ଛେଣ୍ଡିପଦା, ୨୩।୪: (ସ୍ବ.ପ୍ର.) ଅନୁଗୋଳ ଜିଲା ଛେଣ୍ଡିପଦା ବ୍ଲକ ବରପଦା ପଞ୍ଚାୟତ ଗୋପୀବଲ୍ଲଭପୁରଠାରେ ନାଲ୍କୋର ଉତ୍କଳ ଡି ଓ ଇ କମ୍ପାନୀ ପକ୍ଷରୁ ପ୍ରସ୍ତାବିତ ଖଣି ଅଞ୍ଚଳରେ ଘରୋଇ କମ୍ପାନୀ ଦ୍ୱାରା ଖଣି ଖନନ କାର୍ଯ୍ୟକୁ ବିରୋଧ କରି ଆନ୍ଦୋଳନ ଚଳାଇଥିବା କ୍ଷତିଗ୍ରସ୍ତଙ୍କୁ ଶନିବାର ପୋଲିସ ଉଠାଇ ନେଇ ଥାନାରେ ଅଟକ ରଖିଛି।
କ୍ଷତିଗ୍ରସ୍ତମାନଙ୍କ କହିବା ଅନୁଯାୟୀ, ନାଲ୍କୋର ଖଣି ଖନନ ପାଇଁ ଠିକା ନେଇଥିବା ଉକ୍ତ ଘରୋଇ କମ୍ପାନୀ ଖଣି ଅଞ୍ଚଳରେ ମାଟି ଓ କୋଇଲା ଖନନ କାର୍ଯ୍ୟ ଜାରି ରଖିଛି। କିନ୍ତୁ ବିସ୍ଥାପିତ ଓ କ୍ଷତିଗ୍ରସ୍ତ ପ୍ରଜାମାନଙ୍କ ୩ ଦଫା ଦାବିକୁ କମ୍ପାନୀ କର୍ତ୍ତୃପକ୍ଷ ଏଯାଏ ପୂରଣ କରିନାହାନ୍ତି। ତେଣୁ ନାଣ୍ଡିଛୋଡ କ୍ଷତିଗ୍ରସ୍ତ ପ୍ରଜାମାନେ ଖଣି ଅଞ୍ଚଳରେ ଖନନ କାର୍ଯ୍ୟକୁ ବିରୋଧ କରିବା ସହିତ ଧାରଣାରେ ବସି ରହିଥିଲେ। ଏସବୁ ସମସ୍ୟାର ସମାଧାନ ପାଇଁ ପ୍ରଶାସନିକ ଅଧିକାରୀମାନେ ବୁଝାଶୁଝା ପାଇଁ ଉଦ୍ୟମ କରଥିଲେ ମଧ୍ୟ କୋଣସି ନିଷ୍କର୍ଷ ବାହାରିପାରି ନ ଥିଲା। ଏପରିକି ଛେଣ୍ଡିପଦା ତହସିଲଦାର କ୍ଷତିଗ୍ରସ୍ତ ପ୍ରଜା ଖଣି କାର୍ଯ୍ୟକୁ ବନ୍ଦ ନ କରି ଉପଜିଲାପାଳଙ୍କ ସହିତ ଆଲୋଚନା କରିବା ପାଇଁ ପ୍ରସ୍ତାବ ଦେଇଥିଲେ। କିନ୍ତୁ କମ୍ପାନୀ କର୍ତ୍ତୃପକ୍ଷ ଜମିହରାଙ୍କ ୩ ଦଫା ଦାବି ପୂରଣ ନ କରି ହଜାର ହଜାର ଟନ କୋଇଲା ଖନନ କରି ଗୋଟିଏ ସ୍ଥାନରେ ରଖୁଛନ୍ତି। ବର୍ତ୍ତମାନ ସୁଦ୍ଧା ଜମିହରା ପ୍ରଜା ତାଙ୍କର କ୍ଷତିପୂରଣ ରାଶି ଓ ଅନ୍ୟାନ୍ୟ ସୁବିଧା ସୁଯୋଗ ପାଇପାରିନାହାନ୍ତି କିମ୍ବା ନାଲକୋ କମ୍ପାନୀ ଏପର୍ଯ୍ୟନ୍ତ କୌଣସି କ୍ଷତିଗ୍ରସ୍ତଙ୍କୁ ନିଯୁକ୍ତି ପ୍ରଦାନ କରିନାହାନ୍ତି। ଯେ ପର୍ଯ୍ୟନ୍ତ ଦାବି ପୂରଣ ନ ହୋଇଛି ସେ ପର୍ଯ୍ୟନ୍ତ ଧାରଣାରେ ବସିବେ ବୋଲି କ୍ଷତିଗ୍ରସ୍ତମାନେ ଜିଦ ଧରି ବସିଥିଲେ। ପୋଲିସ ଓ ପ୍ରଶାସନ ଧାରଣାକାରୀଙ୍କୁ ବୁଝାଝୁଝା କରିବାରେ ବିଫଳ ହେବାରୁ ପ୍ରାୟ ୪୦ ଜଣ ମହିଳା ପୁରୁଷଙ୍କୁ ଉଠାଇ ନେଇ ଥାନାରେ ଅଟକ ରଖିଥିବା ସୂଚନା ମିଳିଛି।
