ବାସୁଦେବପୁର, ୮ା୧(ଡି.ଏନ୍.ଏ.)- ବାସୁଦେବପୁର ବ୍ଲକ ଇରମ ସେବା ସମବାୟ ସମିତି ଅଧୀନରେ ପ୍ରାୟ ୨୧ ଜଣ ଚାଷୀ ସେମାନଙ୍କର ପୂର୍ବବର୍ଷ ଧାନବିକ୍ରି ଟଙ୍କା ପାଇପାରିନାହାନ୍ତି। ଏହାର ପ୍ରତିବାଦରେ ଚାଷୀମାନେ ମଙ୍ଗଳବାର ସମିତି କାର୍ଯ୍ୟାଳୟ ଆଗରେ ହୋହଲ୍ଲା କରିଛନ୍ତି। ଫଳରେ ପୂର୍ବାହ୍ନଠାରୁ ଅପରାହ୍ନ ୨ ଘଟିକା ପର୍ଯ୍ୟନ୍ତ ସମିତି କାର୍ଯ୍ୟ ପରିଚାଳନାରେ ବାଧା ଉପୁଜିଥିଲା।
ଉଲ୍ଲେଖଯୋଗ୍ୟ ଯେ, ଗତ ୨୦୧୯ ଆର୍ଥତ୍କ ବର୍ଷରେ ଏହି ସମିତି ଅଧୀନରେ ୨୧ ଜଣ ଚାଷୀ ପ୍ରଦାନ କରିଥିବା ୭୦୭ କୁଇଣ୍ଟାଲ ଧାନ ବାବଦକୁ ପ୍ରାୟ ୧୦ ଲକ୍ଷ ଟଙ୍କା ଏଯାଏ ପାଇପାରିନାହାନ୍ତି। ଏହାର ପ୍ରତିବାଦରେ ସେମାନେ ଏପରି ଆନ୍ଦୋଳନାମତ୍କ ପନ୍ଥା ଅବଲମ୍ବନ କରିଛନ୍ତି। ଏହି ଘଟଣାର ସମାଧାନ ପାଇଁ ମଧ୍ୟାହ୍ନରେ ଇରମ ବଜ୍ରମହାକାଳୀ ମନ୍ଦିରରେ ଏକ ସମନ୍ବୟ ବୈଠକ ଅନୁଷ୍ଠିତ ହୋଇଥିଲା। ବୈଠକରେ ଇରମ ସରପଞ୍ଚ ପ୍ରଫୁଲ୍ଲ କୁମାର ବିଶ୍ୱାଳ, ସମିତିସଭ୍ୟ ଉମାକାନ୍ତ ରଣା, ଇରମ ସମିତିର ସଭାପତି କମଳଲୋଚନ ବାରିକ, ସମ୍ପାଦକ ରଶ୍ମିରଞ୍ଜନ କବାଟ, ଅଢ଼ୁଁଆ ସରପଞ୍ଚ ଗିରିଶ ଚନ୍ଦ୍ର ସାମଲ, ଗୋବିନ୍ଦ ଜେନାଙ୍କ ସମେତ ଚାଷୀମାନେ ଉପସ୍ଥିତ ରହି ଆଲୋଚନାରେ ଅଂଶଗ୍ରହଣ କରିଥିଲେ। ୨ ସପ୍ତାହ ମଧ୍ୟରେ ବକେୟା ଟଙ୍କା ଚାଷୀଙ୍କୁ ଦିଆଯିବା ଦିଗରେ ସମିତି ପଦକ୍ଷେପ ଗ୍ରହଣ କରିବ ବୋଲି ବୈଠକରେ ନିଷ୍ପତ୍ତି ହୋଇଥିଲା। ତେବେ ପୂର୍ବବର୍ଷ ଧାନକିଣା କ୍ଷେତ୍ରରେ ଶେଷ ସମୟରେ କେତେକ ଚାଷୀଙ୍କ ଟଙ୍କା ବିଭାଗ ସମିତିକୁ ଦେଇ ନ ଥିବାରୁ ଚାଷୀମାନେ ଏହି ଟଙ୍କା ପାଇପାରି ନାହାନ୍ତି ବୋଲି ସମିତି ସମ୍ପାଦକ ରଶ୍ମିରଞ୍ଜନ କବାଟ କହିଛନ୍ତି। ଏ ଦିଗରେ ପଦକ୍ଷେପ ନିଆଯାଉଛି ବୋଲି ସେ ସୂଚନା ଦେଇଛନ୍ତି।