କାଳିଆପାଣି,୨୯।୨(ଡିଏନଏ): ନଗଡ଼ା ପାଇଁ ସରକାର ମାଳ ମାଳ ଯୋଜନା କରି ଏଥିପାଇଁ ପାଣି ପରି ଟଙ୍କା ଖର୍ଚ୍ଚ କରିଚାଲିଛନ୍ତି। ମାତ୍ର ଏହି ଅଞ୍ଚଳର ବିକାଶ କେତେଦୂର ହୋଇଛି ତାହାର ତଦାରଖ କରିବାକୁ ଶୁକ୍ରବାର ନଗଡ଼ାରେ ପହଞ୍ଚତ୍ଥିଲେ ଭାରପ୍ରାପ୍ତ ଜିଲାପାଳ ଇନ୍ଦ୍ରମଣି ନାୟକ। ଜଳପରିମଳ ଓ ଜୀବନ ଜୀବିକା ପରିବର୍ତ୍ତନ, ପାନୀୟ ଜଳ ଯୋଗାଣକୁ ନେଇ ଉପସ୍ଥିତ ଥିବା ଅଧିକାରୀଙ୍କ ସହ ଆଲୋଚନା କରିବା ସହ କାର୍ଯ୍ୟ ସମ୍ପୂର୍ଣ କରିବା ଉପରେ ଜୋର ଦେଇଥିଲେ। ୨୦୧୬ ମସିହା ନଗଡ଼ାରେ ହୋଇଥିବା ଶିଶୁ ମୃତ୍ୟୁ ଘଟଣା ପରେ ରାଜ୍ୟ ସରକାରଙ୍କ ପକ୍ଷରୁ ପାଣି ଭଳି ଅର୍ଥ ଖର୍ଚ୍ଚ କରି ଅପପୁଷ୍ଟି ରୋକିବା ଓ ଜୁଆଙ୍ଗଙ୍କ ବିକାଶ କାର୍ଯ୍ୟ ତ୍ୱରିତ ବେଗରେ କରାଯାଇଥିଲା। ନଗଡ଼ାରେ ପାନୀୟ ଜଳ ଯୋଗାଣ, ରାସ୍ତା ନିର୍ମାଣ ପାଇଁ ବିଭିନ୍ନ କ୍ଷେତ୍ରରେ କୋଟିକୋଟି ଟଙ୍କା ଖର୍ଚ୍ଚ କରାଯାଉଛି। ଏହିସବୁ କାର୍ଯ୍ୟର ତଦାରଖ କରିବା ସହ ରାସ୍ତା କାର୍ଯ୍ୟରେ ଖର୍ଚ୍ଚ ହୋଇଥିବା ଅର୍ଥରୁ ବଳକା ରହିଥିବା ୧କୋଟି ୮୩ ଲକ୍ଷ ଟଙ୍କାରେ ମରାମତି କରିବା ସହ ଅନ୍ୟାନ୍ୟ କାର୍ଯ୍ୟ କରିବାକୁ ରାଜସ୍ବ ମନ୍ତ୍ରୀ ସୁଦାମ ମାରାଣ୍ଡି ନିର୍ଦ୍ଦେଶ ଦେଇଥିଲେ। ଏହି କାର୍ଯ୍ୟ ପୂର୍ବ ଟେଣ୍ଡରରେ କରିବାକୁ ରହିଥିବାବେଳେ କିପରି ହୋଇପାରିବ ସେ ନେଇ ଭାରପ୍ରାପ୍ତ ଜିଲାପାଳ ଅଧିକାରୀଙ୍କ ସହ ଆଲୋଚନା କରିଥିଲେ। ପାନୀୟ ଜଳ ପାଇଁ ହୋଇଥିବା ଭଙ୍ଗା ଟ୍ୟାପ୍, ଷ୍ଟାଣ୍ଡ ପୋଷ୍ଟ ମରାମତି କରିବାକୁ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ସେହିପରି ଗୁହିଆଶାଳକୁ ନିର୍ମାଣ ହେଉଥିବା ରାସ୍ତା କାର୍ଯ୍ୟରେ ଜୁଆଙ୍ଗଙ୍କୁ ଲଗାଇ ଏମ୍ଜିଏନ୍ଆରଇଜିଏସ୍ରେ କାମ କରିବାକୁ ନିର୍ଦ୍ଦେଶ ଦେଇଥିଲେ। ନିର୍ମାଣ ହୋଇଥିବା ପାଇଖାନା ବ୍ୟବହାର, ସ୍ବଚ୍ଛତା ପରିମଳ ଅବଲମ୍ବନ, ଖାଦ୍ୟପେୟରେ ପରିବର୍ତ୍ତନ ନିମନ୍ତେ ସରକାର ନଗଡ଼ାରେ ବହୁ ଅର୍ଥ ବ୍ୟୟ କରି ଟ୍ରିକିଲ ଓ ୱଷ୍କା ଭଳି ଦୁଇ ଏନଜିଓକୁ ଆହୁରି ଅଧିକ ଧ୍ୟାନ ଦେଇ କାର୍ଯ୍ୟ କରିବାକୁ କହିଥିଲେ। ଏହି ଗସ୍ତ ସମୟରେ ଡିଏମଏଫ (ଜିଲା ଖଣିଜ ପାଣ୍ଠି ) ଯାଜପୁର ଜିଲା ମୁଖ୍ୟ ସୁଭାଶିଷ କୁମାର, ସୁକିନ୍ଦା ବିଡିଓ ବିଶ୍ୱଜିତ ଦାସଙ୍କ ସହ ସମସ୍ତ ବିଭାଗର ଅଧିକାରୀ ଉପସ୍ଥିତ ଥିଲେ।