ଖଣ୍ଡପଡ଼ା,୨୮ା୫(ସ୍ବ.ପ୍ର.)-ପରିବେଶକୁ ସ୍ବଚ୍ଛ ସୁନ୍ଦର ରଖିବା ସହିତ ବାହାରେ ମଳତ୍ୟାଗ ନ କରିବା ପାଇଁ ସରକାର ବିଭିନ୍ନ ପ୍ରକାର ଯୋଜନା କରିଛନ୍ତି ା ଏ ଦିଗରେ ଜନସାଧାରଣଙ୍କୁ ସଚେତନ କରିବା ପାଇଁ ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ ମଧ୍ୟ କାର୍ଯ୍ୟ କରୁଛି। ମାତ୍ର କଣ୍ଟିଲୋ ଅଞ୍ଚଳର ମୁଖ୍ୟ ରାସ୍ତା ଓ ନଦୀବନ୍ଧ ଉପରେ ଅଳିଆ ଆବର୍ଜନାକୁ ଦେଖିଲେ ସଚେତନତା କାର୍ଯ୍ୟକ୍ରମର ପ୍ରଭାବ ସ୍ଥାନୀୟ ଲୋକଙ୍କ ଉପରେ ପଡୁ ନ ଥିବା କୁହାଯାଇପାରିବ। ଏହା ଦ୍ୱାରା ପରିବେଶ ପ୍ରଦୂଷିତ ହେଉଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଉଛି।
କଣ୍ଟିଲୋ ନୀଳମାଧବ କ୍ଷେତ୍ର ଜଗନ୍ନାଥ ସଂସ୍କୃତିର ଆଦିପୀଠ ଭାବେ ପରିଚିତ ା ଶ୍ରୀ ଜୀଉଙ୍କ ଦର୍ଶନ ପାଇଁ ପ୍ରତ୍ୟହ ଏଠାକୁ ଶହ ଶହ ପର୍ଯ୍ୟଟକ ଆସିଥାନ୍ତି। କଣ୍ଟିଲୋ ବଜାର ଛକ ଦେଇ ପ୍ରାୟତଃ ଯାତ୍ରୀମାନେ ମନ୍ଦିରକୁ ଯାଇଥାନ୍ତି। ଏହାଛଡା ନିକଟରେ ମହାନଦୀ ପ୍ରବାହିତ ହେଉଥିବାରୁ ତଟବର୍ତ୍ତୀ ଲୋକଙ୍କ ସୁରକ୍ଷା ପାଇଁ ମାଳବନ୍ଧ ନିର୍ମାଣ କରାଯାଇଛି। ଏହି ମାଳବନ୍ଧ ଉପରେ ମଧ୍ୟ ଯାତ୍ରୀମାନେ ଯା’ଆସ କରନ୍ତି। ହେଲେ ପରିତାପର ବିଷୟ ଏହି ମାଳବନ୍ଧକୁ ସ୍ଥାନୀୟ ବ୍ୟବସାୟୀମାନେ ଡଷ୍ଟବିନ ଭାବରେ ବ୍ୟବହାର କରୁଛନ୍ତି। ବଜାର ଛକ ଉପରେ ତଥା ଉକ୍ତ ରାଜପଥ କଡରେ ଉଠାଦୋକାନୀ ବସି ପନିପରିବା ବିକ୍ରି କରୁଛନ୍ତି। ବଜାରର ବ୍ୟବସାୟୀଠାରୁ ଆରମ୍ଭକରି ଉଠା ପରିବା ଦୋକାନୀ ଓ ମାଛ ବ୍ୟବସାୟୀମାନେ ବର୍ଜ୍ୟବସ୍ତୁ ମାଳବନ୍ଧ ଉପରେ ଫିଙ୍ଗୁଛନ୍ତି। ଏହାଦ୍ୱାରା ପରିବେଶ ପ୍ରଦୂଷିତ ହେବା ସହ ରାସ୍ତା ସଙ୍କୁଚିତ ହେଉଛି। ବେଳେବେଳେ କେତେଜଣ ଆବର୍ଜନାରେ ନିଆଁ ଲଗାଇ ପୋଡିଦେଉଥିଲେ ମଧ୍ୟ ଅଧିକାଂଶ ସମୟରେ ମାଳବନ୍ଧରେ ଅଳିଆ ଗଦା ହୋଇରହୁଛି। ବର୍ଷାଦିନେ ଏହି ଆବର୍ଜନା ନଦୀ ସ୍ରୋତରେ ଭାସି ଜଳକୁ ଅଧିକ ପ୍ରଦୂଷିତ କରିଥାଏ ା ଏହାଛଡା କେତେକ ଲୋକ ମାଳବନ୍ଧ ଉପରେ ମଳ ତ୍ୟାଗ କରୁଥିବାରୁ ତାହା ପଥଚାରୀଙ୍କ ପାଇଁ ସମସ୍ୟା ସୃଷ୍ଟି କରୁଛି। ଏ ଦିଗରେ ସମସ୍ତେ ସଚେତନ ହେବା ଜରୁରୀ ବୋଲି ସ୍ଥାନୀୟ ବୁଦ୍ଧିଜୀବୀମାନେ ମତପ୍ରକାଶ କରିଛନ୍ତି।
