ମୁମ୍ବାଇ, ୨୯।୩- ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ଭାରତୀୟ ଦଳକୁ ପ୍ରତ୍ୟାବର୍ତ୍ତନ ନେଇ ଅନିଶ୍ଚିତତା ଧିରେ ଧିରେ ବଢ଼ିବାରେ ଲାଗିଛି। ୨୦୨୦ ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ)ରେ ପ୍ରଭାବୀ ପ୍ରଦର୍ଶନ କରି ଅଷ୍ଟ୍ରେଲିଆରେ ହେବାକୁଥିବା ଟି୨୦ ବିଶ୍ୱକପ ପାଇଁ ଭାରତୀୟ ଦଳରେ ସେ ସ୍ଥାନ ପାଇବେ ବୋଲି ଆଶା କରାଯାଉଥିଲା। ଧୋନୀ ଚେନ୍ନାଇ ସୁପରକିଙ୍ଗ୍ସ ଦଳର ଅଧିନାୟକ ପଦ ମଧ୍ୟ ବଜାୟ ରଖିଥିଲେ। ମାତ୍ର କୋଭିଡ-୧୯ ସଂକ୍ରମଣ ଯୋଗୁ ଏବେ ସାରା ଭାରତ ଲକ୍ଡାଉନ୍ ଥିବାରୁ ବ୍ୟୟବହୁଳ ଆଇପିଏଲ ଆରମ୍ଭ ହେବାନେଇ ଆଶଙ୍କା ବଢ଼ିବାରେ ଲାଗିଛି। ମାର୍ଚ୍ଚ ୨୯ରେ ଆରମ୍ଭ ହେବାକୁଥିବା ଆଇପିଏଲକୁ ଏପ୍ରିଲ ୧୫ ପର୍ଯ୍ୟନ୍ତ ଘୁଞ୍ଚାଇ ଦିଆ ଯାଇଛି। ମାତ୍ର ଏହି ପ୍ରତିଯୋଗିତା ଏପ୍ରିଲରେ ମଧ୍ୟ ଆରମ୍ଭ ହେବା କମ୍ ସମ୍ଭାବନା ରହିଛି। ଏପରିକି ଅନ୍ୟ ବଡ଼ ପ୍ରତିଯୋଗିତା ପରି ଏହା ବାତିଲ ହେବା ସ୍ଥିତିରେ ମଧ୍ୟ ରହିଛି। ଏପରି ସ୍ଥିତିରେ ଧୋନୀ ଜାତୀୟ ଦଳକୁ ପ୍ରତ୍ୟାବର୍ତ୍ତନ କରିବା କଷ୍ଟକର ବୋଲି ଆଲୋଚନା ହେଉଛି। ଧୋନୀ ଶେଷଥରପାଇଁ ଗତବର୍ଷ ଆଇସିସି ବିଶ୍ୱକପରେ ଭାରତ ପକ୍ଷରୁ ଖେଳିଥିଲେ।
ପ୍ରତିଷ୍ଠିତ କ୍ରିକେଟ ଭାଷ୍ୟକାର ହର୍ଷ ଭୋଗ୍ଲେ ମଧ୍ୟ ସମାନ ମତ ଦେଇଛନ୍ତି। ”ଧୋନୀ କ’ଣ ଚିନ୍ତା କରୁଛନ୍ତି ତାହା ଜାଣିବା ଅସମ୍ଭବ। ସେ ସମ୍ପର୍କରେ ଆଭାସ ପାଇବା ମଧ୍ୟ ସମ୍ଭବ ନୁହେଁ। ଆଗାମୀ ଦିନରେ କ’ଣ ନିଷ୍ପତ୍ତି ନେବେ ତାହା ସେ କେବଳ ଜାଣିଛନ୍ତି। ତେବେ ଅଧିନାୟକ ପଦ କିମ୍ବା ଟେଷ୍ଟ କ୍ରିକେଟ ଛାଡ଼ିବାପରି ତାଙ୍କ ପ୍ରସ୍ଥାନ ମଧ୍ୟ ସେପରି ଭଲଭାବେ ହେବ ନାହିଁ ବୋଲି ମୁଁ ଅନୁଭବ କରୁଛି। ଧୋନୀ କ୍ରିକେଟ ଛାଡ଼ିଛନ୍ତି ବୋଲି ହଠାତ ଦିନେ ଶୁଣିବାକୁ ମିଳିପାରେ। ଭାରତୀୟ ଦଳକୁ ତାଙ୍କର ପ୍ରତ୍ୟାବର୍ତ୍ତନ ସମ୍ଭାବନା ଶେଷ ହୋଇଯାଇଛି ବୋଲି ଅନୁଭବ ହେଉଛି। ଆଇପିଏଲରେ ପ୍ରଭାବୀ ପ୍ରଦର୍ଶନ କରିଥିଲେ କିଛି ସମ୍ଭାବନା ରହିଥାନ୍ତା। ସାମ୍ପ୍ରତିକ ସ୍ଥିତିରେ ଧୋନୀ ଆଇସିସି ବିଶ୍ୱକପ ପାଇଁ ସେପ୍ଟେମ୍ବର-ଅକ୍ଟୋବର କିମ୍ବା ଅକ୍ଟୋବର-ନଭେମ୍ବରକୁ ଅପେକ୍ଷା କରିବେ ଭାବି ପାରୁନି“ ବୋଲି ଭୋଗ୍ଲେ ପ୍ରକାଶ କରିଛନ୍ତି। ତେବେ ସେ ଚେନ୍ନାଇ ଫ୍ରାଞ୍ଚାଇଜ୍ ପକ୍ଷରୁ ଆଇପିଏଲ ଖେଳିବା ଜାରି ରଖିବା ସମ୍ଭାବନା ଅଛି ବୋଲି ଭୋଗ୍ଲେ କହିଛନ୍ତି।