ଖଣ୍ଡପଡ଼ା,୧୬ା୭(ସ୍ବ.ପ୍ର.): ଖଣ୍ଡପଡ଼ା ଥାନା ରାଣୀପଡା ପଞ୍ଚାୟତର ଗୋପପୁର ଗ୍ରାମରେ ଧାନ ବିଲରେ ଗାଈ ପଶିବାକୁ କେନ୍ଦ୍ରକରି ରବିବାର ୨ ଗୋଷ୍ଠୀ ମଧ୍ୟରେ ଗଣ୍ଡଗୋଳର ସୂତ୍ରପାତ ହୋଇଥିଲା। ଗୋଟିଏ ଗୋଷ୍ଠୀର ଆକ୍ରମଣରେ ୩ଜଣ ଗୁରୁତର ଆହତ ହୋଇଛନ୍ତି। ଏ ନେଇ ଅଭିଯୋଗ ପରେ ପୋଲିସ ଏକ ମାମଲା ରୁଜୁକରି ସୋମବାର ଗୋଟିଏ ଗୋଷ୍ଠୀର ବାପପୁଅଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ସେଠାରେ ଜାମିନ ନାମଞ୍ଜୁର ହେବାରୁ ଉଭୟଙ୍କୁ ଖଣ୍ଡପଡା ସବ୍ଜେଲକୁ ପଠାଇ ଦିଆଯାଇଛି।
ଥାନାରେ ହୋଇଥିବା ଅଭିଯୋଗ କ୍ରମେ ରାଣୀପଡା ଗ୍ରାମର ଶିବସୁନ୍ଦର ନାୟକଙ୍କ ଗୋପପୁର ଗ୍ରାମ ନିକଟରେ ଧାନ ବିଲ ରହିଛି। ରବିବାର ଗୋପପୁର ଗ୍ରାମର ସର୍ବେଶ୍ୱର ପରିଡା ଗାଈଗୋଠ ନେଉଥିବାବେଳେ କିଛି ଗାଈ ଶିବସୁନ୍ଦରଙ୍କ ଧାନ ବିଲରେ ପଶି ନଷ୍ଟ କରିଥିଲେ ା ଏହାକୁ କେନ୍ଦ୍ର କରି ଉଭୟଙ୍କ ମଧ୍ୟରେ ପ୍ରଥମେ ପାଟିତୁଣ୍ଡ ହୋଇଥିଲା ା ପରେ ସନ୍ଧ୍ୟାରେ ଶିବସୁନ୍ଦରଙ୍କ ୨ ପୁଅ ଓ ଶଳା ଗୋପପୁର ଗ୍ରାମକୁ ଯାଇ ସର୍ବେଶ୍ୱରଙ୍କୁ ଘଟଣା ସମ୍ପର୍କରେ ପଚାରିଥିଲେ। ମାତ୍ର ସର୍ବେଶ୍ୱର, ତାଙ୍କ ଦାଦା ଭବାନୀ ପରିଡା, ଖୁଡ଼ୀ ଓ ମାଆ ମିଳିତ ଭାବେ ଫାର୍ସା ଓ ଟାଙ୍ଗିଆରେ ସେମାନଙ୍କୁ ମରଣାନ୍ତକ ଆକ୍ରମଣ କରିଥିଲେ। ଏଥିରେ ଶିବସୁନ୍ଦରଙ୍କ ଦୁଇ ପୁଅ ଗଣେଶ ଓ ପ୍ରଭାତଙ୍କ ସମେତ ଶଳା ଛାଟିଆ ସାହୁ ଗୁରୁତର ଆହତ ହୋଇଥିଲେ। ସେମାନଙ୍କ ମୁଣ୍ଡ ଓ ଶରୀରର ବିଭିନ୍ନ ସ୍ଥାନରେ ଗଭୀର କ୍ଷତ ସୃଷ୍ଟି ହୋଇଥିଲା ା ରକ୍ତ ଜୁଡୁବୁଡୁ ଅବସ୍ଥାରେ ସ୍ଥାନୀୟ ବାସିନ୍ଦା ସେମାନଙ୍କୁ ଘଟଣାସ୍ଥଳରୁ ଉଦ୍ଧାର କରି ଚିକିତ୍ସା ନିମନ୍ତେ ଖଣ୍ଡପଡା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ ା ପରେ ସେମାନଙ୍କୁ ନୟାଗଡ଼ ସ୍ଥାନାନ୍ତର କରାଯାଇଥିଲା। ଏବେ ସେଠାରେ ସେମାନେ ଚିକିତ୍ସିତ ହେଉଛନ୍ତି। ତେବେ ଶିବସୁନ୍ଦର ଏ ସମ୍ପର୍କରେ ଖଣ୍ଡପଡା ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତିକରି ପୋଲିସ ୧୨୯/୧୯ରେ ଏକ ମାମଲା ରୁଜୁ କରି ସର୍ବେଶ୍ୱର ପରିଡା ଓ ତାଙ୍କ ମାଆ, ଦାଦା ଭବାନୀ ପରିଡା ଓ ଖୁଡିଙ୍କ ନାମରେ ବିଭିନ୍ନ ଦଫାରେ ମାମଲା ରୁଜୁ କରି ଘଟଣାର ଅନୁସନ୍ଧାନ ଜାରି ରଖିଛି। ଘଟଣାରେ ସମ୍ପୃକ୍ତ ଥିବା ଅଭିଯୋଗରେ ପୋଲିସ ସର୍ବେଶ୍ୱର ଓ ତାଙ୍କ ବାପା ଧ୍ରୁବ ପରିଡାଙ୍କୁ ସୋମବାର ଗିରଫ କରିଥିବା ଆଇଆଇସି ବିମଳ କୁମାର ମଲ୍ଲିକ ସୂଚନା ଦେଇଛନ୍ତି।