ରଘୁନାଥପୁର ,୧୮। ୧୨ (ଡି.ଏନ.ଏ.)- ମହାନଦୀ ନର୍ଥ ଜଳସମ୍ପଦ ବିଭାଗ କଟକ ଜିଲା କିଶନନଗର ତହସିଲ ଅନ୍ତର୍ଗତ ଫିପୁର ମାହାଳହାଟଠାରୁ ସାନନୟନପୁରକୁ ସଂଯୋଗ କରୁଥିବା ନଦୀବନ୍ଧ ରାସ୍ତା ଶୋଚନୀୟ ହୋଇପଡିଛି। ଏହା ଉପରେ ନିର୍ଭର କରୁଥିବା ମହାନଦୀ, ପାଇକା ଓ ଚିତ୍ରୋତ୍ପଳା ଦ୍ୱିପାଞ୍ଚଳବାସୀଙ୍କ ପକ୍ଷରୁ ଦୁଇ ଦଶନ୍ଧି ଧରି ନଦୀବନ୍ଧ ରାସ୍ତାର ସୁଦୃଢୀକରଣ ପାଇଁ ଦାବି ହୋଇଆସୁଛି। କେବଳ ରାସ୍ତାର ମରାମତି କରାଯାଇଛି। ଏବେ ଏହା ଆନ୍ଦୋଳନର ରୂପ ନେଇଛି। ଦ୍ୱିପାଞ୍ଚଳର ୨୦ ପଞ୍ଚାୟତବାସୀ ମଙ୍ଗଳବାର ଏହାର ପ୍ରବେଶ ପଥ କଟକ-ପାରାଦୀପ ରାସ୍ତାର ତାରପୁର ବାଇପାସ୍ଠାରେ ପୂର୍ବାହ୍ନ ୧୦ଟାରେ ରାସ୍ତାରୋକୋ କରିଥିଲେ। ଫଳରେ ରାସ୍ତାର ଉଭୟପାର୍ଶ୍ୱରେ ଶତାଧିକ ଗାଡି ଅଟକି ରହିଥିଲା। ଫଳରେ ଲୋକେ ଅସୁବିଧାର ସମ୍ମୁଖୀନ ହୋଇଥିଲେ।
ଏହି ନଦୀବନ୍ଧ ରାସ୍ତା ଦେଇ କଟକ-କେନ୍ଦ୍ରାପଡା ଓ ଜଗତ୍ସିଂହପୁର ଜିଲାର ଲୋକେ ଯାତାୟାତ କରିଥାନ୍ତି। ପ୍ରତ୍ୟେକ ଦିନ ରାସ୍ତାରେ ୨ ହଜାରରୁ ଊର୍ଦ୍ଧ୍ୱ ବାଇକ୍, ଚାରିଚକିଆ ଯାନ ଏବଂ ଟ୍ରକ୍ ବସ୍ ଇତ୍ୟାଦି ଯାତାୟାତ କରିଥାଏ। ଏହାଛଡା କୃଷ୍ଣାନନ୍ଦପୁର, ବିଶନପୁର, ଦାଇଁଲୋ, କନିମୂଳ, ଶଙ୍ଖେଶ୍ୱର, ତେଣ୍ଢାକୁଡା,ମହମ୍ମଦପୁର, ମଣିଜଙ୍ଗ, ଉତ୍ତରକୂଳ, ବାବୁଜଙ୍ଗ ସମେତ ୨୦ ପଞ୍ଚାୟତବାସୀ ନଦୀବନ୍ଧ ରାସ୍ତାରେ ଯାତାୟାତ କରିଥାନ୍ତି। ତେବେ ୩ କିମି ବ୍ୟାପୀ ରାସ୍ତା ସମ୍ପୂର୍ଣ୍ଣ ଭାବେ ଖାଲଖମାରେ ପରିପୂର୍ଣ୍ଣ। ସ୍କୁଲ ଭ୍ୟାନ, ଦମକଳ ଗାଡି ଓ ଆମ୍ବୁଲାନ୍ସଟିଏ ମଧ୍ୟ ରାସ୍ତାରେ ଠିକ୍ ସମୟରେ ପହଞ୍ଚତ୍ ପାରୁନି। ସରକାରଙ୍କୁ ବାରମ୍ବାର ଅଭିଯୋଗ ପରେ କୌଣସି ପ୍ରତିକାର କରାଯାଉନାହିଁ। ଏହାର ପ୍ରତିବାଦରେ ୨୦ ପଞ୍ଚାୟତର ବୁଦ୍ଧିଜୀବୀ ଓ ସାଧାରଣ ଲୋକ ଏକତ୍ରିତ ହୋଇ ଏ ସମ୍ପର୍କରେ ଆଲୋଚନା କରିଥିଲେ। ନଦୀବନ୍ଧ ସମନ୍ବୟ ସମିତି ଭାବେ ଏକ କମିଟି ଗଢା ଯାଇ ପୁନର୍ବାର ସରକାରଙ୍କୁ ଏ ସଂକ୍ରାନ୍ତରେ ଅବଗତ କରାଯାଇଥିଲା। ରାସ୍ତାଟି ଉଭୟ କଟକ ଓ କେନ୍ଦ୍ରାପଡା ଜଳସମ୍ପଦ ବିଭାଗ ଅଧୀନରେ ରହିଛି। ୩ ଜିଲାର ଜିଲାପାଳ, କଟକ ସଦର, ପାଟକୁରା, ତିର୍ତ୍ତୋଲ ବିଧାୟକ ଓ ୩ ଜିଲାର ଏମ୍ପିଙ୍କୁ ମଧ୍ୟ ଏ ନେଇ ଅଭିଯୋଗପତ୍ର ଦିଆଯାଇଥିବା ସମିତିର ଆବାହକ ତଥା କନିମୂଳ ସରପଞ୍ଚ ବେଦଦ୍ୟୁତି ପୃଷ୍ଟି ପ୍ରକାଶ କରିଛନ୍ତି। ବିଧାୟକ, ଏମ୍ପିଙ୍କ ଏଥିପ୍ରତି ଅନ୍ତରିକତା ପ୍ରକାଶ ନ ପାଇବା, ଜଳସମ୍ପଦ ବିଭାଗ ସର୍ବୋଚ୍ଚ ଯନ୍ତ୍ରୀଙ୍କ ସମେତ ୩ ଜିଲାପାଳଙ୍କ ପକ୍ଷରୁ ଅବହେଳା ପ୍ରଦର୍ଶନ କରାଯିବାରୁ ବାଧ୍ୟ ହୋଇ ଲୋକେ ରାସ୍ତାକୁ ଓହ୍ଲାଇଲେ ବୋଲି ଦ୍ୱିପାଞ୍ଚଳ ଉନ୍ନୟନ ପରିଷଦର ସଭାପତି ପୀତାମ୍ବର ପରିଜା କହିଥିଲେ। ଆନ୍ଦୋଳନ ସ୍ଥଳରେ ବିଧାୟକ ଓ ଏମ୍ପିମାନଙ୍କ ପାରିବା ପଣିଆକୁ ନେଇ ପ୍ରଶ୍ନ ଉଠାଇ ବିରୋଧରେ ନାରାବାଜି କରିଥିଲେ। ଜଗତ୍ସିଂହପୁର ଉପଜିଲାପାଳ ମହେନ୍ଦ୍ର ପ୍ରସାଦ ମହାନ୍ତି, ଇରିଗେଶନ ଏକଜିକ୍ୟୁଟିଭ ଇଞ୍ଜିନିୟର କଟକ ଚିତ୍ତରଞ୍ଜନ ଜେନା ଓ ସ୍ଥାନୀୟ ତହସିଲଦାର ରୂପାଲିକା ଦାଶ ଘଟଣାସ୍ଥଳରେ ପହଞ୍ଚତ୍ଥିଲେ। ଉପଜିଲାପାଳ ମହାନ୍ତି ସେମାନଙ୍କ ସହ ଆଲୋଚନା କରି ଅଭିଯୋଗପତ୍ର ଗ୍ରହଣ କରିବା ପରେ ରାସ୍ତାରୋକୋ ହଟିଥିଲା। ଆନ୍ଦୋଳନରେ ବିଶନପୁର ସରପଞ୍ଚ ବସନ୍ତ ମହାପାତ୍ର, କ୍ରିଷ୍ଣାନନ୍ଦପୁର ସରପଞ୍ଚ ଗୋଲେଖ ନାରାୟଣ ଜେନା, ଦାଇଁଲୋ ସରପଞ୍ଚ ଧନଞ୍ଜୟ ସୁତାର, ମାନସ ଦାସ,ଦେବନାରାୟଣ ମହାନ୍ତି, ଅବୁ କାଲାମ, ଶେଖ ସୋଭାନ, ଜଗଦୀଶ ପାଣି, ନୁରୁଲ ହୋସେନ୍, ଅଜୟ ନାୟକ, ଲକ୍ଷ୍ମୀକାନ୍ତ ଦାଶ, ନିଆଜ ଖାନ, ମମତାଜ ଅଲ୍ଲିଙ୍କ ସମେତ ୫ଶହରୁ ଊର୍ଦ୍ଧ୍ୱ ମହିଳାପୁରୁଷ ସାମିଲ ହୋଇଥିଲେ।