କାଳିଆପାଣି,୨୩ା୧୨ (ଡି.ଏନ.ଏ.): ଯାଜପୁର ଜିଲା ସୁକିନ୍ଦା ବ୍ଲକ ଅନ୍ତର୍ଗତ ଭାଲୁକିପାତଳା ଗ୍ରାମରେ ବୁଧବାର ରାତିରେ ଏକ ହାତୀ ପଲ ପସି ଧାନ ଫସଲ ନଷ୍ଟ କରିଛନ୍ତି। ହାତୀପଲ ଏକ ଛୁଆକୁ ଧରି ଧାନ ବିଲରେ ପସି ଧାନ ଖାଇଥିଲେ। ଫଳରେ ରାତି ତମାମ ଗ୍ରାମବାସୀ ହାତୀ ଘଉଡ଼ାଇଥିଲେ। ଛୁଆ ହାତୀ ରହିଥିବାରୁ ହାତୀ ପଲ ଗୁରୁବାର ସକାଳୁ ନିକଟ ଜଙ୍ଗଲକୁ ଚାଲିଯାଇଛନ୍ତି। ସୁକିନ୍ଦା ବନ ବିଭାଗ ପକ୍ଷରୁ ଏକ ଟିମ୍ ଭାଲୁକିପାତଳା ଗ୍ରାମ ନିକଟରେ ଜଗିଥିବା ବେଳେ କିଛି ଗ୍ରାମବାସୀ ମଧ୍ୟ ହାତୀ ପଲଙ୍କୁ ଜଗିଥିବା ଦେଖିବାକୁ ମିଳିଛି। କିଛିଦିନ ତଳେ ଯାଜପୁର ଓ ଢେଙ୍କାନାଳ ଜିଲା ସୀମାନ୍ତ ଭୁବନ ବ୍ଲକ ଅନ୍ତର୍ଗତ ଅନଳ ଗ୍ରାମରେ ହାତୀ ପଲ ଧାନ ଫସଲ ନଷ୍ଟ କରିବା ସହ ଗ୍ରାମରେ ପସିଯାଇଥିଲେ। ଏହାପରେ ହାତୀପଲ କାମାକ୍ଷାନଗର ବ୍ଲକ୍ ଅଞ୍ଚଳଚାଷୀଙ୍କ ଧାନ ଫସଲ ନଷ୍ଟ କରିବା ପରେ ଭୁବନ ବ୍ଲକର ଅନଳ, କୁନିଦା, କଅଁସରଗୋଡା, ବାରୁଆଁ ଓ ମଝିପାଳ ଅଞ୍ଚଳରେ ରାତି ତମାମ ଧାନ ଫସଲ ଖାଇବା ସହ ନଷ୍ଟ କରିଥିଲେ। ହାତୀପଲଙ୍କୁ ଦେଖି ଲୋକେ ଭୟଭୀତ ହୋଇ ପଡ଼ିଛନ୍ତି।