ବରଗଡ଼ ଅଫିସ୍,୧୩।୫: ବରଗଡ଼ ଜିଲାରେ ରବିଋତୁ ଧାନ ସଂଗ୍ରହ ପ୍ରକ୍ରିୟାକୁ ବୁଧବାର ୫ଦିନ ବିତିଛି। ମାତ୍ର ଧାନ ସଂଗ୍ରହ ଆରମ୍ଭରୁ ଚାଷୀମାନଙ୍କୁ ବିଭିନ୍ନ ସମସ୍ୟାର ସମ୍ମୁଖୀନ ହେବାକୁ ପଡ଼ୁଛି । କେତେକ ଚାଷୀଙ୍କୁ ଟୋକନ ମିଳି ନଥିବା ଯୋଗୁ ଧାନବିକ୍ରିରୁ ସେମାନେ ବଞ୍ଚିତ ହୋଇଥିବାବେଳେ କରୋନା ମୁକାବିଲା ସମୟାରେ ଚକ୍ଷୁ ସ୍କାନିଂକୁ ଚାଷୀମାନେ ସହଜରେ ଗ୍ରହଣ କରି ପାରୁନାହାନ୍ତି। ଏଭଳି ସମସ୍ୟାର ସମାଧାନ ପାଇଁ ବୁଧବାର ଚାଷୀ ସଂଗଠନ ଜୟ କିସାନ୍ ଆନ୍ଦୋଳନର ନେତୃତ୍ୱରେ ବରଗଡ଼ ଜିଲା ସୋହେଲା ବ୍ଲକ ସରକଣ୍ଡା ଅଞ୍ଚଳର ଚାଷୀମାନେ ବରଗଡ଼ ଜିଲା ଯୋଗାଣ ଅଧିକାରୀ(ସିଏସଓ)ଙ୍କୁ ଭେଟିଥିଲେ। ଏ ନେଇ ସିଏସଓ ଦୁର୍ଗାଚରଣ ଭେସ୍ରାଙ୍କୁ ସେମାନେ ଏକ ସ୍ମାରକପତ୍ର ପ୍ରଦାନ କରିଥିଲେ। ସରକଣ୍ଡା ଅଞ୍ଚଳର ଚାଷୀଙ୍କ ପାଇଁ ସରକାରଙ୍କ ନିର୍ଦ୍ଦେଶ ମୁତାବକ ଅଢ଼େଇ ଏକର ଜମିର ଧାନବିକ୍ରିର ନିର୍ଦ୍ଦେଶ ରହିଥିବାବେଳେ ଅନେକ ଚାଷୀଙ୍କ ପାଇଁ ତାହା ଅଧ ଏକରରୁ ଦେଢ଼ ଏକର ପଯର୍ୟନ୍ତ ଉଲ୍ଲେଖିତ ରହିଥିବା ଅଭିଯୋଗ ହୋଇଛି। ସେହିପରି ଅନେକ ଚାଷୀଙ୍କ ପାଖକୁ ଏପର୍ଯ୍ୟନ୍ତ ପରିଚୟପତ୍ର ପହଞ୍ଚି ନଥିବାବେଳେ ଚାଷୀଙ୍କୁ ବସ୍ତା ମଧ୍ୟ ଯୋଗାଇ ଦିଆଯାଉ ନାହିଁ। ଏହା ସହିତ କରୋନା ସଂକ୍ରମଣ ପ୍ରତିହତକୁ ଗୁରୁତ୍ୱ ଦିଆଯାଉ ଥିବାବେଳେ ସାମ୍ପ୍ରତିକ ସ୍ଥିତିରେ ଧାନ ସଂଗ୍ରହ ପ୍ରକ୍ରିୟାରେ ଚକ୍ଷୁ ସ୍କାନିଂ ବଦଳରେ ଆଧାର କାର୍ଡ଼କୁ ଦେଖି ଧାନ କିଣାଯିବାକୁ ଚାଷୀମାନେ ଦାବି କରିଛନ୍ତି । ସ୍ମାରକପତ୍ର ପ୍ରଦାନ ସମୟରେ ଜୟ କିଶାନ ଆନ୍ଦୋଳନର ଚାଷୀନେତା ସୁଶିଲ କୁମାର ସାହୁ, ହର ବଣିଆ, ବିଶ୍ୱ ସା ପ୍ରମୁଖ ଉପସ୍ଥିତ ଥିଲେ।