ଭୁବନେଶ୍ୱର,୨୬ା୧୧(ବ୍ୟୁରୋ): ନିଜକୁ ଜଣେ କମର୍ସିଆଲ ଟ୍ୟାକ୍ସ ଅଫିସର ଭାବେ ପରିଚୟ ଦେଉଥିଲେ। ମୋବାଇଲ୍ ନମ୍ବର ଟ୍ରୁ-କଲରରେ ନିଜର ଭିନ୍ନ ଭିନ୍ନ ନାମ ସହ କେତେବେଳେ ସରକାରୀ ଅଫିସର ତ ପୁଣି ଗୁଗୁଲ୍ର ସର୍କଲ ରିଜିଓନାଲ ମ୍ୟାନେଜର ବୋଲି ରଖୁଥିଲେ। ବଡ଼ ବଡ଼ ବ୍ୟବସାୟୀ ଓ ଶୋ’ରୁମ୍ ମାଲିକଙ୍କୁ ନାନା ଧମକ ଦେଇ କେତେବେଳେ ଟଙ୍କା ତ ଆଉ କେତେବେଳେ ଦାମୀ ସାମଗ୍ରୀ ନେଉଥିଲେ। ଏହି ନକଲି କମର୍ସିଆଲ ଟ୍ୟାକ୍ସ ଅଫିସରଙ୍କୁ କମିଶନରେଟ ପୋଲିସର ସ୍ପେଶାଲ ସ୍କ୍ବାଡ୍ ଗିରଫ କରିଛି। ସେ ହେଲେ କଳିଙ୍ଗନଗର ପ୍ଲଟ୍ ନଂ.କେ-୭ରେ ରହୁଥିବା ସୂର୍ଯ୍ୟକାନ୍ତ ଓରଫ ସୌମ୍ୟଜିତ୍ ତ୍ରିପାଠୀ। ତାଙ୍କ ନାମରେ ଶହୀଦନଗର ଥାନାରେ ୩ଟି ମାମଲା ରୁଜୁ ହୋଇଛି। ତାଙ୍କଠାରୁ ପୋଲିସ ୬ ଲାପ୍ଟପ୍, ୧୦ଲକ୍ଷ ଟଙ୍କାର ମୋବାଇଲ୍ ଫୋନ୍, ସିପିୟୁ, ପ୍ରିଣ୍ଟିଂ ମେଶିନ ଜବତ କରିଛି। ତାଙ୍କ ନାମରେ ଅଭିଯୋଗ ସଂଖ୍ୟା ବଢ଼ି ଚାଲିଥିବାବେଳେ ପୋଲିସ ପଚରାଉଚରା ପରେ କୋର୍ଟଚାଲାଣ କରିଛି।
ପୋଲିସ ସୂଚନାନୁଯାୟୀ, ସୌମ୍ୟଜିତ୍ ମେକାନିକାଲ ଇଞ୍ଜିନିୟରିଂ ପଢ଼ିଛନ୍ତି। ଚାକିରି ନ ପାଇବାରୁ ଏଭଳି ଠକେଇ କରିବାକୁ ଅଭିନବ ପନ୍ଥା ଆପଣାଇଥିଲେ। କମର୍ସିଆଲ ଟ୍ୟାକ୍ସ ଅଫିସର ବିପିନ ବିହାରୀ ତ୍ରିପାଠୀ ପରିଚୟ ଦେଇ ଇଲେକ୍ଟ୍ରୋନିକ୍ସ ଶୋ’ରୁମ୍ ମାଲିକଙ୍କୁ ଫୋନ୍ କରି ତାଙ୍କ ଅଫିସ ପାଇଁ ଆବଶ୍ୟକ ସାମଗ୍ରୀର ଅର୍ଡର ଦେଉଥିଲେ। ଜଣେ ପିଅନ୍ଙ୍କୁ ପଠାଉଛି, ଟଙ୍କା ପରେ ନେଇଯିବାକୁ କହୁଥିଲେ। ଶୋ’ରୁମ୍ ମାଲିକ ରାଜି ନ ହେଲେ ତାଙ୍କୁ ଟ୍ୟାକ୍ସ ଫାଙ୍କିଥିବା କେସ୍ରେ ଫସାଇଦେବାକୁ ଧମକ ଦେଉଥିଲେ। ଶୋ’ରୁମ୍ ମାଲିକମାନେ ତାଙ୍କ ମୋବାଇଲ୍ ନମ୍ବର ଟ୍ରୁ କଲର ଦେଖି ବିଶ୍ୱାସ କରି ନେଉଥିଲେ। ଏହାପରେ ଶୋ’ରୁମ୍ରୁ ମନଇଚ୍ଛା ବିଭିନ୍ନ ସାମଗ୍ରୀ ନେଇ ବାହାରେ ବିକ୍ରି କରୁଥିଲେ ସୌମ୍ୟଜିତ୍। ଟଙ୍କା ନ ଦେଇ ଡରାଉଥିଲେ। ଏହିଭଳି ସେ ବିଏମ୍ସି ମଲ୍ରେ ଥିବା ପ୍ରୋପ୍-ଦିଭା ଇଣ୍ଟରପ୍ରାଇଜେସ୍ ମାଲିକ ନିକୁଞ୍ଜ ଖେମାନୀଙ୍କଠାରୁ ଗତ ୧୯ ତାରିଖରେ ୧୧ ଆଇଫୋନ୍ ନେଇ ଟଙ୍କା ଦେଇ ନ ଥିଲେ। ସନ୍ଦେହ ହେବାରୁ ନିକୁଞ୍ଜ ଶହୀଦନଗର ଥାନାରେ ଅଭିଯୋଗ କରିଥିଲେ। ପୋଲିସ କେସ୍ ନଂ-୬୧୩/୧୯ ମାମଲା ରୁଜୁ କରିଥିଲା। ସେହିଭଳି ସମାନ ଠକେଇର ଶିକାର ହୋଇଥିବା ଏହି ଥାନାଞ୍ଚଳର ୩ ଶୋ’ରୁମ୍ ମାଲିକ ଅଭିଯୋଗ କରିବା ପରେ ଡିସିପି ସ୍ପେଶାଲ ସ୍କ୍ବାଡ୍କୁ ତଦନ୍ତ ଦାୟିତ୍ୱ ଦେଇଥିଲେ। ପୋଲିସ ମୋବାଇଲ୍ ନମ୍ବର ଯାଞ୍ଚ କରିବା ସହ କମର୍ସିଆଲ ଟ୍ୟାକ୍ସ ଅଫିସ୍କୁ ଯାଇ ଯାଞ୍ଚ କରାଯିବା ପରେ ଉକ୍ତ ବ୍ୟକ୍ତିଜଣକ ଠକ ବୋଲି ଜାଣିବାକୁ ପାଇଥିଲା। ପୂର୍ବରୁ ମଧ୍ୟ ଏଭଳି ଅଭିଯୋଗ ଆସିଥିବା ଅଫିସ ପକ୍ଷରୁ କୁହାଯିବା ପରେ ପୋଲିସ ଉକ୍ତ ମୋବାଇଲ୍ ନମ୍ବରକୁ ଟ୍ରେସ୍ କରି ତାଙ୍କୁ ଧରିବା ପରେ ଅସଲ ପରିଚୟ ଓ କାର୍ନାମା ପଦାକୁ ଆସିଥିଲା। ଟ୍ରୁ କଲରରେ ଆସୁଥିବା ବିପିନ ବିହାରୀ ତ୍ରିପାଠୀ ତାଙ୍କ ବାପାଙ୍କ ନାମ ବୋଲି ଜଣାପଡିଛି।