ନୂଆଦିଲ୍ଲୀ,୧୭।୭- ଆଇସିସି ବିଶ୍ୱକପ୍ରେ ଭାରତୀୟ ଦଳର ଅଭିଯାନ ଶେଷ ହେବା ପରେ ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ଭବିଷ୍ୟତ ନେଇ ଅନିଶ୍ଚିତତା ଲାଗି ରହିଛି। କେତେକ ରିପୋର୍ଟ ଅନୁଯାୟୀ, ଓ୍ବେଷ୍ଟଇଣ୍ଡିଜ ଗସ୍ତ ଲାଗି ଘୋଷିତ ହେବାକୁ ଥିବା ଟି୨୦ ଓ ଦିନିକିଆ ଦଳରେ ଧୋନୀଙ୍କୁ ସ୍ଥାନ ମିଳିବ ନାହିଁ। ମାତ୍ର ଦଳ ଘୋଷଣା ହେବା ପୂର୍ବରୁ ଧୋନୀଙ୍କ ସହ ଚୟନକର୍ତ୍ତା ତାଙ୍କ ଭବିଷ୍ୟତ ଯୋଜନା ସମ୍ପର୍କରେ ଆଲୋଚନା କରିବେ। ଇଂଲିଶ ଖବରକାଗଜ ଟାଇମ୍ସ ଅଫ୍ ଇଣ୍ଡିଆରେ ପ୍ରକାଶ ପାଇଥିବା ରିପୋର୍ଟରେ ଦର୍ଶାଯାଇଛି ଯେ, ଓ୍ବେଷ୍ଟଇଣ୍ଡିଜ ବିପକ୍ଷରେ ଖେଳାଯିବାକୁ ୩ ଲେଖାଏ ଟି୨୦ ଓ ଦିନିକିଆ ମ୍ୟାଚ୍ ବିଶିଷ୍ଟ ସିରିଜ୍ ଲାଗି ଧୋନୀ ଉପଲବ୍ଧ ନାହାନ୍ତି। ଆଶା କରାଯାଉଛି ସେ ଭାରତୀୟ ଦଳରେ ଆରମ୍ଭ ହେବାକୁ ଥିବା ଟ୍ରାନ୍ଜିଶନ ଫେଜର ଅଂଶ ହେବେ। ଯେଉଁଥିରେ ଜଣେ ନୂଆ ଖେଳାଳି ଧୋନୀଙ୍କ ସ୍ଥାନ ନେବ। ଧୋନୀ ଓ୍ବେଷ୍ଟଇଣ୍ଡିଜ ଗସ୍ତ କରିବେ ନାହିଁ। ତାଙ୍କ ବଦଳରେ ରିଷଭ ପନ୍ତ ପ୍ରଥମ ଉଇକେଟକିପର ବିକଳ୍ପ ଭାବେ ଭାରତୀୟ ଦଳର ଅଂଶ ହୋଇ ରହିବେ। ତାଙ୍କୁ ଯଥେଷ୍ଟ ସମୟ ଦିଆଯିବ। ଧୋନୀଙ୍କୁ ୧୫ ଜଣିଆରେ ଦଳରେ ସ୍ଥାନ ମିଳିବ, ହେଲେ ଚୂଡ଼ାନ୍ତ ଏକାଦଶରେ ନୁହେଁ। ଭାରତୀୟ ଦଳକୁ ଏବେ ମାର୍ଗଦର୍ଶକଙ୍କ ଆବଶ୍ୟକ ରହିଛି। ଏଭଳି ପରିସ୍ଥିତିରେ ଧୋନୀ ଦଳଠାରୁ ଦୂରରେ ରହିବା ଭଲ ନୁହେଁ। ରିଷଭଙ୍କ ବ୍ୟତୀତ ସିନିୟର ଉଇକେଟକିପର ଦୀନେଶ କାର୍ତ୍ତିକ ମଧ୍ୟ ବିକଳ୍ପ ଭବେ ଉପଲବ୍ଧ ଅଛନ୍ତି। ହେଲେ ତାଙ୍କ ଭବିଷ୍ୟତ ସମ୍ପୂର୍ଣ୍ଣ ଭାବେ ଚୟନକର୍ତ୍ତାଙ୍କ ଉପରେ ନିର୍ଭର କରେ।