ନୂଆଦିଲ୍ଲୀ,୧-୧୧: ଦେଶର ବିତ୍ତୀୟ ନିଅଣ୍ଟ ବଜେଟ ହୋଇଥିବା ଧାର୍ଯ୍ୟ ଲକ୍ଷ୍ୟର ୯୩% ଛୁଇଁଛି। ଚଳିତ ଆର୍ଥତ୍କ ବର୍ଷର ସେପ୍ଟେମ୍ବର ମାସ ଶେଷ ସୁଦ୍ଧା ଏହା ୬.୫୨ ଲକ୍ଷ କୋଟି ଟଙ୍କା ଛୁଇଁଥିବା ସରକାର ଦେଇଥିବା ତଥ୍ୟରୁ ଏହା ଜଣାପଡିଛି। ସାଧାରଣତଃ ସରକାରଙ୍କ ଖର୍ଚ୍ଚ ଏବଂ ରାଜସ୍ବ ମଧ୍ୟରେ ରହିଥିବା ଅନ୍ତରକୁ ବିତ୍ତୀୟ ନିଅଣ୍ଟ କୁହାଯାଉଥିବା ବେଳେ ଏହା ସେପ୍ଟେମ୍ବର ୩୦ ସୁଦ୍ଧା ୬,୫୧,୫୫୪ କୋଟି ଟଙ୍କା ରହିଥିବା କଣ୍ଟ୍ରୋଲର ଜେନେରାଲ ଅଫ୍ ଆକାଉଣ୍ଟ (ସିଜିଏ) ଦେଇଥିବା ସୂଚନାରୁ ଜଣାପଡିଛି। ଗତ ବର୍ଷ ସମାନ ସମୟରେ ଏହା ୯୫.୩% ରହିଥିଲା। ଚଳିତ ଆର୍ଥତ୍କ ବର୍ଷରେ ବିତ୍ତୀୟ ନିଅଣ୍ଟକୁ ୭.୦୩ ଲକ୍ଷ କୋଟି ଟଙ୍କାରେ ସୀମିତ କରିବାକୁ ସରକାର ଲକ୍ଷ୍ୟ ରଖିଛନ୍ତି। ସେହିଭଳି ବିତ୍ତୀୟ ନିଅଣ୍ଟକୁ ମୋଟ ଜିଡିପିର ୩.୩%ରେ ସୀମିତ ରଖିବାକୁ ଯୋଜନା ରହିଛି। ମାନ୍ଦାବସ୍ଥା ଯୋଗୁ ସରକାର କର୍ପୋରେଟ ଟିକସ ହ୍ରାସ କରିଛନ୍ତି। ଏହା ଦ୍ୱାରା ରାଜକୋଷକୁ ୧.୪୫ ଲକ୍ଷ କୋଟି ଟଙ୍କା ହ୍ରାସ ଘଟିବ। ଚଳିତ ଆର୍ଥତ୍କ ବର୍ଷ ଏପ୍ରିଲ-ସେପ୍ଟେମ୍ବରରେ ବଜେଟରେ ଧାର୍ଯ୍ୟ ହୋଇଥିବା ରାଜସ୍ବ ସଂଗ୍ରହ ଲକ୍ଷ୍ୟ ତୁଳନାରେ ୪୧.୬% ବଢିଛି। ଏହା ଗତ ବର୍ଷ ସମାନ ସମୟରେ ୪୦.୧% ରହିଥିଲା। ସେପ୍ଟେମ୍ବର ଶେଷ ସୁଦ୍ଧା ସରକାର ୮.୧୬ ଲକ୍ଷ କୋଟି ଟଙ୍କାର ରାଜସ୍ବ ସଂଗ୍ରହ କରିଛନ୍ତି। ୨୦୧୯-୨୯ ଆର୍ଥତ୍କ ବର୍ଷ ଲାଗି ଟିକସ ସଂଗ୍ରହ ଲକ୍ଷ୍ୟ ୧୯.୬୨ ଲକ୍ଷ କୋଟି ଟଙ୍କା ରଖାଯାଇଛି। ସିଜିଏ ତଥ୍ୟ ମୁତାବକ ବର୍ତ୍ତମାନ ସମୟ ସୁଦ୍ଧା ବଜେଟ ଲକ୍ଷ୍ୟର ୫୫.୫% ପୁଞ୍ଜି ସରକାର ଖର୍ଚ୍ଚ କରିଛନ୍ତି। ଏହା ଗତ ବର୍ଷ ସମାନ ସମୟରେ ୫୪.୨% ରହିଥିଲା। ଚଳିତ ଆର୍ଥତ୍କ ବର୍ଷ ଏପ୍ରିଲ-ସେପ୍ଟେମ୍ବର ସମୟରେ ସରକାରଙ୍କ ମୋଟ ଖର୍ଚ୍ଚ ୧୪.୮୮ ଲକ୍ଷ କୋଟି ଟଙ୍କା ଛୁଇଁଛି। ସେହିଭଳି ସାରା ବର୍ଷ ଲାଗି ୨୭.୮୬ ଲକ୍ଷ କୋଟି ଟଙ୍କା ଖର୍ଚ୍ଚ କରିବାକୁ ସରକାର ଲକ୍ଷ୍ୟ ରଖିଥିବା ସିଜିଏ ତଥ୍ୟରୁ ସାମ୍ନାକୁ ଆସିଛି।