ମୁମ୍ବାଇ,୨୦।୪: ଆଇପିଏଲ ୨୦୨୧ରେ ରାଜସ୍ଥାନ ରୟାଲ୍ସ (ଆରଆର) ପାଇଁ ଖେଳୁଥିବା ବାମହାତୀ ଦ୍ରୁତ ବୋଲର ଚେତନ ସାକରିଆ ତାଙ୍କ ଖେଳ ଦ୍ୱାରା ସମସ୍ତଙ୍କୁ ପ୍ରଭାବିତ କରିଛନ୍ତି। ସୋମବାର ଚେନ୍ନାଇ ସୁପର କିଙ୍ଗ୍ସ (ସିଏସକେ) ବିପକ୍ଷ ମ୍ୟାଚରେ ସେ ୩ଟି ଉଇକେଟ ନେଇଥିଲେ। ଏଥିରେ ଅଧିନାୟକ ମହେନ୍ଦ୍ର ସିଂ ଧୋନୀ ଏବଂ ସୁରେଶ ରାଇନାଙ୍କ ଗୁରୁତ୍ୱପୂର୍ଣ୍ଣ ଉଇକେଟ ରହିଛି। ଯଦିଓ ତାଙ୍କ ଦଳ ମ୍ୟାଚକୁ ୪୫ ରନରେ ହରାଇଥିଲା କିନ୍ତୁ ସାକାରିଆ ନିଜର ଛାପ ଛାଡିବାରେ ସଫଳ ହୋଇଥିଲେ। ସେ ୪ ଓଭରରେ ୩୬ ରନ ଦେଇ ୩ଟି ଉଇକେଟ ନେଇଥିଲେ।
ମ୍ୟାଚ ପରେ ଚେତନ ଇନଷ୍ଟାଗ୍ରାମରେ ଧୋନୀଙ୍କ ସହ ନିଜର ଏକ ଫଟୋ ଶେୟାର କରିଛନ୍ତି। ଏହା ସହିତ ସେ ଲେଖିଛନ୍ତି ଯେ, ମୁଁ ପିଲାଦିନରୁ ତୁମକୁ ପସନ୍ଦ କରେ ଏବଂ ଆଜି ତୁମ ବିପକ୍ଷରେ ମ୍ୟାଚ ଖେଳିବାର ସୁଯୋଗ ପାଇଲି। ଏହା ମୋ ଜୀବନର ସବୁଠାରୁ ସୁନ୍ଦର ମୁହୂର୍ତ୍ତ, ଯାହା ମୁଁ ଯୁଗ ଯୁଗ ଧରି ମନେ ରଖିବି। ତୁମ ପରି ଆଉ କେହି ହୋଇପାରିବ ନାହିଁ। ମୋ ଭଳି ଖେଳାଳିଙ୍କୁ ପ୍ରେରଣା ଦେଇଥିବାରୁ ଧନ୍ୟବାଦ। ଚେତନ ସିଏସକେ ବିପକ୍ଷରେ ୩ଟି ଉଇକେଟ ନେବା ପୂର୍ବରୁ ପଞ୍ଜାବ କିଙ୍ଗ୍ସ ବିପକ୍ଷରେ ସମାନ ସଂଖ୍ୟକ ଉଇକେଟ ନେଇଥିଲେ। ଆଇପିଏଲରେ ଏହା ତାଙ୍କର ପ୍ରଥମ ମ୍ୟାଚ ଥିଲା। ଏହି ମ୍ୟାଚରେ ସାକାରିଆ ୩୧ ରନ ପାଇଁ ୩ଟି ଉଇକେଟ ନେଇଥିଲେ।
ଚେତନଙ୍କ ପାଇଁ ଏଠାରେ ପହଞ୍ଚିବା ଯାତ୍ରା ସହଜ ହୋଇନାହିଁ। ତାଙ୍କ ପିତା ଜଣେ ଅଟୋ ଡ୍ରାଇଭର ଥିଲେ। କିନ୍ତୁ କିଛି ବର୍ଷ ପୂର୍ବେ ସେ ଏକ ଦୁର୍ଘଟଣାର ଶିକାର ହୋଇଥିଲେ। ଏହା ପରେ ପରିବାରର ଦାୟିତ୍ୱ ଚେତନଙ୍କ ଉପରକୁ ଆସିଲ। ତଥାପି, ସେ ସାହସ ହରାଇଲେ ନାହିଁ। ପରିବାର ସହିତ କ୍ରିକେଟ ଖେଳିବା ଜାରି ରଖିଥିଲେ। ଚଳିତ ବର୍ଷ ଜାନୁୟାରୀରେ ତାଙ୍କ ସାନଭାଇ ଆତ୍ମହତ୍ୟା କରିଥିଲେ। ସେତେବେଳେ ଚେତନ ସୟଦ ମୁସ୍ତାକ ଅଲି ଟ୍ରଫି ଖେଳୁଥିଲେ। ତେଣୁ ପରିବାର ଲୋକଙ୍କୁ ଏ ବିଷୟରେ ଜଣାଇ ନଥିଲେ। ସେ ଘରକୁ ଫେରିବା ପରେ ତାଙ୍କ ସାନଭାଇଙ୍କ ମୃତ୍ୟୁ ବିଷୟରେ ଜାଣିବାକୁ ପାଇଲେ। ସେ ଏହା ଦ୍ୱାରା ଏତେ ଭାଙ୍ଗି ଯାଇଥିଲେ ଯେ ସେମାନେ ଅନେକ ଦିନ ପର୍ଯ୍ୟନ୍ତ ଖାଇବା ଛାଡିଦେଇଥିଲେ। ଚଳିତ ବର୍ଷ ଆଇପିଏଲ ନିଲାମରେ ଚେତନଙ୍କ ମୂଳ ମୂଲ୍ୟ ୨୦ ଲକ୍ଷ ଟଙ୍କା ଥିଲା। ଶେଷରେ ରାଜସ୍ଥାନ ତାଙ୍କୁ ୧.୨ କୋଟି ଟଙ୍କାରେ କିଣିଥିଲା।