ଚମ୍ପୁଆ,୨୯ା୫(ଡି.ଏନ୍.ଏ.)- ଚମ୍ପୁଆ କୃଷି ଜିଲା ଅନ୍ତର୍ଗତ ଚମ୍ପୁଆ ବ୍ଲକର ଅଢଙ୍ଗାପାଳ ଗ୍ରାମରେ ପତ୍ରପୋଡା ରୋଗ ଯୋଗୁ ପ୍ରାୟ ୪ ଏକର ଧାନ ଫସଲ ଉଜୁଡ଼ି ଯିବା ଆଶଙ୍କା ପ୍ରକାଶ ପାଇଛି। ଧାନର ଅମଳ ସମୟରେ ତଥା କେତେକ ଧାନର ଫୁଲ ଉଡ଼ାଇବା ସମୟରେ ଏହି ରୋଗ ଦେଖା ଦେଇଥିବାରୁ ଚାଷୀ ହତାଶ ହୋଇପଡ଼ିଛନ୍ତି। ଏ ନେଇ କୃଷି ଜିଲା ଅଧିକାରୀ ଗଜେନ୍ଦ୍ରନାଥ ଗଚ୍ଛାୟତଙ୍କୁ ପଚାରିବାରୁ ଧାନରେ ପତ୍ରପୋଡ଼ା ଓ କବକ ରୋଗ ଲାଗିଛି। ତୁରନ୍ତ ଏହାର ପ୍ରତିକାର ସ୍ବରୂପ ବ୍ଲକ କୃଷି ଅଧିକାରୀ ଓ ସହକାରୀ କୃଷି ଅଧିକାରୀଙ୍କୁ ଘଟଣାସ୍ଥଳକୁ ପଠାଯିବା ସହିତ ଆବଶ୍ୟକ ଔଷଧ ଯୋଗାଇ ଦିଆଯିବ ବୋଲି କହିଛନ୍ତି।
ସୂଚନା ଅନୁସାରେ, ଅଢ଼ଙ୍ଗାପାଳ ଗ୍ରାମର ଚାଷୀ ବାହାଦୁର ମହାନ୍ତ, ମାଗଲେନ ମହାନ୍ତ, ଲାଲମୋହନ ମୁଣ୍ଡା, ଧନେଶ୍ୱର ମହାନ୍ତ, ଚେମ୍ଟୁ ମହାନ୍ତ, ଛୋଟରାୟ ମହାନ୍ତ, କୁମ୍ଭ ମହାନ୍ତ ପ୍ରମୁଖ ଚାଷୀ ଚଳିତ ସିଜନରେ ପ୍ରାୟ ୪ ଏକରରୁ ଊର୍ଦ୍ଧ୍ୱ ଜମିରେ ହାଇବ୍ରିଡ ଧାନ ଚାଷ କରିଥିଲେ। ଜାନୁୟାରୀରେ ତଳି ପକାଇବା ପରେ ଫେବୃୟାରୀ ମାସ ଆରମ୍ଭରେ ଏହାକୁ ରୋଇ ଥିଲେ। ବର୍ତ୍ତମାନ ସମୟରେ କିଛି ପ୍ରଜାତିର ଧାନ ପାଚି ଯାଇଛି ଓ ଅନ୍ୟ କେତେକ ଧାନଗଛରେ ଫୁଲ ଆସିଥିବା ବେଳେ ପତ୍ରପୋଡ଼ା ରୋଗ ଲାଗିଥିବା ଦେଖିବାକୁ ମିଳିଛି। ଏନେଇ ଚାଷୀ ମୁଣ୍ଡରେ ହାତ ଦେଇ ବସିଛନ୍ତି। ଚାଷ ଉପରେ ନିର୍ଭର କରି ପରିବାର ପ୍ରତିପୋଷଣ କରୁଥିବା ଏହି ଚାଷୀମାନେ ନିଜ ପରିଶ୍ରମର ଫଳ ପାଇବେ କି ନାହିଁ ତାହା ଏବେ ସନ୍ଦେହ ସୃଷ୍ଟି କରିଛି।