ଭୁବନେଶ୍ୱର, ୬ା୧୨ (ସ୍ପୋଟର୍ସ ବ୍ୟୁରୋ)-ହକି କିମ୍ବଦନ୍ତୀ ଧ୍ୟାନଚାନ୍ଦଙ୍କୁ ଭାରତ ରତ୍ନ ପୁରସ୍କାର ପ୍ରଦାନ ଦାବି ସପକ୍ଷରେ ଅଧିକରୁ ଅଧିକ ସଂଖ୍ୟାରେ ଜନମତ ସଂଗ୍ରହ ପାଇଁ ଓହୁ ମାର୍କେଟିଂ ଏବଂ ନ୍ୟୁଜବିଟ୍ ମାଗାଜିନ ସହିତ ଏହାର ପ୍ରଚାର ଅଭିଯାନ ଜାରି ରଖିଛି ସିଗ୍ନେଚର ୨୪ ପ୍ରଡକ୍ସନ୍ସ। ସଂସ୍ଥା ତରଫରୁ ଡିଜିଟାଲ ପ୍ରଚାର ଅଭିଯାନ ୨୦୧୯ରେ ଧ୍ୟାନଚାନ୍ଦଙ୍କ ୧୧୪ ତମ ଜନ୍ମ ଦିବସରୁ ଆରମ୍ଭ କରାଯାଇଛି। ଏହାର ଶୀର୍ଷକ ରଖାଯାଇଛି ”ଭାରତ ରତ୍ନ ଫର୍ ଧ୍ୟାନଚାନ୍ଦ ଡିଜିଟାଲ କ୍ୟାମ୍ପେନ୍“। ସୌରଭ ଗାଙ୍ଗୁଲି, ବାବୁସାନ ମହାନ୍ତି, ରାଚେଲ ହ୍ବାଇଟ୍ଙ୍କ ସହିତ ଫେସ୍ବୁକ୍ ଏବଂ ଅନ୍ୟ ସୋସିଆଲ ମିଡିଆ ଗୁଡ଼ିକରେ ଡିଜିଟାଲ ପ୍ରଚାର ଅଭିଯାନ ଇତିମଧ୍ୟରେ ୧୦୦ ଦିନ ପୂରଣ ହୋଇଛି। ବିଭିନ୍ନ ରାଜ୍ୟର ବହୁ ସେଲିବ୍ରିଟିଙ୍କ ସମର୍ଥନ ହାସଲ କରାଯାଇପାରିଛି। ସେମାନଙ୍କ ମଧ୍ୟରେ ରହିଛନ୍ତି ରଞ୍ଜନ ନେଗି, ଇନ୍ଦ୍ରୋନିଲ ମୁଖାର୍ଜୀ, ନିଲ୍ ରୟ, ଅପରୂପ ଚକ୍ରବର୍ତ୍ତୀ, ରିଜଓ୍ବାନ ଶେଖ୍, ହର୍ବିନ୍ଦର ସିଂ, ବିନିତ୍ କୁମାର, ଚନ୍ଦନ ରୟ, ସତ୍ୟପୀର ପ୍ରଧାନ ଏବଂ ଧ୍ୟାନଚାନ୍ଦଙ୍କ ପୁତ୍ର ଅଶୋକ କୁମାର। ସିଗ୍ନେଚର ୨୪ ପ୍ରଡକ୍ସନର ପ୍ରତିଷ୍ଠାତା ନିର୍ଦ୍ଦେଶକ ଜୋୟିତା ରୟ ଏହି ସୂଚନା ଦେଇଛନ୍ତି। ସଂସ୍ଥାର ପରିଚାଳନା ନିର୍ଦ୍ଦେଶକ ପ୍ରତୀକ କୁମାର ମିଶ୍ର କହିଛନ୍ତି, ଆମେ ଇତିମଧ୍ୟରେ ସରକାରଙ୍କ ଦୃଷ୍ଟି ଆକର୍ଷଣ କରିବାରେ କେତେକାଂଶରେ ସଫଳ ହୋଇପାରିଛୁ। ଇନ୍ଷ୍ଟାଗ୍ରାମ୍ରେ ଆମ ଲେଖାକୁ କେନ୍ଦ୍ର କ୍ରୀଡ଼ାମନ୍ତ୍ରୀ କିରେନ ରିଜିଜୁ ଅନେକ ଥର ଲାଇକ୍ କରିଛନ୍ତି। ପୁରୀର ଅନ୍ତର୍ଜାତୀୟ ବାଲୁକା ଶିଳ୍ପୀ ମାନସ କୁମାର ଆମ ପ୍ରଚାର ଅଭିଯାନରେ ସାମିଲ ହୋଇଛନ୍ତି। ହକି ଯାଦୁକର ଧ୍ୟାନଚାନ୍ଦଙ୍କର ଏକ ବାଲୁକା ଆନିମେଶନ ଭିଡିଓ ସେ ପ୍ରସ୍ତୁତ କରଥିବା ଜୋୟିତା ରୟ ସୂଚନା ଦେଇ କହିଛନ୍ତି।