ଧର୍ମଗଡ,୨୭।୯(ଡି.ଏନ.ଏ.)-କଳାହାଣ୍ଡି ଜିଲା ଧର୍ମଗଡ଼ ଉପଖଣ୍ଡ ମୁଖ୍ୟ ଚିକିତ୍ସାଳୟରେ ଗୁରୁବାର ୨ ଯୁବକ ଉନ୍ମତ୍ତକାଣ୍ଡ ଘଟାଇଥିବା ଅଭିଯୋଗ ହୋଇଛି । ଡାକ୍ତରଖାନାକୁ ଚିକିତ୍ସା ପାଇଁ ଆସିଥିବା ଏହି ୨ ଯୁବକ ନିଜ ମୋବାଇଲ ଫୋନ୍ରେ ନର୍ସଙ୍କ ଭିଡିଓ ଶୁଟିଂ କରୁଥିଲେ । ଏହାକୁ ନର୍ସ ବାରଣ କରିବାରୁ ପାଟିତୁଣ୍ଡ ହୋଇଥିଲା । ଫଳରେ ଯୁବକଦ୍ୱୟ ଡାକ୍ତରଖାନା ଟେବୁଲ ଭାଙ୍ଗିବା ସହ ମେଡିସିନ ଫୋପାଡି ଦେଇଥିଲେ । ଏହାକୁ ନେଇ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିଲା। ଖବର ପାଇ ପୋଲିସ ଯୁବକଦ୍ୱୟଙ୍କୁ ନେଇ ଥାନାରେ ପଚରାଉଚୁରା କରୁଥିବା ଜଣାଯାଇଛି। ଏ ନେଇ ସମ୍ପୃକ୍ତ ଯୁବକଙ୍କ ନାମରେ ଥାନାରେ ଏତଲା ଦିଆଯାଇଛି।
ମିଳିଥିବା ସୂଚନା ଅନୁଯାୟୀ, ଗୁରୁବାର ଅପରାହ୍ନରେ କୁଟୁରୁଖମାର ଗ୍ରାମର ଲବ ତାଣ୍ଡି ଓ ରଙ୍କାବାହାଲ ଗ୍ରାମର ଚକ୍ରଧର ଦୁରିଆ ଧର୍ମଗଡ଼ ଡାକ୍ତରଖାନାକୁ ଚିକିତ୍ସା ପାଇଁ ଆସିଥିଲେ। ଲବଙ୍କ ଗୋଡରେ ଆଘାତ ଲାଗିଥିବାରୁ ସେମାନେ ଡାକ୍ତରଙ୍କୁ ପରାମର୍ଶ କରି ମେଡିସିନ ନେବା ସହ ନର୍ସଙ୍କ ଡ୍ୟୁଟି ରୁମରେ ଇଞ୍ଜେକଶନ ମଧ୍ୟ ନେଇଥିଲେ। ଏହି ସମୟରେ ଚକ୍ରଧର ସେଠାରେ ଡ୍ୟୁଟିରେ ଥିବା ନର୍ସଙ୍କ ଭିଡିଓ ଶୁଟିଂ କରିଥିଲେ। ନର୍ସ ଜଣକ ଏପରି ନ କରିବାକୁ ତାଙ୍କୁ କହିଥିଲେ । ଏହା ପରେ ବି ଚକ୍ରଧର ମାନି ନ ଥିଲେ । ଫଳରେ ନର୍ସ ଜଣକ ଡାକ୍ତରଖାନା କର୍ମଚାରୀମାନଙ୍କୁ ଡାକିଥିଲେ। ତଥାପି ସେହି ଯୁବକମାନେ ନ ମାନି ଭିଡିଓ ଶୁଟିଂ କରୁଥିଲେ। ପରେ ସିକ୍ୟୁରିଟି କାର୍ଡ ଆସି ଜବରଦସ୍ତ ଏହା ବନ୍ଦ କରିବାକୁ କହିବା ପରେ ଦୁଇ ଯୁବକ ଉତ୍କ୍ଷିପ୍ତ ହୋଇ ନର୍ସଙ୍କୁ ଗାଳିଗୁଲଜ କରିବା ସହ ସେଠାରେ ଥିବା ଚେୟାର ଓ ଟେବୁଲ ଭାଙ୍ଗିବା ସହ ମେଡିସିନଗୁଡିକ ଫିଙ୍ଗି ଦେଇଥିଲେ।