ନରାଜ, ୨୮।୫ (ଡି.ଏନ୍.ଏ.): କରୋନା ଓ ଲକ୍ଡାଉନ୍ ପାଇଁ ପ୍ରାଣୀ ଉଦ୍ୟାନ ନନ୍ଦନକାନନ ପ୍ରଭାବିତ ହୋଇଛି। ୧୯୯୯ ମହାବାତ୍ୟା, ୨୦୧୯ ଫନୀ ପରେ ଏବେ ଏସିଆ ମହାଦେଶର ଏହି ସର୍ବବୃହତ୍ ଚିଡ଼ିଆଖାନା ଉପରେ କରୋନା ମାଡ଼ ପଡ଼ିଛି। ମାର୍ଚ୍ଚ ୧୫ରୁ ନନ୍ଦନକାନନରେ ତାଲା ଝୁଲୁଛି। ରାଜ୍ୟରେ ସଂକ୍ରମଣ ଓ ଆକ୍ରାନ୍ତଙ୍କ ସଂଖ୍ୟା ବଢ଼ୁଥିବାରୁ ନନ୍ଦନକାନନ ଖୋଲିବା ନେଇ ଅନିଶ୍ଚିତତା ଦେଖାଦେଇଛି।
ଆମେରିକାର ନ୍ୟୁୟର୍କସ୍ଥିତ ବ୍ରୋଙ୍କ୍ସ ଚିଡିଆଖାନାରେ ବାଘ ଶରୀରରେ କରୋନା ଭୂତାଣୁ ଠାବ ହେବାପରେ ନନ୍ଦନକାନନକୁ ସଂକ୍ରମଣ ଭୟ ଘାରିଛି। ଯେପରି ଏହା ମଧ୍ୟକୁ ଭୂତାଣୁ ପ୍ରବେଶ ନ କରିବ ସେଥିପାଇଁ କର୍ତ୍ତୃପକ୍ଷ ସତର୍କତାମୂଳକ ପଦକ୍ଷେପ ଗ୍ରହଣ କରିଛନ୍ତି। ନନ୍ଦନକାନନକୁ ବାହାର ଲୋକଙ୍କୁ ସମ୍ପୂର୍ଣ୍ଣ ବାରଣ କରାଯାଇଥିବାବେଳେ କେବଳ ଜୀବଜନ୍ତୁଙ୍କ ଦାୟିତ୍ୱରେ ଥିବା କେତେଜଣ କର୍ମଚାରୀମାନଙ୍କୁ ପାଳିକରି ଭିତରକୁ ଛଡାଯାଉଛି। ସେମାନେ ନିୟମିତ ସାନିଟାଇଜର ବ୍ୟବହାର କରିବା ସହ ମାସ୍କ ପିନ୍ଧି ଓ ସାମାଜିକ ଦୂରତ୍ୱ ରଖି କାର୍ଯ୍ୟ କରୁଛନ୍ତି ବୋଲି ନନ୍ଦନକାନନ କର୍ତ୍ତୃପକ୍ଷ ସୂଚନା ଦେଇଛନ୍ତି।