମ୍ପାଦିକା ସୁନିତା ଅଗ୍ରଓ୍ବାଲ, ଧର୍ମଗଡ ନଗରପାଳ ହିରା ବାଗ, ଗୋଲାମୁଣ୍ଡା ବ୍ଲକ ଅଧ୍ୟକ୍ଷ ତୁଳେଶ୍ୱର ନାଏକ ପ୍ରମୁଖ ମଞ୍ଚାସୀନ ଥିଲେ। କାର୍ଯ୍ୟକ୍ରମରେ ଜୀବନବିନ୍ଦୁର ସମ୍ପାଦକ ଅବଜ ପାଢୀ, ଉପସଭାପତି ଭରତ ମେହେର, ମୁନିରାମ ମାଝି, ଯୁବ ସଙ୍ଗଠକ ଉପେନ୍ଦ୍ର ନାଏକ, ଚନ୍ଦନ ପାତ୍ର ଓ ଅନ୍ୟମାନେ ସହଯୋଗ କରିଥିଲେ ।