ମେଲବୋର୍ନ, ୧୪।୧ (ଏଏଫ୍ପି)- ରୁଷୀୟ ମହିଳା ଟେନିସ ତାରକା ମାରିଆ ଶାରାପୋଭା ଓ ଜର୍ମାନୀୟ ଲୌରା ସିଏଗମୁଣ୍ଡଙ୍କ ମଧ୍ୟରେ ଏଠାରେ ଅନୁଷ୍ଠିତ କୋୟୋଙ୍ଗ କ୍ଲାସିକର ଏକ ମ୍ୟାଚ୍ ଧୂଆଁ ଲାଗି ସ୍ଥଗିତ ରଖାଯାଇଛି। ଧୂଆଁ ଯୋଗୁ ମ୍ୟାଚ୍ ମଝିରେ ଶାରାପୋଭାଙ୍କ କାଶ ହୋଇଥିଲା। ମ୍ୟାଚ୍ ସ୍ଥଗିତ ରଖାଯିବାବେଳକୁ ବିଶ୍ୱର ପୂର୍ବତନ ଏକ ନମ୍ବର ଖେଳାଳି ଶାରାପୋଭା ୭-୬ (୭-୪), ୫-୫ରେ ପଛୁଆ ରହିଥିଲେ। ‘ମ୍ୟାଚ୍ ସ୍ଥଗିତ ରଖାଯିବା ଆୟୋଜକଙ୍କ ସଠିକ୍ ନିଷ୍ପତ୍ତି। ଆମେ ୨ ଘଣ୍ଟା ଧରି ଖେଳୁଛୁ। କିନ୍ତୁ ଦ୍ୱିତୀୟ ସେଟ୍ ଶେଷବେଳକୁ କାଶ ହୋଇଥିଲା’ ବୋଲି ଶାରାପୋଭା ମ୍ୟାଚ୍ ପରେ କହିଛନ୍ତି।
ଅଧାରୁ ଓହରିଲେ ଡାଲିଆ
ସେହିଭଳି ଧୂଆଁ ଲାଗି ଅଷ୍ଟ୍ରେଲିଆନ୍ ଓପନ୍ ଯୋଗ୍ୟତା ପର୍ଯ୍ୟାୟ ପ୍ରଥମ ଦିବସର କିଛି ମ୍ୟାଚ୍ ମଧ୍ୟ ବିଳମ୍ବରେ ଆରମ୍ଭ ହୋଇଥିଲା। ଯୋଗ୍ୟତା ପର୍ଯ୍ୟାୟ ମହିଳା ସିଙ୍ଗଲ୍ସର ଏକ ମ୍ୟାଚ୍ ଅବସରରେ ସ୍ଲୋଭେନିଆର ଡାଲିଆ ଜକୁପୋଭିକ ଧୂଆଁଳିଆ ପରିବେଶ ଲାଗି ଅସୁସ୍ଥ ହୋଇପଡ଼ିଥିଲେ। ସେ ସୁଇଜରଲାଣ୍ଡର ଷ୍ଟିଫାନି ଭୋଏଗେଲେଙ୍କ ବିପକ୍ଷରେ ମଙ୍ଗଳବାର ଅପରାହ୍ନରେ ଏହି ମ୍ୟାଚ୍ ଖେଳୁଥିଲେ। କିନ୍ତୁ ମ୍ୟାଚ୍ ମଝିରେ ସେ ଅସୁସ୍ଥ ହୋଇ କୋର୍ଟ ଉପରେ ଆଣ୍ଠୁମାଡ଼ି ବସି ପଡ଼ିଥିଲେ। ଏହାପରେ ତାଙ୍କୁ ମେଡିକାଲ ଷ୍ଟାଫ୍ଙ୍କ ଜରିଆରେ କୋର୍ଟ ବାହାରକୁ ନିଆଯାଇଥିଲା। ଉଲ୍ଲେଖଯୋଗ୍ୟ, କିଛିଦିନ ହେବ ଅଷ୍ଟ୍ରେଲିଆ ଜଙ୍ଗଲରେ ଭୟଙ୍କର ନିଆଁ ଯୋଗୁ ବ୍ୟାପକ କ୍ଷୟକ୍ଷତି ହୋଇଛି। ଏହି କାରଣରୁ ଅଷ୍ଟ୍ରେଲିଆର ୨ୟ ବୃହତ୍ ସହତ ମେଲବୋର୍ନ ମଧ୍ୟ ଏହି ଧୂଆଁ ଯୋଗୁ ପ୍ରଭାବିତ ହୋଇଛି।