ମାଞ୍ଚେଷ୍ଟର,୨୮।୬ (ପି.ଟି.)- ବିଶ୍ୱକପ୍ରେ ଗତ କେତୋଟି ମ୍ୟାଚ୍ରେ ମନ୍ଥର ବ୍ୟାଟିଂ କରି ବେଶ୍ ସମାଲୋଚିତ ହୋଇଥିବା ଅଭିଜ୍ଞ ମହେନ୍ଦ୍ର ସିଂ ଧୋନୀଙ୍କୁ କିନ୍ତୁ ଅଧିନାୟକ ବିରାଟ କୋହଲି ସମର୍ଥନ କରି ଭୂୟସି ପ୍ରଶଂସା କରିଛନ୍ତି। ଧୋନୀ କ୍ରିକେଟର ଜଣେ କିମ୍ବଦନ୍ତୀ ବୋଲି ସେ କହିଛନ୍ତି। ଧୋନୀ ପୂର୍ବରୁ ଆମକୁ ଏକାଧିକ ମ୍ୟାଚ୍ରେ ଜିତାଇଛନ୍ତି। ତାଙ୍କ ଅଭିଜ୍ଞତା ଦଳ ପାଇଁ ଆଶୀର୍ବାଦ ସଦୃଶ ହୋଇଛି। ଓ୍ବେଷ୍ଟଇଣ୍ଡିଜକୁ ହରାଇବାରେ ଧୋନଙ୍କ ଗୁରୁତ୍ୱପୂର୍ଣ୍ଣ ଭୂମିକା ମଧ୍ୟ ରହିଛି। ପ୍ରତିକୂଳ ପରିସ୍ଥିତିରେ ୩୮ ବଲରୁ ଦ୍ରୁତ ୪୬ ରନ କରିଥିବା ହାର୍ଦ୍ଦିକ ପାଣ୍ଡ୍ୟାଙ୍କୁ ମଧ୍ୟ କୋହଲି ପ୍ରଶଂସା କରିଛନ୍ତି। ୨୭୦ ରନ ଏକ ଭଲ ସ୍କୋର ଥିଲା କୋହଲି କହିଛନ୍ତି। ଅନ୍ୟପଟେ ପରାଜୟ ପାଇଁ ଦୁର୍ବଳ ବ୍ୟାଟିଂକୁ ଦାୟୀ କରିଛନ୍ତି ଓ୍ବେଷ୍ଟଇଣ୍ଡିଜ ଅଧିନାୟକ ଜାସନ ହୋଲ୍ଡର। ଉଲ୍ଲେଖଥାଉ କି, ସ୍ଥିର ପ୍ରଦର୍ଶନ କାରଣରୁ ଭାରତ ଆଇସିସି ଦିନିକିଆ ର଼୍ୟାଙ୍କିଙ୍ଗ୍ରେ ଇଂଲଣ୍ଡକୁ ହଟାଇ ଶୀର୍ଷ ସ୍ଥାନ ଅଧିକାର କରିଛି।