ଢେଙ୍କାନାଳ ଅଫିସ,୧୯ା୫-ଢେଙ୍କାନାଳ ସହର ଉପକଣ୍ଠ ରାମେଶ୍ୱରପୁର ଅଞ୍ଚଳରୁ ସୋମବାର ବିଳମ୍ବିତ ରାତିରେ ଏକ ନକଲି ମଦ ତିଆରି କାରଖାନା ଠାବ କରାଯାଇଛି। ବେଆଇନ ମଦ ପ୍ରସ୍ତୁତିରେ ସମ୍ପୃକ୍ତି ଅଭିଯୋଗରେ ରାମେଶ୍ୱରପୁରର ବିକାଶ ପୁହାଣ(୪୮), ସିମିଳିଆର ଅଜୟ ଦଳେଇ (୪୧) ଏବଂ କାଇଁଶ ଅଞ୍ଚଳର ଅଦ୍ୱୈତ ପୃଷ୍ଟି (୩୯)ଙ୍କୁ ଗିରଫ କରାଯାଇଛି। ଘଟଣାସ୍ଥଳରୁ ୧୯୬ ଲିଟର ନକଲି ଦେଶୀମଦ, ୧୦ଟି ପ୍ୟାକିଂ ପାଇଁ ଉଦ୍ଦିଷ୍ଟ ଜରି ପ୍ୟାକେଟ୍, ଗୋଟିଏ ବଡ଼ ସିଲିଂ ମେଶିନ, ୩ ଛୋଟ ସିଲିଂ ମେଶିନ, ୫ ଲିକୁଇଡ୍ ପ୍ଲେଭର ବୋତଲ ଜବତ କରାଯାଇଛି।
କରୋନା କଟକଣା ଯୋଗୁ ସହରର ସମସ୍ତ ଦେଶୀଭାଟି, ବିକ୍ରି କେନ୍ଦ୍ର ଏବଂ ବିଦେଶୀ ମଦ ଦୋକାନ ସିଲ୍ କରାଯାଇଛି। ଏସବୁ ସତ୍ତ୍ୱେ ଚୋରାରେ ବିପୁଳ ପରିମାଣରେ ନକଲି ମଦ କାରିବାର ହେଉଛି। କାଇଁଶ ଏପରି ଏକ ମଦ କାରଖାନା ଚାଲିଥିବା ସୂଚନା ପାଇ ଜିଲାପାଳ ଭୂମେଶ ଚନ୍ଦ୍ର ବେହେରାଙ୍କ ନିର୍ଦ୍ଦେଶରେ ଜିଲା ଅବକାରୀ ଅଧୀକ୍ଷକ ମନୋଜ ସେଠୀ, ଟାଉନ ଥାନା ପୋଲିସ ଏବଂ ବିଭାଗୀୟ କର୍ମଚାରୀମାନେ ମିଳିତ ଭାବେ ଚଢ଼ାଉ କରିଥିଲେ। ଅଦ୍ୱୈତଙ୍କ ଘରୁ ୫୦ ଲିଟର ଦେଶୀ ମଦ ଜବତ କରାଯାଇଥିଲା। ତାଙ୍କୁ ପଚରାଉଚୁରା ପରେ ସେ ରାମେଶ୍ୱରପୁର ଅଞ୍ଚଳରେ ଚାଲିଥିବା ମଦ କାରଖାନା ସମ୍ପର୍କରେ ସୂଚନା ଦେଇଥିଲା।