ମୁମ୍ବାଇ,୨।୮- ନ୍ୟୁଜିଲାଣ୍ଡ ବିପକ୍ଷ ବିଶ୍ୱକପ୍ ସେମିଫାଇନାଲରେ ମହେନ୍ଦ୍ର ସିଂ ଧୋନୀଙ୍କୁ ୭ ନଂରେ ବ୍ୟାଟିଂ ପାଇଁ ଛାଡ଼ିବା ନେଇ ଚାଲିଥିବା ଚର୍ଚ୍ଚା ଏପର୍ଯ୍ୟନ୍ତ ଥମି ନାହିଁ। ଏ ଘଟଣା ସମ୍ପର୍କରେ ପ୍ରଥମ ଥର ଲାଗି ମୁହଁ ଖୋଲିଛନ୍ତି ବ୍ୟାଟିଂ କୋଚ୍ ସଞ୍ଜୟ ବାଙ୍ଗର। ଏହି ନିଷ୍ପତ୍ତି ମୁଁ ଏକାକୀ ନେଇ ନ ଥିଲି। ଆମେ ପରିସ୍ଥିତିକୁ ମୂଲ୍ୟାୟନ କରିବା ପରେ ଧୋନୀଙ୍କୁ ୭ନଂରେ ବ୍ୟାଟିଂ ପାଇଁ ଛାଡ଼ିବା ନିଷ୍ପତ୍ତି ନେଇଥିଲୁ। ବିଶ୍ୱକପ୍ ଆରମ୍ଭରୁ ବ୍ୟାଟିଂ ଗ୍ରୁପକୁ କେତେକ ନିର୍ଦ୍ଦିଷ୍ଟ ଦାୟିତ୍ୱ ଦିଆଯାଇଥିଲା। ଏପରି କି ମ୍ୟାଚ୍ର ସ୍ଥିତି ଅନୁଯାୟୀ ଆମେ ମଧ୍ୟକ୍ରମର ୫ମ, ୬ଷ୍ଠ ଓ ୭ମରେ କେଉଁ ବ୍ୟାଟ୍ସମ୍ୟାନ ଖେଳିବେ ତାହା ଆମେ ବିଚାର କରୁଥିଲୁ। ଆଫଗାନିସ୍ତାନ ବିପକ୍ଷ ମ୍ୟାଚ୍ ପରେ ଧୋନୀଙ୍କୁ ନିମ୍ନ କ୍ରମରେ ଛଡ଼ାଯିବା ନେଇ ଅଧିନାୟକ ବିରାଟ କୋହଲିଙ୍କ ସହ ଆଲୋଚନା ପରେ ଧାର୍ଯ୍ୟ ହୋଇଥିଲା। କାରଣ ୩୫ରୁ ଶେଷ ଓଭର ପର୍ଯ୍ୟନ୍ତ ଧୋନୀଙ୍କ ଉପସ୍ଥିତି ଦରକାର ଥିଲା। ନିମ୍ନ କ୍ରମର ବ୍ୟାଟ୍ସମ୍ୟାନଙ୍କ ସହ ବ୍ୟାଟିଂ କରିବାର ଧୋନୀଙ୍କ ବେଶ୍ ଦକ୍ଷତା ରହିଛି। ଏଣୁ ତାଙ୍କୁ ୭ମ ସ୍ଥାନରେ ବ୍ୟାଟିଂ କରିବାକୁ ଛଡ଼ା ଯାଇଥିଲା। ଗୋଟିଏ ପରେ ଗୋଟିଏ ଉଇକେଟ ପଡ଼ିବା କାରଣରୁ ଦୀନେଶ କାର୍ତ୍ତିକଙ୍କୁ ୫ମ କ୍ରମରେ ଛଡ଼ା ଯାଇଥିଲା। ଆଉ ଧୋନୀଙ୍କୁ ମ୍ୟାଚ୍ ଶେଷ କରିବା ଲାଗି ରଖାଯାଇଥିଲା। ଏହାକୁ କୋଚ୍ ରବି ଶାସ୍ତ୍ରୀ ଟିମ୍ ମ୍ୟାନେଜମେଣ୍ଟ ନିଷ୍ପତ୍ତି ଥିତ୍ଲା ବୋଲି କହିଥିଲେ। ହେଲେ ମୁଁ ଜାଣିପାରୁ ନାହିଁ ଏଥିନେଇ କେବଳ ମୋତେ କାହିଁକି ଦାୟୀ କରାଯାଉଛି ବୋଲି ସେ କହିଛନ୍ତି। ଉଲ୍ଲେଖଥାଉ କି, ତାଙ୍କ କାର୍ଯ୍ୟକାଳରେ ଭାରତୀୟ ଦଳ ୫୦ ଟେଷ୍ଟ ଓ ୧୧୯ ଦିନିକିଆ ଖେଳିସାରିଛି।