ଚିତ୍ତୋର(ଆନ୍ଧ୍ରପ୍ରଦେଶ): କରୋନା ସମୟରେ ଅନେକ ଘଟଣା ସାମ୍ନାକୁ ଆସୁଛି, ଯାହା ଅନେକଙ୍କୁ ପ୍ରେରିତ କରୁଛି। ଏହି ସଙ୍କଟ ସମୟରେ ରାଜନେତାଙ୍କଠାରୁ ଅଧିକ ପ୍ରଶାସନିକ ଓ ପୋଲିସ ଅଧିକାରୀମାନେ ଆଗଧାଡ଼ିର ଯୋଦ୍ଧାଭାବେ ସାଧାରଣ ଲୋକଙ୍କ ସହ ଯୋଡ଼ିହୋଇ ରିୟଲ ହିରୋର ପରିଚୟ ଦେଇଛନ୍ତି। ମଙ୍ଗଳବାର ଆନ୍ଧ୍ରପ୍ରଦେଶର ତିରୁପତି ଅର୍ବାନ୍ ଏସ୍ପି ଅଭୁଲା ରମେଶ ରେଡ୍ଡି ଚାଷୀଙ୍କ ସହ ମିଶି ଧାନ ତଳି ରୋଇବା ଦେଖିବାକୁ ମିଳିଛି। ଶ୍ରୀକାଳହସ୍ତୀ ମନ୍ଦିର ସହରରେ ସର୍ବାଧିକ କରୋନା ସଂକ୍ରମିତ ଚିହ୍ନଟ ହୋଇଥିବାରୁ ସେଠାରେ ଲକ୍ଡାଉନ୍ ନିୟମକୁ ଲୋକେ ମାନୁଛନ୍ତି କି ନାହିଁ ଯାଞ୍ଚ କରିବା ପାଇଁ ମଙ୍ଗଳବାର ଏସ୍ପି ପାଟୋଲିଂ କରୁଥିଲେ। ଏହି ସମୟରେ ଭେଙ୍କଟଗିରି ରୋଡ୍ସ୍ଥିତ ୟେରପେଡ଼ୁ ନିକଟ ରାସ୍ତାକଡ଼ ଜମିରେ ଧାନରୁଆ ଚାଲିଥିଲା। ଏହା ଦେଖି ଏସ୍ପି ନିଜକୁ ସମ୍ଭାଳିପାରି ନ ଥିଲେ। ସେ ଗାଡ଼ି ଅଟକାଇ ୟୁନିଫର୍ମ ପ୍ୟାଣ୍ଟକୁ ଫୋଲ୍ଡ କରି ସିଧା ଚାଷଜମିକୁ ଓହ୍ଲାଇଥିଲେ। ଧାନତଳି ଧରି ଚାଷୀ ଓ ଶ୍ରମିକଙ୍କ ସହ ମିଶି ନିଜେ ରୋଇଥିଲେ। ଏହି ସମୟରେ ଚାଷୀମାନଙ୍କ ସହିତ ଆଲୋଚନାକରି ସେ ମଧ୍ୟ କୃଷକ ପରିବାରରୁ ଆସିଛନ୍ତି ଏବଂ କୃଷିକୁ ସେ ଭଲ ପାଆନ୍ତି ବୋଲି କହିଥିଲେ। ଏବେ କୃଷି କାର୍ଯ୍ୟ ଆରମ୍ଭ କରିବାକୁ ସରକାର ଅନୁମତି ଦେଇଛନ୍ତି। ତେଣୁ ଚାଷ କାର୍ଯ୍ୟ ନେଇ ସେମାନଙ୍କ ସୁବିଧା ଅସୁବିଧା ବିଷୟରେ ମଧ୍ୟ ସେ ବୁଝିଥିଲେ। ଉଲ୍ଲେଖଯୋଗ୍ୟ, ରେଡ୍ଡି ଜଣେ ବିଏସ୍ସି(ଏଗ୍ରିକଲ୍ଚର) ଛାତ୍ର। ତେବେ ଜଣେ ଆଇପିଏସ୍ ଅଧିକାରୀଙ୍କ ଏଭଳି କାର୍ଯ୍ୟ ଦେଖି ଚାଷୀମାନେ ମଧ୍ୟ ଆଶ୍ଚର୍ଯ୍ୟ ହେବା ସହ ଖୁସି ବ୍ୟକ୍ତ କରିଛନ୍ତି। ଏସ୍ପି ଆହୁରି ମଧ୍ୟ କହିଛନ୍ତି, ଲୋକେ ସିନେମା, ପିକ୍ନିକ୍ ଯିବା ବଦଳରେ ବର୍ଷକୁ ଥରେ ନିଜ ଗାଁକୁ ଯାଇ ଚାଷୀଙ୍କ ସହ ସମୟ ବିତାଇବା ସହ ସେମାନଙ୍କୁ ସହଯୋଗର ହାତ ବଢ଼ାଇବା ଉଚିତ।