ନିଆଳି କୈବର୍ତ୍ତ ସମାଜର ରାଜ୍ୟସ୍ତରୀୟ ମହାସଭା
ଗଣିଆ,୨୮ା୫(ଡି.ଏନ.ଏ.)- ନୟାଗଡ଼ ଜିଲା ନିଆଳି କୈବର୍ତ୍ତ ସମାଜ ତରଫରୁ ରବିବାର ଅପରାହ୍ନରେ ଗଣିଆସ୍ଥିତ ଜଗନ୍ନାଥ ମନ୍ଦିର ପ୍ରାଙ୍ଗଣରେ ରାଜ୍ୟସ୍ତରୀୟ ଦ୍ୱାଦଶ ମହାସଭା ଅନୁଷ୍ଠିତ ହୋଇଯାଇଛି ା ସନାତନ ବେହେରାଙ୍କ ସଭାପତିତ୍ୱରେ ଆୟୋଜିତ ସଭାରେ ନବନିର୍ବାଚିତ ଦଶପଲ୍ଲା ବିଧାୟକ ରମେଶ ବେହେରା ମୁଖ୍ୟଅତିଥି ଭାବେ ଯୋଗଦେଇ କାର୍ଯ୍ୟକ୍ରମ ଉଦ୍ଘାଟନ କରିଥିଲେ। ସଭାପତିଙ୍କ ଅନୁମତିକ୍ରମେ ସମାଜର ବିଭିନ୍ନ ସମସ୍ୟା ଓ କାର୍ଯ୍ୟନୀତି ସମ୍ପର୍କରେ ଆଲୋଚନା ହୋଇଥିଲା। ପ୍ରାରମ୍ଭରେ ମୁଖ୍ୟଅତିଥିଙ୍କ ସମେତ ଜାତିସମାଜର ବିଭିନ୍ନ ପଦବୀ ଅଳଙ୍କୃତ କରିଥିବା ବ୍ୟକ୍ତିମାନଙ୍କୁ ଫୁଲତୋଡା, ଉପଢୌକନ ଦିଆଯାଇ ସମ୍ମାନିତ କରାଯାଇଥିଲା। ପରେ ୟୁନିସେଫ୍ ସହାୟତାରେ କାର୍ଯ୍ୟ କରୁଥିବା ସ୍ବେଚ୍ଛାସେବୀ ଅନୁଷ୍ଠାନ ଆକ୍ସନ ଏଡ୍ର ନୟାଗଡ଼ ଜିଲା ପ୍ରତିନିଧି ପ୍ରିୟବ୍ରତ ଶତପଥୀ ବାଲ୍ୟବିବାହ ଓ କିଶୋରୀ ଶିକ୍ଷା ଅଧିକାରର ଆଇନଗତ ଦିଗ ସମ୍ପର୍କରେ ବକ୍ତବ୍ୟ ରଖିଥିଲେ। ଜାତି ସମାଜରେ ବାଲ୍ୟବିବାହ ଭଳି ଏକ ଘୃଣ୍ୟ ସାମାଜିକ ବ୍ୟବସ୍ଥା ସମ୍ପର୍କରେ ଗୁରୁତ୍ୱାରୋପ କରାଯାଇଥିଲା। ଏହା ଏକ କଳଙ୍କିତ ପ୍ରଥା ହୋଇଥିବାରୁ ଏହାକୁ ସମ୍ପୂର୍ଣ୍ଣ ଭାବେ ଉଚ୍ଛେଦ କରିବା, କିଶୋରୀମାନଙ୍କ ଶିକ୍ଷା ଓ ସ୍ବାସ୍ଥ୍ୟ ସହ ସମାଜରେ ସମ୍ମାନର ସହ ବଞ୍ଚତ୍ବାର ଅଧିକାର ନେଇ ଏକ ଶପଥ ଗ୍ରହଣ ପ୍ରସ୍ତାବ ଆଗତ କରାଯାଇଥିଲା। ନିଆଳି କୈବର୍ତ୍ତ ସମାଜରେ ଝିଅକୁ ୧୮ ଓ ପୁଅକୁ ୨୧ ବର୍ଷ ପୂର୍ବରୁ ହେଉଥିବା ବିବାହକୁ ସମ୍ପୂର୍ଣ୍ଣ ଭାବେ ବନ୍ଦ କରାଯିବ ା ଯଦି ଜାତି ସମାଜରେ ଏଭଳି ବିବାହକୁ କୌଣସି ବ୍ୟକ୍ତି ସ୍ବୀକୃତି ପ୍ରଦାନ କରେ କିମ୍ବା କୌଣସି ପରିବାର ନିଜ ନାବାଳକ ସନ୍ତାନଙ୍କ ବିବାହ ଆଇନ ଅନୁମୋଦିତ ସମୟ ପୂର୍ବରୁ କରିବାକୁ ପ୍ରୟାସ କରନ୍ତି ସେମାନଙ୍କୁ ଆଇନତଃ ଦଣ୍ଡିତ କରିବା ପାଇଁ ପ୍ରଶାସନକୁ ସହଯୋଗ କରାଯିବ ବୋଲି ନିଷ୍ପତ୍ତି ନିଆଯାଇଥିଲା।