ଅଧିକ ଲୋକ ଧାର୍ମିକ ସ୍ଥାନକୁ ଯାତ୍ରା ପଛରେ ପାପରୁ ମୁକ୍ତି ଓ ଦାନ-ପୁଣ୍ୟ କରିବା ମୁଖ୍ୟ କାରଣ ବୋଲି ଭାବିଥାଆନ୍ତି। କିନ୍ତୁ ବାସ୍ତବରେ ଧାର୍ମିକ ସ୍ଥାନକୁ ଯାତ୍ରା କରିବା ଦ୍ବାରା ଅନେକ ଲାଭ ମିଳିଥାଏ। ଦେଖିବାକୁ ଗଲେ ଧାର୍ମିକ ସ୍ଥାନ କିମ୍ବା ତୀର୍ଥ ଯାତ୍ରା ଯିବାର ପରମ୍ପରା ରାମାୟଣ ଓ ମହାଭାରତ ଯୁଗରୁ ରହିଆସିଛି। ତେବେ ଆସନ୍ତୁ ଜାଣିବା ଧାର୍ମିକ ସ୍ଥାନ ଯାତ୍ରା କରିବାର ଲାଭ ବିଷୟରେ..
* ଧାର୍ମିକ ସ୍ଥାନ ଓ ତୀର୍ଥ ସ୍ଥାନକୁ ଶକ୍ତିର କେନ୍ଦ୍ର ବୋଲି କୁହାଯାଏ। କୁହାଯାଇଛି ଯେ, ଯେଉଁ ଶକ୍ତି ଧାର୍ମିକ ସ୍ଥାନ ଓ ତୀର୍ଥ ସ୍ଥାନରେ ରହିଛି ତାହା ଅନ୍ୟ କେଉଁ ଠାରେ ମିଳି ନ ଥାଏ। ସେହି କାରଣରୁ ମନ୍ଦିର ଓ ତୀର୍ଥ ସ୍ଥାନ ଯାଇ ବ୍ୟକ୍ତିଙ୍କ ମନ ଶାନ୍ତ ହେବା ସହ ମନରେ ଶକ୍ତି ଆସିଥାଏ।
* ସେହିପରି ଧାର୍ମିକ ସ୍ଥଳକୁ ଯାତ୍ରା କରିବା ଦ୍ବାରା ଶରୀର ସୁସ୍ଥ ରହିଥାଏ। କାରଣ ଧାର୍ମିକ ସ୍ଥଳର ବାତାବରଣ ଶୁଦ୍ଧ ରହିଥାଏ। ମନ୍ଦିର ପ୍ରବେଶ କରିବା ଆଗରୁ ପ୍ରଥମେ ଆମକୁ ଚପଲ ଖୋଲି ଖାଲି ପାଦରେ ଯିବାକୁ ପଡ଼ିଥାଏ। ଏଥିସହ ଯେଉଁ ଧାର୍ମିକ ସ୍ଥଳରେ ସିଡି ରହିଥାଏ ସେଠାରେ ଚଢ଼ିବା ଓ ଓହ୍ଲାଇବା ବେଳେ ଭଜନ-କୀର୍ତ୍ତନ କରି ଯିବା ଉଚିତ। ଏହାଦ୍ବାରା ହାତ ଓ ପାଦରେ ଚାପ ପଡିଥାଏ। ଏହା ଆକ୍ୟୁପ୍ରେସର ଭଳି କାର୍ଯ୍ୟ କରିଥାଏ।
*ଏଥିସହ ତୀର୍ଥ ଯାତ୍ରା କରିବା ଦ୍ବାରା ଆମର ଆଧ୍ୟାତ୍ମିକ ଜ୍ଞାନ, ଭୌଗୋଳିକ ଓ ଐତିହାସିକ ଜ୍ଞାନ ବଢିଥାଏ। ଯାତ୍ରା ଦ୍ବାରା ଅନେକ ସ୍ଥାନର ଇତିହାସ ଓ ମହତ୍ତ୍ବ ବିଷୟରେ ଜାଣିବା ପାଇଁ ଶ୍ରଦ୍ଧାଳୁଙ୍କ ମନରେ ଇଚ୍ଛା ଜାଗୃତ ହୋଇଥାଏ। ସେହି ସ୍ଥାନ ସହ ଜଡିତ କଳା, ସଂସ୍କୃତି ଓ ପରମ୍ପରା ଇତ୍ୟାଦି ସମ୍ପର୍କରେ ମଧ୍ୟ ଜ୍ଞାନ ମିଳିଥାଏ।
*ତୀର୍ଥ ଯାତ୍ରା ସମୟରେ ନିଜ ଘର ପରିବାର ସଦସ୍ୟଙ୍କ ବ୍ୟତୀତ ଅନେକ ବ୍ୟକ୍ତିଙ୍କ ସମ୍ପର୍କରେ ଆସିବାର ସୁଯୋଗ ମିଳିଥାଏ। ଏହାଦ୍ବାରା ଅନେକ ବ୍ୟକ୍ତିଙ୍କ ମଧ୍ୟରେ ସୁସମ୍ପର୍କ ସ୍ଥାପନ ହୋଇଥାଏ।
