ଭୁବନ,୧୨।୧୨(ଡି.ଏନ୍.ଏ.): ଢେଙ୍କାନାଳ ବନଖଣ୍ଡ ଭୁବନ ବନାଞ୍ଚଳ ପକ୍ଷରୁ ଗୁରୁବାର ରାଜ୍ୟ ସରକାରଙ୍କ ଜଙ୍ଗଲ ଓ ପରିବେଶ ବିଭାଗ ପକ୍ଷରୁ ଆୟୋଜିତ ସବୁଜ ମହାନଦୀ ମିଶନର ବ୍ରାହ୍ମଣୀ ସେବାଯାତ୍ରା ଶୁଭାରମ୍ଭ ହୋଇଛି। ଏହି ବ୍ରାହ୍ମଣୀ ସେବାଯାତ୍ରାକୁ ଭୁବନ ବ୍ଲକ ଅଧ୍ୟକ୍ଷ ଧର୍ମାନନ୍ଦ ବରାଳ ମୁଖ୍ୟ ଅତିଥି ଭାବେ ଯୋଗ ଦେଇ ଉଦ୍ଘାଟନ କରିଛନ୍ତି। ଭୁବନ ତହସିଲଦାର ଶକ୍ତିକାନ୍ତ ରାଏ, ବିଡିଓ ଆଶୀର୍ବାଦ ପରିଡ଼ା ଓ ବ୍ଲକ କଳା ସଂସ୍କୃତି ବିଭାଗର ଉପ ସଭାପତି ଅଶୋକ କୁମାର ସାମଲ ଅତିଥି ଭାବେ ଯୋଗଦେଇ ନଦୀ ସୁରକ୍ଷା ରହିଲେ ବୃକ୍ଷଲତା ଓ ଜୀବଜଗତ ବଞ୍ଚି ରହିବା ସାଙ୍ଗକୁ ମନୁଷ୍ୟ ସମସ୍ତ ସୁବିଧା ସୁଯୋଗ ପାଇପାରିବେ ବୋଲି କହିଥିଲେ। ଏହି ଅବସରରେ ସମସ୍ତ ଅତିଥି ଓ ବନବିଭାଗ କର୍ମଚାରୀମାନେ ଏକ ରାଲିରେ ବିଭିନ୍ନ ଅଞ୍ଚଳ ପରିକ୍ରମା କରିଥିଲେ। ବିଶେଷକରି ନୀଳକଣ୍ଠପୁର, ଭୁଷଳ, ଚଣ୍ଡିପାଳ, ଜୟପୁର, ମାର୍ଥାପୁର ଓ ଭୈରୀପୁର ଅଞ୍ଚଳରେ ଦାଶକାଠିଆ ମାଧ୍ୟମରେ ପଥପ୍ରାନ୍ତ ସଭା କରି ସଚେତନତା ସୃଷ୍ଟି କରିଥିଲେ। ଏହି କାର୍ଯ୍ୟକ୍ରମକୁ ଭୁବନ ରେଞ୍ଜର ଅନୀତା ସେଠୀ ପରିଚାଳନା କରିଥିବା ବେଳେ ଡେପୁଟି ରେଞ୍ଜର ଗୌତମ ପ୍ରଧାନ, ଫରେଷ୍ଟର କବିତା ବିଶାଳ ପ୍ରମୁଖ ଉପସ୍ଥିତ ଥିଲେ।
